Ẹo. Avbe Osẹe Jehova yayi wẹẹ, Osanobua ẹre ọ yi emwi hia. Sokpan, ma ma yayi wẹẹ ikpẹdẹ ehan nọ mwẹ ughaẹdẹ enẹ yan ugie, ẹre Osanobua loo ro ya yi emwi hia. Vbọzẹ ne ima ma na ya ọna yi? Rhunmwuda, iyayi na, ma gua ẹmwẹ nọ rre Baibol ro. Gia ghee igiemwi eva na:

1.   Vbene ikpẹdẹ ehan ne Osanobua ya yi emwi hia gele tan sẹ hẹ. Emwa ni bun yayi wẹẹ, dọmwadẹ ẹdẹ vbe uwu ikpẹdẹ ehan ne Osanobua ya yi emwi hia keghi mwẹ ughaẹdẹ enẹ yan ugie kẹkan. Sokpan, deghẹ e Baibol na guan kaẹn ikpẹdẹ ra “ẹdẹ,” ọ sẹtin mudia ye ihe ẹghẹ nọ taẹn vbe otọ.​​—Gẹnẹsis 2:4; Psalm 90:4.

2.   Inu ukpo nọ ye na ghi ya yi agbọn na. Emwa ni bun ma emwa re wẹẹ, odẹ ukpo arriaisẹn eso, ẹre uhunmwu otagbọn na ye. Vbọrhirhighayehẹ, zẹvbe ne Baibol ya gie ẹre, uhunmwu otagbọn na kevbe emwi hia ni rre ideghedeghe vbe orere iso rrọọ nẹ, vbene ọ te sẹ ikpẹdẹ ehan ne Osanobua ya yi emwi hia. (Gẹnẹsis 1:1) Rhunmwuda ọni, Avbe Osẹe Jehova i gbodan ghee emwi ne avbe umẹwaẹn gualọ otọ re miẹn nọ ghi ya iran kha wẹẹ, ne uhunmwu otagbọn na ke rrọọ gha sẹ odẹ ukpo uye (billion) ni bun.

 Agharhemiẹn wẹẹ, ma ne Avbe Osẹe Jehova yayi wẹẹ, Osanobua ẹre ọ yi emwi hia, ma i gbodan ghee imamwaemwi ọghe avbe umẹwaẹn. Ma yayi wẹẹ, emwi ne avbe umẹwaẹn gualọ otọ re miẹn ni re ẹmwata kevbe ẹmwẹ ni rre uwu e Baibol gua egbe ro.