Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ajari ma Dakdanaknima

 PARLAJARAN 6

Si Daud Lang Mabiar

Si Daud Lang Mabiar

Aha do bahenonmu sanggah mabiar?— Mangadu do ho ra bani bapa atap inang. Tapi dong ope na legan na boi mangurupi ho, na gogohan humbani ise pe. Ibotoh ho do ise ai?— Eak, Naibata Jahowa. Eta, basa hita sarita ni Bibel pasal si Daud na poso. Ibotoh si Daud tongtong do Jahowa mangurupi ia. Ai do na mambahen ia lang mabiar.

Humbani na etek, si Daud domma iajari namatorasni mangkaholongi Jahowa. Jadi, si Daud lang mabiar sanggah dong situasi na pabiarhon. Ibotoh do Jahowa hasomanni na tongtong mangurupi ia. Bani sada panorang sanggah si Daud marmahan biri-biri, roh ma singa na banggal manangkap sada biri-birini! Ibotoh ho do aha na ibahen si Daud? Iayaki janah ibunuh ma singa ai pitah mamakei tangan! Dob ai dong homa sada gipul laho mangankon biri-birini. Ibunuh si Daud do homa gipul ai! Pandapotmu, ise do na mangurupi si Daud?— Tongon, Jahowa.

Bani panorang na legan si Daud pataridahkon na pangkar do ia. Ijia halak Israel marporang manlawan halak Palistim. Dong sada tentara ni halak Palistim na banggal, raksasa do ia! Goranni si Goliat. Ia mangejek tentara Israel ampa Jahowa, janah dilo-dilo bani tentara Israel ase manlawansi. Tapi lang adong na pag. Jadi, sanggah si Daud manangar ai nini ma bani si Goliat, ’Ahu ma imbangmu! Iurupi Jahowa do ahu laho manaluhon ho!’ Pandapotmu, pag do si Daud?— Tongon, pag tumang. Sihol do ho mambotoh aha na tarjadi?

Si Daud mambuat umbalang pakon lima batu na landit. Umbalang ai ma sada alat pagijigkon batu. Dob ai idohori si Daud ma raksasa ai. Sanggah si Goliat mangidah si Daud na poso ope, iejekni ma si Daud. Tapi nini si Daud ma hubani, ’Roh do ho hubangku mamboban podang, tapi ahu roh hubam ibagas goran ni Jahowa’. Dob ai ibuat si Daud ma batu lanjar ipamasuk bani umbalang ai,  marlintun ma ia hu lobei ni si Goliat janah igijigkon ma batu ai. Topat ma batu ai mangonai pardompakan ni si Goliat. Tompas ma raksasa ai hu tanoh, matei ma ia! Mabiar ma halak Palistim janah lintun. Mase si Daud na poso ope boi manaluhon raksasa?— Halani Jahowa mangurupi ia. Gogohan do Jahowa humbani raksasa ai!

Si Daud lang mabiar halani ia mambotoh iurupi Jahowa do ia

Aha do na iparlajari ho humbani sarita ni si Daud on?— Jahowa do pargogoh na so tarimbang. Hasomanmu do ia. Anggo holi mabiar ho, dingatma Jahowa boi mambahen ho gabe pangkar!

BASA MA BANI BIBELMU