Langsung mi konten

Langsung mi menu peduaken

Langsung mi daptar isi

Saksi-Saksi Jahowa

Pakpak

Berita Simerandal Bai Dèbata Nai!

 PELAJAREN 5

Kadè si Ikelemmoken Dèbata i Babo Tanoh èn?

Kadè si Ikelemmoken Dèbata i Babo Tanoh èn?

1. Kadè tujuun Jahowa tikki menempa tanoh èn?

Jahowa memerrè tanoh èn mi jelma lako bekkas tading. Jadi, Adam dekket Hawa itempa oda ngo lako tading i sorga. Malaèkat ngo itempa Dèbata lako tading i sorga. (Job 38:4, 7) Jelma perlebbè i baing i paradaiso si mendè si igerari Pekken Eden. (1 Musa 2:15-17) Jahowa memerrè kalak i dekket pinemparna kesempaten nggelluh sidekah-dekkahna i babo tanoh èn.Jaka Psalm 37:29; 115:16.

Imulana, i Pekken Eden ngo kessa keadaenna bagè paradaiso. Pinempar Adam dekket Hawa ngo si naing mendomi tanoh èn. Baru, kalak i karina boi mengerajai suberri tanoh èn janah pebelang paradaiso. (1 Musa 1:28) Tanoh èn oda ngo lako icèdai tapi mahan bekkas tading karina jelma sidekah-dekkahna.Jaka Psalm 104:5.

2. Kasa bagendari oda lot ne paradaiso i babo tanoh èn?

Kumerna Adam dekket Hawa oda menguèi Dèbata, ipelaus Dèbata mo kalak i sidua i pekken i nai. Ujungna oda lot nè paradaiso, janah oda lot jelma merhasil lako kibaingsa. Bibèl mendokken, ”Enggo isohken Dèbata tanoh èn bai jelma durhaka.”—Job 9:24.Jaka 1 Musa 3:23, 24.

Sondat ngo kadè si ikelemmoken Jahowa bai karina jelma? Oda! Perkuasa ngo ia. Jahowa oda nung gagal. (Jesaya 45:18) Ia naing kipelias karina jelma asa serupa dekket kadè si ikelemmokenNa perjolo.Jaka Psalm 37:11, 34.

3. Bakunè carana Paradaiso ipelias?

Tikki Jesus gabè Raja si ilantik Dèbata, ia lako kipelias Paradaiso i babo tanoh èn. Tikki geraha si igerari Armagedon, Jesus gabè pemimpin malaèkat-malaèkat Dèbata dekket kiripasken karina si mengalo Dèbata. Baru, ikurung Jesus mo Sibolis sindekkah 1.000 tahun. Naposo Dèbata lako meluah i  pengripasen i kumerna Jesus meneggu-neggu dekket mendengani kalak i. Kalak i lako mengakapi kenggelluhen si amman sumendah i Paradaiso i babo tanoh èn.Jaka Alamat 20:1-3; 21:3, 4.

4. Dahari ngo kinipersuk salpun?

Dahari ngo Dèbata naing kipesalpun kejahaten? ”Pertanda” si ibagahken Jesus magahken mula kita enggo njolmit mi ari perpodi. Karina jelma pasti lako salpun mula keadaan dunia bagèndari tong merlanjut. Èn peteridahken mula kita enggo nggelluh i ari perpodi.Jaka Mateus 24:3, 7-14, 21, 22.

Tikki Jesus memerèntah i sorga nai mi babo tanoh èn sindekkah 1.000 tahun, ia naing kipesalpun karina kinipersuk. (Jesaya 9:6, 7; 11:9) Jesus pè naing kisasa dosa-dosa jelma si mengkellengi Dèbata. Jadi, Jahowa naing kipesalpun penakit dekket kemmatèen merkitè Jesus.Jaka Jesaya 25:8; 33:24.

5. Isè ngo si naing tading i Paradaiso kaduan?

I bekkas merpulung Saksi-Saksi Jahowa, Kènè boi pejumpa dekket kalak si mengkellengi Dèbata janah nggèut mersiajar carana lako pesennangken Dèbata

Kalak si menguèi Dèbata boi nggelluh i Paradaiso. (1 Johanes 2:17) Jesus memerrèken tugas mi sisiinna asa menulusi jelma si ncerrep merukur dekket mengajari kalak i carana pesennangken atè Dèbata. Bagèndari, Jahowa mengkebbasi jutaan kalak asa boi nggelluh kaduan i Paradaiso i babo tanoh èn. (Zepanya 2:3) I bekkas merpulung Saksi-Saksi Jahowa, mbuè kalak mersiajar carana lako gabè sinibalè dekket bapa si makin mendè dekket sinibages dekket inang si makin mendè. Anak-anak dekket partua rebbak mersembah dekket mersijar mengulaken perbinettohen Bibèl asa kenggelluhena makin mendè.Jaka Mika 4:1-4.