Langsung mi konten

Langsung mi menu peduaken

Langsung mi daptar isi

Saksi-Saksi Jahowa

Pakpak

Isè ngo si Mengulaken Lemmo Atè Jahowa i Jaman Bagèndari?

 PELAJAREN 18

Bakunè Kami Kiurupi Dengan-Dengan Sada Kepercayaen Nami si Mengakapken Kinipersuk?

Bakunè Kami Kiurupi Dengan-Dengan Sada Kepercayaen Nami si Mengakapken Kinipersuk?

Republik Dominika

Jepang

Haiti

Tikki lot mara, Saksi-Saksi Jahowa mènter kiorganisasi ­pemerèen pertolongen mi dengan-dengan sada kepercayaen kalak i si mengakapken mara. I petuduhken mula kami tuhu-tuhu mersikekellengen. (Johanes 13:34, 35; 1 Johanes 3:17, 18) Bakunè carana kami mengurupi?

Memerrèken kèpèng. I abad perjolo lot kelèhèen mbellen i Judea, kalak Kristen i Antiokhia menenges kèpèng lako mengurupi dengan-dengan pertendien kalak i. (Ulaan Apostèl 11:27-30) Bagima pè, mula kami memettoh lot dengan-dengan sada kepercayaen nami i nagerri sidèban mengakapken kinipersuk, kami menengesken pèlèen merkitè kuria asa pengurupen panganen, pakkèen manang sidèbanna boi iberrèken mi kalak sikiperluken.2 Korintus 8:13-15.

Memerrèken pengurupen si cocokna. I bekkas mara, karina sintua menulusi karina anggota kuria asa memettoh berita kalak i. Panitia pengurupen boi kiatur pembagien panganen, laè ènumen, pakkèen, bekkas tading piga-piga ari, dekket merrèken tambar. Mbuè Saksi si pandè nggèut memakkè kèpèngna asa boi laus merrèken pengurupen manang kipelias sapo dekket Balè Kerajaen si ncèda. Kumerna sada organisasi dekket boi rebbakken kerèjo, kami boi ngkasting lako merrèken pengurupen. Belli pè kami kiberrèken pengurupen mi ”samah dengan sipercaya”, kami pè merusaha kalohon lako kiurupi jelma sidèban, oda soal manang kadè pè agamana.Galatia 6:10.

Merrèken pengurupen pertendien dekket pengapoen. Si kena mara pasti kiperluken pengapoen. I tikki bagi, kami dapet geggoh bai Jahowa nai, ”Dèbata simemerrèken ntegguh pennarihen”. (2 Korintus 1:3, 4) Kami lolo kibagahken janji-janji Bibèl mi jelma si kelsohen, memaing kalak i percaya mula Kerajaen Dèbata naing kipesalpun karina mara si memaing ncio ukur dekket kinipersuk.Alamat 21:4.

  • Kasa Saksi-Saksi Jahowa boi ngkasting lako merrèken pengurupen tikki lot mara?

  • Pengapoen pertendien kadè si boi iberrèken kami mi si mengakapken mara?