Langsung mi konten

Langsung mi menu peduaken

Langsung mi daptar isi

Saksi-Saksi Jahowa

Pakpak

Berita Simerandal Bai Dèbata Nai!

 PELAJAREN 13

Kadè si Naing Terjadi mi Agama?

Kadè si Naing Terjadi mi Agama?

1. Mendè ngo karina agama?

Lot ngo jelma bujur i karina agama. Dèbata kiperdatèken dekket nggèut mengurupi kalak i. Berita simerandal ngo i. Keppèken, mbuè penglako jahat si ulaken jelma ibaing atas dasar agama. (2 Korintus 4:3, 4; 11:13-15) Menurut berita, mula piga-piga agama engket gabè teroris, pemunuh jelma mbuè, geraha, dekket peniksaen anak-anak. Karina i pecioken atè kalak sipercaya mi Dèbata!Jaka Mateus 24:3-5, 11, 12.

Agama situhunna kiperbadiaken Dèbata. Tapi, agama palsu memaing Dèbata oda sennang. Agama palsu kiajarken si oda lot tersurat ibagasen Bibèl, contohna ajaren palsu tersèngèt Dèbata dekket kalak si matè. Tapi, lemmo atè Jahowa asa karina kalak memettoh kebennaren tersèngèt diriNa.Jaka Hesekiel 18:4; 1 Timoteus 2:3-5.

2. Kadè si naing terjadi tersèngèt agama?

Untungna, Dèbata oda boi iluapi agama si mengakku mengkellengiSa tapi situhunna mengkellengi dunia èn. (Jakobus 4:4) Bibèl mengerrari karina agama palsu ”Babel Simbelgah”. Babel imo kota najolo bekkas merkembang agama palsu tikki enggo kessa roh Laè Nasumar i jaman si Noak. Oda ndekkah nè, Dèbata naing kiripasken agama si mengluapi dekket menèndes jelma.Jaka Alamat 17:1, 2, 5, 16, 17; 18:8.

Tapi, lot deng ngo berita simerandal sidèbanna. Jahowa oda kilupaken kalak bujur si lot i agama-agama palsu i suberri dunia èn. Dèbata mengarahken kalak i asa karuar i agama palsu nai merkitè mengajarken kesèntengen.Jaka Mika 4:2, 5.

 3. Kadè kennah iulaken kalak si bujur?

Agama situhunna kipesada karina jelma

Jahowa kiperdatèken kalak si mengkellengi kadè si mendè dekket si sènteng. Dèbata mendokken kalak i asa menadingken agama palsu. Kalak si mengkellengi Dèbata rela mobah asa pesennangken atèNa.Jaka Alamat 18:4.

Dua ribu tahun si enggo salpun, tikki kalak si bujur memeggè berita simerandal bai apostèl nai, kalak i merlolo atè. Kalak i mersiajar dalan nggelluh si rembaru bai Jahowa nai. Èn mo dalan nggelluh si pesennangken, merrèken tujuun dekket harapen. Kalak i gabè sitiruèn banta bagèndari kumerna menjalo berita simerandal dekket pejoloken Jahowa ibas kenggelluhen kalak i.Jaka 1 Tesalonika 1:8, 9; 2:13.

Jahowa menjalo kalak si menadingken agama palsu dekket mendilo kalak i asa merpulung dekket simpangaan naposoNa. Mula Kènè menjalo dilon Jahowa, Kènè boi gabè supan-supanNa, gabè bagian simpangaan naposoNa, dekket dapetten kenggelluhen si amman sumendah.Jaka Markus 10:29, 30; 2 Korintus 6:17, 18.

4. Kasa karina jelma i babo tanoh èn ujungna mersampang atè?

Penghukumen si naing roh mendahi agama palsu pasti gabè berita simerandal banta. Agama palsu oda nè kaduan kiluapi dekket kisursari jelma. Karina jelma si nggelluh naing ipesada i agama si menembah Dèbata situhunna.Jaka Alamat 18:20, 21; 21:3, 4.