Nokaro Na Gbẹn Gie Ivbi E Kọrint 5:1-13

  • Uyinmwẹ alama oghẹ nọ rhiegbe ma vbe uwu iko (1-5)

  • Eyist kherhe na rhie ye eflawa na fuẹn yotọ, ẹre ọ ya ehia hue (6-8)

  • Ọ khẹke na kan ọmwa dan hin uwu iko rre (9-13)

5  I họn ẹmwẹ alama oghẹ* nọ rhiegbe ma vbe uwu ẹbu uwa, ọghe okpia ọkpa ne irẹn vbe amwẹ erhae gba rrọọ.* Emwa ni rre uwu agbọn i kue vbe yin egbe uyinmwẹ alama oghẹ* vberriọ.  Te uwa ghọghọ ye ọviẹviẹ na ra? Ẹ i re te ọ khẹke ne uwa gha khiẹ, ne uwa rhie okpia nọ ru a i ghẹ ru na, hin uwu ẹbu uwa rre ra?  Agharhemiẹn wẹẹ I i gu uwa rre evba, orhiọn mwẹ gu uwa rre evba; I vbe bu ohiẹn okpia nọ ru a i ghẹ ru na nẹ, vbene a miẹn wẹẹ I gu uwa rre evba.  Adeghẹ uwa na si egbe koko vbe eni Enọyaẹnmwa e Jesu, vbene uwa na rẹn wẹẹ orhiọn mwẹ* kevbe ẹtin Enọyaẹnmwa e Jesu gu uwa rre evba,  wa ghi rhie okpia vberriọ ne Setan, na mieke na fuẹn ikinnegbe nii rua, ne emwi rhọkpa ghẹ mieke na mu orhiọn emwa ni rre iko rhia vbe ẹdẹ Enọyaẹnmwa.  Ọ ma khẹke ne uwa gha rhuọ. Wa ma rẹn wẹẹ, eyist kherhe na rhie ye eflawa na fuẹn yotọ, ẹre ọ yae hue ra?  Wa rhie eyist nẹdẹ hin ehe ne uwa ye rre, ne uwa mieke na do yevbe eflawa ọghe ọgbọn na fuẹn yotọ, ugbẹnvbe a miẹn wẹẹ, wa i ghi mwẹ eyist vbe egbe. Rhunmwuda, a ya e Kristi ne oteghe ohuan Alagberra ọghe ima zọ ese ne ima nẹ.  Nọnaghiyerriọ, wa ghẹ gi ima ya eyist nẹdẹ, ra eyist emwi dan kevbe ọkhọ do ugie, sokpan, wa gi ima loo ebrẹd ẹkoata kevbe ebrẹd ẹmwata na ma ya eyist ru ya do ugie.  Vbe ebe ne I gbẹn gie uwa, I na tama uwa wẹẹ, ne uwa ghẹ ghi gu emwa ni mwẹ obọ vbe alama oghẹ* mu obọ. 10  Ẹ i re te I ya ọna kha wẹẹ, ne uwa wa gban egbe ne iran fo fẹfẹfẹ ighẹ iran ni rre uwu agbọn ni gbe alama oghẹ,* ra ni re emwa arovbẹmwẹ, ra ni khiẹn ọmwa obọ miẹn ọmwa emwi, ra ni ga ẹbọ. Rhunmwuda, ọ ghaa yerriọ, ọni rhie ma wẹẹ, te uwa khian wa kpa hin agbọn na rre fẹfẹfẹ. 11  Sokpan, te imẹ ghi gbẹn ebe gie uwa nian, ne uwa ghẹ ghi gu ọmwaikọmwa na ghi rẹn ye ọtẹn nẹ, nọ mwẹ obọ vbe alama oghẹ* mu obọ, ra nọ re ọmwa arovbẹmwẹ, ra ọmwa nọ ga ẹbọ, ra ọmwa nọ ya unu rhia ọmwa,* ra ọmwa nọ da ayọn gbe egbe, ra ọmwa nọ khiẹn ọmwa obọ miẹn ọmwa emwi; wa ghẹ kue gu ọmwa vberriọ rri evbare. 12  Vbọ ghi kaan mwẹ kaan emwa ni rre uwu agbọn, ne I khian na gha bu ohiẹn iran? Ẹ i re emwa ni rre uwu iko, ẹre ọ khẹke ne uwa gha bu ohiẹn ọnrẹn ra, 13  ne uwa sẹ emwa ni rre uwu agbọn rae, ne Osanobua bu ohiẹn iran? “Wa rhie ọmwa dan hin uwu ẹbu uwa rre.”

Avbe Futnot

Vbe Grik, por·neiʹa. Ya ghee Glọsrri.
Vbe Grik, “nọ rhie amwẹ erhae.”
Vbe Grik, por·neiʹa. Ya ghee Glọsrri.
Ra “ekhọe mwẹ.”
Ya ghee Glọsrri, “Alama oghẹ.”
Ya ghee Glọsrri, “Alama oghẹ.”
Ya ghee Glọsrri, “Alama oghẹ.”
Ra “ọmwa nọ ta ẹmwẹ ihẹn.”