Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ajari ma Dakdanaknima

 PARLAJARAN 11

Sidea Manuratkon pasal Jesus

Sidea Manuratkon pasal Jesus

Ibotoh ho do ise na ibagas gambar in?— Ai ma si Mateus, si Markus, si Lukas, si Johannes, si Petrus, si Jakobus, si Judas, pakon si Paulus. Sidea manggoluh bani masa ni Jesus, janah manuratkon buku pasal Jesus. Eta, parlajari hita pasal sidea.

Aha na ibotoh ho humbani sidea bani gambar on?

Tolu humbani sidea ai ma apostel na rap marbarita pakon Jesus. Ibotoh ho do na ija sidea?— Si Mateus, si Johannes, pakon si Petrus. Orot do parhasomanan  apostel Mateus, apostel Johannes pakon Jesus, janah isurat sidea do buku pasal pargoluhan ni Jesus. Isurat apostel Johannes do homa buku Pangungkabon pakon tolu surat ai ma Sada Johannes, Dua Johannes, pakon Tolu Johannes. Apostel Petrus manuratkon dua surat ai ma Sada Petrus pakon Dua Petrus. Bani surat na paduahon, isuratni do hata ni Jahowa hun surga na manghatahon pasal Jesus sonon, ’On do anak-Ku, na Huhaholongi, anjaha na pamalaskon uhur-Hu.’

Dong ope na legan bani gambar na manuratkon pasal Jesus, ai ma si Markus. Sanggah Jesus itangkap, ijai do ia mangidah haganup na tarjadi. Na legan, ai ma si Lukas. Dokter do ia. Dobkonsi matei do ra Jesus, baru pe ia gabe halak Kristen.

Dua panurat na legan bani gambar in, ai ma sanina ni Jesus. Ibotoh ho do ise goran ni sidea?— Si Jakobus pakon si Judas. Na hinan, lang porsaya sidea bani Jesus janah iahap sidea na podouan do Jesus. Tapi ujungni porsaya do sidea bani Jesus, janah gabe halak Kristen ma sidea.

Panurat na parpudi bani gambar, ai ma si Paulus. Sanggah lape gabe halak Kristen, goranni si Saulus. Sogam janah jahat do ia bani halak Kristen. Tapi ibotoh ho do mase si Paulus gabe halak Kristen?— Bani sada ari, sanggah si Paulus ibagas pardalanan hu Damaskus, sompong ibogeini sora hun surga na marsahap bani. Sora ni Jesus do ai! Isungkun Jesus ma si Paulus, ’Mase jahat tumang ho hubani susianku?’ Dobkonsi ai ma parmubah ni si Paulus gabe halak Kristen. Bani Bibel dong 14 buku na isurat Si Paulus, ai ma humbani buku Rom ronsi buku Heber.

Hita mambasa Bibel bai ganup ari. Anggo ibasa hita Bibel, bahat do na ibotoh hita pasal Jesus. Marosuh do ho marlajar lambin bahat pasal Jesus?—