Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 1

Barita na Madear Aha do Ai?

Barita na Madear Aha do Ai?

1. Aha do barita na madear humbani Naibata?

Naibata sihol ase haganup jolma boi mangahapkon goluh na sonang i tanoh on. Ia manompa tanoh ampa haganup isini halani holongNi bani manisia. Lang piga dokah nari be, Ia laho mambere hagoluhan na madear hubani ganup jolma i ari magira. Naibata laho manasap haganup na mambahen sitaronon ni manisia.Basa Jeremia 29:11.

Lang adong pamarentahan na boi manasap hajahaton, naboratan, atap pe hamateian. Tapi, adong do barita na madear. Lang piga dokah nari be, Naibata laho manripaskon haganup pamarentahan ni manisia marhitei HarajaonNi. Holi, panombahNi boi mangahapkon hadameion pakon hasehaton na dear.Basa Jesaya 25:8; 33:24; Daniel 2:44.

2. Mase barita na madear ai porlu?

Sitaronon maningon salpu sanggah Naibata manasap halak parjahat i tanoh on. (Sefanya 2:3) Attigan do ai saud? Hasunsahan na masa sonari on, na mambahen hita marsik domma ihatahon bani Bibel. On patuduhkon, lang dokah nari Naibata laho manasap sitaronon.Basa 2 Timoteus 3:1-5.

3. Aha do na laho sihorjahononta?

Maningon do hita marlajar humbani Bibel, ise do Naibata. Buku in songon sada surat humbani bapa na parholong. Bibel patugahkon hubanta sonaha do mambahen ase hagoluhan sonari on lambin dear pakon sonaha ase boi dapotta hagoluhan sadokah ni dokahni i ari magira i tanoh on. Age pe sonai, ra do adong halak na lang marosuh anggo Nasiam mandapot pangurupion mangarusi Bibel.Basa Podah 29:25; Pangungkabon 14:6, 7.