“Ámohka Isstohkanáísskonnátaʼpssiwa Naatóʼsiwa niʼtóhkaoʼka ohkanááʼpaistotoyiiwaiksi nínaiksi.”​—OHKÍNNÍÍNAAWA JOSEPH

Isskóóhtsika niitóksaawa 1879, ámohka Ohkínníínaawa Joseph ííhtsitápiwa ómiksi Komonóítsitapiikoaiksi amí Aamsskáápoohtsi stámiitapohtssawááhsiʼtakiwa áókakihtsimaiksi stámiitaaniiwa: “Nikáísistsikaatooʼpa iksísstoyiʼtsiiʼpówahsini. Nitsstámiitapohtsisttsisskini nitáakiitáísskáísskskaʼtsiiʼpi otohkanáísoksiʼpówahsoaawaistsi ki otssáwáísisapoʼkaatooʼsaawa otohkanáíksísttowahsiistsi.”

Ánnohk kanáómiaʼnistsíítsitapiikoaiksi aisstááyaawa mááhkóóhksstsímaahkaahsaawa ísstákaanaʼpssiyi. Ámohka áánistawa, Niʼtsínaawa ííhtsitápiwa ómiksi Pináápisinaikoaiksi áániiwa: “Nitsííkaaniiʼpa áíʼtoʼtoohsi akákkomaʼpiwa amá nínaawa maatáóhkottaawattsstakatohsiwa.”

Kítáóohkitstsiihpa ísstákaanaʼpssiwa áákohtsikamoʼtaokakihtsimatahsi ohkanáómiaʼnistsitapiiksi? Áa! Itstsííʼpa áakohkottsstákatawa Áʼpistotookiwa.

ÁMOHKA ÁÍSAPÁATOOMA OTSIʼPÓWAHSINI

Áʼpistotookiwa ákaiʼpówatsiiwa matápiyi, ki otsiʼpówahsiistsi iitssínaiiʼpiaawa anníhkayi sináákiaʼtsisi. (2 Timothy 3:16, 17) Ámohka sináákiaʼtsisi, anní Naatóysspikssínaakssini, iitsiksísttoyiwa otáaksskaoʼohkanayoohkíítaʼpissi áakitohkanamaaniiwa annóma ksááhkoma. (2 Peter 3:13) Ámohka iitáyáópiiwa sspóóhtsi máátáónawaisáyissksinima otsiksísttowahsiistsi. Iihtsííʼpoyiwaiksi ótsitápiimiksi: “Amá iyóómiwa aakííwa áaksstaoʼohkottohtssayiksimsstaawa ókoʼsi ááhkitssayikimmátahsinatahsi ohkóyi óhtoʼtstsiihpi óókoani? Ámoksska aakííksska áaksstamssawáttohkottsiksimsstaayaawa ókoʼsoaawayi, niistówa nimáátaaksoohkssayissksinoohpa.” (Isaiah 49:15) Ohkínníínaawa Joseph áániiwa: “Issksínimaʼtsootsspa ááhkitáómaiʼtakioʼsi amá Isstohkanáísskonnátaʼpssiwa Naatóʼsiwa ohkanáínima ki ohkanáyoohtsima niitáʼpaissoʼpi, ki máátáónawaisawattssksinima otsiʼpówahsini.”

Ámohka isstohkanáísskonnátaʼpssiwa Naatóʼsiwa ááwattsínihkatohsiwa iihtáwaaksistooyiʼtakioʼpa. Áanistawa “Jehovah, Áʼpistotookiwa ohkanaaʼpáístotsima annóma ksááhkoma.” (Isaiah 40:28) Otsínihkaʼsimi Jehovah anistápanissina “Ííhtáómatapaʼpiiwa.” Ííhtaanistsínihkaʼsimiwa otáakohkottaanistaʼpsspi otsstááhpi áákitohkottssapáatooma otsiksísttowahsiistsi. Tsá ámostsska otáánistaʼpaisspi Jehovah iihtssksíniiʼpa otsstákaanaʼpssi?

 TSÁ ÁAKOHTOHKOTTSSTÁKATAWA ÁʼPISTOTOOKIWA?

Áakomimmotsiiyssini: Annóma ksááhkoma ííhtsitstsiiwa Áʼpistotookiwa otáakomimmahsi matápiyi. Ámohka ohkínníínaawa, Geronimo, ííhtsitápiwa ómiksi Apache áániiwa: “Naatóʼsiwa nitóóhksiksistohsoyi, sopóí nitohtááwowohpapokoo ki miistsííksi nitohtáápiʼmaa niʼtóyi stsíkiiksi niitsitápipookaiksi. . . . Íímaikkamótoaʼpawaawahkainiki nitssákiomaanistáísokimmohsi.” Otawáakomimmahsaawa kanáómiaʼnistsíítsitapiikoaiksi ki kanáómiaʼnistoohkíítsitapiiksi Áʼpistotookiwa áakohtssapóówa otsiksísttowahsiistsi. Anní Naatóysspikssínaakssini iitssínaiiʼpi: “Jehovah ísokaʼpssiwa; otsiitáʼpáakomimmotsiiyssini áakomaanistsitaistsiiwa, ki otsstákaanaʼpssini kókoʼsoaawáyi ki otsíístapokoʼsoaawayi áakssaakiomaanistsitaistsiiwa.”​—Psalm 100:5.

“Iikáákaoyaawa kitáʼpoʼtakssiistsi, Áyao Jehovah! Kitohkanáókakisskskaʼtsiiʼpiaawa kitáʼpistotakssiistsi.”​—PSALM 104:24

Okakísskskáʼtakssini: Iikákayimmiaawa nínaiksi áísstaiksi mááhkóóhkaisspommoahsaawa ánniksi áíiyíkoosiiksi, nóóhkitáísskohpiʼyiyaawa okakísskskáʼtakssini ááhkitohkottssapáatooʼsaawa otssoksíksimsstaanoaawayi. Ki anní aanistáʼpoohtsi, Jehovah okakíssksinima ááhkaanistáótoiʼtsikatahsi kanáípaitapiiyiiksi. (Psalm 145:16) Áípoyiohkiaayowa, iihtohkínníínaawa ómiksi Dakotas, áániiwa: “Óma moʼtsísa áʼpistotsima annóma ksááhkoma ohkáttaʼpistotoyiiwa nínaawa ááhkiitsitaʼpaitapiiyssi otsitsípoʼtoahpi.” Anní Naatóysspikssínaakssini iitssínaiiʼpi: “Iikáákaoyaawa kitáʼpoʼtakssiistsi, Áyao Jehovah! Kitohkanáókakisskskaʼtsiiʼpiaawa kitáʼpistotakssiistsi. Annóma ksááhkoma stámohkanáínakoyaawa kitáʼpistotakssiistsi.” (Psalm 104:24) Áʼpistotookiwa otokakísskskaʼtakssini iihtsstámaanistáwaaksistooyiʼtakioʼpa otáakssisapoʼkaatooʼsi otaanistsiksísttowahsiistsi.

Ikámoʼtokákihtsimaani: Ohkínníínaawa Joseph áániiwa: “Ámohka Isstohkanáísskonnátaʼpssiwa Naatóʼsiwa niʼtóhkaoʼka ohkanááʼpaistotoyiiwaiksi nínaiksi.” Ki niʼtóhkaoʼka, ámohka isstohkanáísskonnátaʼpssiwa Naatóʼsiwa iksísttoyiwa otáaksikamoʼtokákihtsimatahsi ohkanáómiaʼnistsitápiiksi. Anní Naatóysspikssínaakssini ííhtsiʼpoyiyi Áʼpistotookiwa iitssínaiiʼpi: “Kanáíkamoʼtokákihtsimaaʼpssiwa.” (Deuteronomy 32:4) Máttsitsspáíʼtssinaiiʼpi, Áʼpistotookiwa “máátsiʼtsitstsiiʼpa otáísakakimmahpi, nóóhkitanistsiiwa kanáómiaʼnistoohkíítsitapiiksi áísakakimmiiwaiksi ikakoohkáísopoyaʼpsstónnoahsi ki ikakoohkáíiyikaʼkimaahsaawa maahkáíkamoʼtaʼpaisssaawa.” (Acts 10:34, 35) Áʼpistotookiwa otsikamoʼtokákihtsimaani iihtáwaaksistooyiʼtakioʼpa otáakssapáatooʼsi otsiʼpówahsini.

Isskonátaʼpiiyi: Tókskammiksi nínaiksi imakóóhkitáísoksimsstaahsayaawa nóóhkiitsitáísskohpiʼyiyaawa mááhkssopoksínaanssaawa isskonátaʼpiiyi mááhkohtsitáísspommoahsaawa matápiyi. Áʼpistotookiwa nóóhkssayitáísskohpiʼyiwa. Ánniksi kakatóʼsiiksi ííhtsiʼpoyiwaiksi: “Kááksspssámmissaawa. Takáa áʼpistotóyiiwaiksaawa? Ánnahka aomóípiyiwaiksi iikáákayimmiaawa ómiksi kakatóʼsiiksi ohkanáóksiiwaiksi, ki óhkanainihkatsiiwaiksi. Otsskáíʼsopoksskonátaʼpssi, ki otsstonátsskonátaʼpssi,  máátsitstsiiʼpi iisainákoyiima ómiksi kakatóʼsiiksi.” (Isaiah 40:25, 26) Otsskáíʼsskonátaʼpssi Áʼpistotookiwa stámohtsiʼtoohkáínakowa otsstákaanaʼpssini áakssaakitáístsiiwa áíʼtoʼtstsíssi otsiʼpówahsini otáakaanistsissaawa.

Áʼpistotookiwa otánistápitapiihpi iihtáwaaksistooyiʼtakioʼpa otáakssapáatooʼsi otsiksíssttowahsiistsi. Isskóóhtsika ámohka Isttsíípihkinníínaawa áánistawa Solomon áániiwa: “Máátomaikákitsskohpiʼyii niʼtóksskaayi otsiʼpówahsini aakiitsitáʼpaaniiwa ámoistsi sokáʼpiistsi otsiksíssttowahsiistsi.”​—1 Kings 8:56.

TSÁ ANISTÁPIIWAISTSAAWA ÁʼPISTOTOOKIWA OTSIKSÍSSTTOWAHSIISTSI?

Áʼpistotookiwa, Jehovah, iitsípoʼtoyiiwa ohkóyi, Jesus, áákitáínawaʼsatahsi ohkanáómiaʼnistsitapiiksi áákitáíkamoʼtaokakihtsimaattsiwaiksi. Jehovah áániiwa: “Kippssámmis! Áma nitáʼpoʼtomooka, ánnayi nitoʼtssátsinnawa! Ánnayi nitóʼtoawa, stámssokimmawa! Nítohkotawa náátoysskonátaʼpiiyi. Ikámoʼtokákihtsimaani áakitapipohtooma ohkanáómiaʼnistsitapiiksi.” (Isaiah 42:1) Jehovah ámohka iitsípoʼtoyiiwa Ohkínníínaawa áakohkáttsspommoyiiwaiksi ómiksi áíyíkiʼtakiiksi. Ánnohk ááhkkippohtokstakioʼpa Jesus: “Áaksikamotsíípiiwa ohkóíksi ómiksi ikímmataʼpssiiksi, ki aakitssáóppisskoyiyiiwa annáhka awááttsiistotakiwa. . . . Áaksikamotsíípiiwa anní áínihkátsimaayi ikímmataʼpssiyi, ki óma áíiyíkoosiwa ki óma máátohkoisspómmoaawa.”​—Psalm 72:4, 12.

Áʼpistotookiwa otáíʼsttsitsaaʼpistotsissi annóma ksááhkoma niitáʼpistotsima anní ikkínaaʼpiiyi matsowáʼpiʼnssimaani. Áakoʼtssátaʼpiiwa otsitáakssopókitstsissi otssókitsiihtaanistsi. Anní Naatóysspikssínaakssini iitssínaiiʼpi: “Áakohkanáíssaapiniwaiksi ómiksi áwaasaiʼniiksi, ki iʼnssíni máátáakattsitstsiiʼpi, tsááhtaoʼ óyiʼtsaʼpssiiksi tsááhtaoʼ áípiwasaiʼniiksi tsááhtaoʼ ísttsohkoiksi. Ámostsska máátáaksitaistsiiyaawa.” Kitáaksstaoʼohkottsstákatooʼpa Áʼpistotookiwa otsiksíssttowahsiistsi? Áʼpistotookiwa áániiwa: “Ámoistsi iʼpówahsiistsi isstákaanaʼpiiyaawa ki níítsiiyaawa.”​—Revelation 21:4, 5.

 ISSTÁKATOOT ÁʼPISTOTOOKIWA OTOKÁKISSKSKAʼTAKSSINI

Jehovah áániiwa: “Kaakóóhkayisstsiiwatoommiiniki nitokákihtsimaanistsi! Kiánnikayi kitsíkkinaaʼpssini áakitaanistsinááttsiiyi anní niítahtaani ki kitsikámoʼtaʼpssini áakitaanistáóhpaiʼkimsskaayi anní ómahksíkimiyi.” (Isaiah 48:18) Áʼpistotookiwa ohtóʼtstsiiwa kitááhkssksinissi ísstohkanáísokaʼpiiwa kitááhkaanistáípaitapiiyssi. Ikkámáókakisskskaʼtsimmiiniki anní Naatóysspikssínaakssini, kitáakattohkottssksiniiʼpa Áʼpistotookiwa otáanistáísokitsiihtaahsi matápiyi, ki kááhkaanistáíniʼstotoahsi stsíkiiksi, ki kááhkaanistáíʼtaamaʼpsspi.​—Micah 6:8; Luke 6:27-31; 11:28.

Kimaakáípahkohkoyiyaawa sokáʼpssiiksi matápiyi? Áíkiaʼpiiwa áíʼnioʼki? Ki áaksstaoʼohkottssksipáítapiiyaawa ómiksska áakáíʼniiksska? Ámoistsi iiyíkoistsi sopówahtsiʼsiistsi matápiyi máátáóhkottoyiʼtsimiaawa Áʼpistotookiwa nóóhkohkottohtsikamoʼtsiʼpoyiwaistsi.

Áʼpistotookiwa otánistápitapiihpi stámiʼtóóhkainakowa otsstákaanaʼpssi. Otáwaakomimmahsi matápiyi kitóóhksstááhpa kitááhkssáakohkoissksinoahsi? Issksínoyiiksi Áʼpistotookiwa Jehovah áakaahsiʼtakiyaawa kitááhkaiʼstamáttsiyissi kitááhkaanistsikamoʼtssksinissi anní Naatóysspikssínaakssini. “Isstákatsis Jehovah ki ístotsit sokáʼpiiwa . . . Kitááhksstamoksistsiʼtsiiʼpa kitááhkáótoomipoʼtoahsi Jehovah, ki kitáakitohkokka kitáókamaniihpistsi ohtóʼtstsiistsi kósskitsipahpi.”​—Psalm 37:3, 4.