Langsung mi konten

Langsung mi menu peduaken

Langsung mi daptar isi

Saksi-Saksi Jahowa

Pakpak

Berita Simerandal Bai Dèbata Nai!

 PELAJAREN 6

Kadè Harapen bai Kalak si Enggo Matè?

Kadè Harapen bai Kalak si Enggo Matè?

1. Kadè berita simerandal tersèngèt kalak si enggo matè?

Tikki Jesus i babo tanoh èn, supanna si mergerar Lazarus matè. Enggo empat ari ia matè tikki Jesus roh mi sapona. Laus mo Jesus mi kuburenna dekket si Marta dekket Maria, turang si Lazarus. Merpulung mo mbuè jelma tikki i. Boi ngo ibayangken Kènè lolona Marta dekket Maria tikki Jesus pegelluhken Lazarus?Jaka Johanes 11:21-24, 38-44.

Enggo ibettoh Marta kin berita simerandal tersèngèt kalak si enggo matè. Ibettoh ngo Jahowa naing kipekèkè jelma si enggo matè lako nggelluh nola i babo tanoh èn.Jaka Job 14:14, 15.

2. Bakunè keadaen kalak si matè?

Dèbata mendokken mi si Adam, ”Itempa ngo ko i tanoh nai, janah kennah balik kembali tanoh.”1 MUSA 3:19.

Jelma itempa i tanoh nai. (1 Musa 2:7; 3:19) Jelma oda ngo perdemuen tendi dekket daging. Daging ngo kita, jadi oda lot bagian i dirinta si tong nggelluh tikki kita matè. Otak ta pè matè, janah oda lot nè si ta èngèt enggo kessa matè. Ingo alasenna oda ibagahken Lazarus kadè sambing si iakapi sinderrang ia matè, kumerna kalak si enggo matè oda nè satdar.Jaka Psalm 146:4; Perjamita 9:5, 6, 10.

Isiksa Dèbata ngo kalak si enggo matè i api? Bibèl mendokken mula kalak si enggo matè oda nè satdar. Ajaren palsu ngo api narakka i kumerna i peroha-rohaken Dèbata. Moyang kalohon ngo atè Dèbata mengidah peniksaen jelma ibas api janah i oda nung tubuh i pikirenNa.Jaka Jeremia 7:31.

 3. Boi ngo kalak si enggo matè kirana banta?

Kalak si enggo matè oda boi kirana manang pè memeggè. (Psalm 115:17) Tapi, lot malaèkat-malaèkat perjahat. Malaèkat-malaèkat i boi kirana mi kalak lako pekulah-kulahken dirina bagè jelma si enggo matè i. (2 Petrus 2:4) Jahowa menggerra kita kicuba-cuba kirana mi kalak si matè.Jaka 5 Musa 18:10, 11.

4. Isè ngo si naing ipegelluh?

Merjuta kalak si enggo matè naing balik ipegelluh i babo tanoh èn. Janah jelma si oda menandai Dèbata dekket si mengulaken salah pè naing ipekèkè.Jaka Lukas 23:43; Ulaan Apostèl 24:15.

Karina jelma si ipekèkè dapet kesempaten mersiajar kesèntengen tersèngèt Dèbata dekket percaya mi Jesus merkitè menguèisa. (Alamat 20:11-13) Karina jelma si ipekèkè dekket mengulaken si mendè lako dapetten nggelluh sidekah-dekkahna i babo tanoh èn.Jaka Johanes 5:28, 29.

5. Kadè si boi ta pelajari tersèngèt Jahowa i kekèkèn nai?

Jelma si enggo matè boi nggelluh nola kumerna Jesus enggo ipasulak Dèbata lako matè banta. Jadi, merkitè kekèkèn, boi ta akapi ngkelleng atè Jahowa dekket perukuren mendèNa. Tikki kalak si enggo matè ipekèkè, isè ngo si naing ijumpai Kènè?Jaka Johanes 3:16; Rom 6:23.