Langsung mi konten

Langsung mi menu peduaken

Langsung mi daptar isi

Saksi-Saksi Jahowa

Pakpak

Isè ngo si Mengulaken Lemmo Atè Jahowa i Jaman Bagèndari?

 PELAJAREN 3

Bakunè Kesèntengen Bibèl Dapet Nola?

Bakunè Kesèntengen Bibèl Dapet Nola?

Persiajar-Persiajar Bibèl, 1870-en

Cètaken perjolo Menara Pengawal, 1879

Menara Pengawal bagèndari

Bibèl kiramalken mula enggo kessa Jesus matè, naing rohmo guru-guru simengajarken siso tuhu mi kalak Kristen perjolo janah mencèdai kesèntengen Bibèl. (Ulaan Apostèl 20:29, 30) I podi ni ari, kata-kata i tuhu ngo saut. Kalak i kipesada ajaren Jesus dekket pendapet agama kapir, gabè mbellangmo Kekristenen si oda tuhu. (2 Timoteus 4:3, 4) Bakunè kita boi percaya mula bagèndari kita mersidasaken perbinettohen si seppè tersèngèt kadè situhunna iajarken Bibèl?

Dapet tikkina Jahowa lako kibagahken kesèntengen. Ia kiramalken mula i ’ari perpodi, perbinettohen si sènteng naing mbuè kalohon’. (Daniel 12:4) I tahun 1870, sada pulungen kèdèk simenulusi kesèntengen satdar mula mbuè ajaren gereja oda dos bagè i Bibèl. Kumerna i, kalak i mulai merusaha mengantusi ajaren Bibèl situhunna, janah Jahowa kipasu-pasu ­kalak i merkitè perbinettohen si seppè.

Jelma si bujur seppè kipelajari Bibèl. Persiajar-Persiajar Bibèl si ngkasah i, memakkè cara mersiajar si tong ma ipakkè kami soh bagèndari. Kalak i kipelajari Bibèl sada-sada judul. Mula dapet ayat si mahal iantusi, kalak i kitulusi ayat-ayat sidèban si boi peterangkensa. Enggo kessa dapet keterangen si cocok bagè ­karina isi Bibèl, mèntermo isuratken. Jadi, kalak i kipakkè Bibèl lako peterangken ayat-ayat si lot i bagasenna. Merkitè cara si bagidi, kalak i dapet nola kesèntengen tersèngèt gerar dekket Kerajaen Dèbata, lemmo atèNa mi jelma dekket mi babo tanoh èn, keadaen kalak si matè, dekket harapen kekèkèen. Kalak i pè ipeluah i mermatcam kepercayaen dekket kecemmalen si oda mendè nai.Johanes 8:31, 32.

I tahun 1879, Persiajar-Persiajar Bibèl kiantusi mula enggo dapet tikkina lako kibagiken kesèntengen. Jadi, i tahun i, kalak i mulai kicetak majalah si tong ma ibaing kami soh bagèndari Menara Pengawal Memberitakan Kerajaan Yehuwa (oda lot dèng i bahasa Batak Dairi). Bagèndari, kami pesakatken kesèntengen Bibèl i 239 nagerri dekket kira-kira i 700 bahasa. Perbinettohen si sènteng mbuè kalohon!

  • Enggo kessa Jesus matè, kadè si terjadi tersènget kesèntengen Bibèl?

  • Bakunè carana kami boi kidapet nola kesèntengen i Kata Dèbata nai?