Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 7

Aha do Harajaon ni Naibata Ai?

Aha do Harajaon ni Naibata Ai?

1. Aha do Harajaon ni Naibata ai?

Mase Jesus Raja na topat?MARKUS 1:40-42.

Harajaon ni Naibata aima sada pamarentahan hun nagori atas. Harajaon on manropukkon haganup harajaon na legan na adong i tanoh on, anjaha pasaudkon harosuhNi i nagori atas ampa i tanoh on. On barita na madear hubanta. Manisia mamorluhon pamarentahan na dear, anjaha lang piga dokah nari Harajaon ni Naibata pasaudkon in ganup. Harajaon ai laho pasadahon haganup jolma i tanoh on.Basa Daniel 2:44; Mateus 6:9, 10; 24:14.

Harajaon iparentah marhitei sada raja. Jahowa domma patabalhon Jesus Kristus gabe Raja bani HarajaonNi.Basa Pangungkabon 11:15.

2. Mase Jesus na ipilih gabe Raja?

Jesus aima Raja na topat halani ia maridop ni uhur, anjaha pongkut mampartahankon hasintongan. (Johannes 1:14) Marhuasa do ia laho mangurupi manisia halani ia mamarentah hun nagori atas hu tanoh on. Dob ipagoluh Naibata, naik ma ia hu nagori atas anjaha hundul i siamun ni Naibata paimahon ibere huasa hubani. (Heber 10:12, 13) Ujungni, Naibata mambere huasa laho mamarentah.Basa Daniel 7:13, 14.

3. Ise do hasomanni Jesus laho mamarentah?

Piga-piga halak na isobut ni Bibel ”halak na mapansing” laho mamarentah rap pakon Jesus i nagori atas. (Daniel 7:27) Na parlobei ipilih gabe halak na mapansing aima susianni na martenger uhur. Das hu sonari on, Jahowa mamilih dalahi pakon naboru na porsaya gabe na mapansing. Usih songon Jesus, sidea ipagoluh ibagas partonduyon.Basa Johannes 14:1-3; 1 Korint 15:42-44.

 Piga do na ipagoluh hu nagori atas? Jesus manghatahon sidea ”hulanan na etek”. (Lukas 12:32) Sidea bahat ni 144.000. Sidea laho mamarentah hu tanoh on rap pakon Jesus.Basa Pangungkabon 14:1.

4. Aha do na masa sanggah Jesus laho mamarentah?

Harajaon ni Naibata mulai mamarentah taun 1914. * Na parlobei ihorjahon Jesus aima mandabuhkon Sibolis pakon malekat-malekatni hu tanoh on. Gabe marah ma Sibolis anjaha mambahen hasunsahan i tanoh on. (Pangungkabon 12:7-10, 12) Bani panorang ai, sitaronon ni jolma lambin bahat. Porang, na lohean, naborit, ampa lalou aima ”tanda” Harajaon ni Naibata domma dohor laho mamarentah hu tanoh on.Basa Lukas 21:7, 10, 11, 31.

5. Aha do na laho ihorjahon Harajaon ni Naibata?

Marhitei horja mambaritahon Hata ni Naibata i sab dunia on, Harajaon ni Naibata pasadahon jolma humbani sagala bangsa. Buei do jolma na maridop ni uhur gabe rayat ni Jesus. Ilinggomi do sidea sanggah Naibata manripaskon pamarentahan na adong i tanoh on. Jadi, haganup jolma na sihol mandapot guna humbani Harajaon ni Naibata maningon do marlajar anjaha unduk hubani Jesus.Basa Pangungkabon 7:9, 14, 16, 17.

Sadokah 1.000 taun, Harajaon ai laho pasaudhon harosuh ni Naibata na parlobei i tanoh on aima mambahen songon paradeiso. Dob ai, Jesus mambere Harajaon ai hubani Bapani. (1 Korint 15:24-26) Hubani ise do Nasiam sihol patugahkon pasal Harajaon ni Naibata?Basa Psalmen 37:10, 11, 29.

 

^ par. 6 Hatorangan pasal panjahaion ni Bibel na patuduhkon taun 1914, torih i alaman 215-218 buku Apa yang Sebenarnya Alkitab Ajarkan?