Langsung mi konten

Langsung mi daptar isi

Saksi-Saksi Jahowa

Pilih bahasa Pakpak

 PELAJAREN 14

Kadè Sambing Sikkola si Lot mi Perintis?

Kadè Sambing Sikkola si Lot mi Perintis?

Amerika Serikat

Sikkola Gilead, Patterson, New York

Panama

Saksi-Saksi Jahowa enggo ndekkah itandai kumerna pengajaren Bibèlna. Lot piga-piga sikkola si ibaing pellin mi kalak si gennep tikki merberita Kerajaen. Merkitè sikkola-sikkola i, boi ’mendè pengkebasi kalak i’.2 Timoteus 4:5.

Sikkola Perintis. Tikki enggo sada tahun sada kalak gabè perintis biasa, ia boi engket mersiajar siswa i sikkola èn. Sikkola perintis ndekkahna enem ari. Sikkola èn biasana ibaing i Balè Kerajaen si njolmitna. Tujuun sikkola èn asa boi mengurupi perintis makin ncelket mi Jahowa, boi merhasil mengulaken merbagè ulaan penginjilen, dekket tong ­setia merberita Kerajaen.

Sikkola Penginjil Kerajaen. Sikkola èn ndekkahna dua bulan, ibaing lako kilatih perintis si merpengalamen si nggèut menadingken kutana asa boi mengurupi ulaan perberita i dikè sambing kalak i iperluken. Kalak i bagè mendokken ”Èn ngo aku. Pasulak mo aku!”, bagè codien si iberrèken penginjil si mbelgah si nung merkebbas i babo tanoh èn, Jesus Kristus. (Jesaya 6:8; Johanes 7:29) Kumerna ndaoh i kutana nai, mungkin ia perlu mengobah cara nggelluhna gabè biasa-biasa sambing. Kebudayaen, cuaca, dekket panganen mungkin oda dos dekket si lot i kutana. Piga-piga perintis mungkin kennah mersiajar bahasa rembaru. Sikkola èn mengurupi daholi dekket daberru, sinibalè dekket sinibages, si merumur 23 soh mi umur 65 tahun, asa mersidasaken sipat-sipat merandal si iperluken mi ulaan pengin­jilen kalak i. Janah, kalak i iurupi asa pandè memaing merbagè ulaan asa boi lebih mbuè ipakkè Jahowa dekket organisasiNa.

Sikkola Bibèl Gilead Menara Pengawal. I kata Heber, kata ”Gilead” maksudna ”Pulungen si Gabè Saksi”. Sikkola èn ibaing i tahun 1943, janah enggo lebih 8.000 kalak si enggo tamat ikirim gabè utusen injil asa magahken berita ”taba suberri jelma i dunia èn”, janah mbuè kalohon hasilna. (Ulaan Apostèl 13:47) Tikki soh piga-piga tamaten Gilead i Peru, oda dèng lot kuria i nagerri i. Bagèndari, lot 1.000 lebih kuria i si. Tikki utusen injil nami mulai menginjil i Jepang, Saksi si lot i si oda soh sipuluh kalak. Bagèndari, lot 200.000 lebih Saksi i nagerri i. Lima bulan ndekkahna mersiajar i Gilead imo seppè kipelajari Bibèl. Piga-piga kalak si idilo mi sikkola èn imo perintis pilihen manang utusen injil i kuria, si kerèjo i kantor cabang, manang si mengurupi kuria i piga-piga wilayah. Sikkola èn boi memerrè pengajaren asa boi mendè perberitaen Kerajaen i suberri dunia.

  • Kadè ngo tujuun Sikkola Perintis?

  • Lako mi isè ngo Sikkola Penginjil Kerajaen ibaing?