Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

 IRUẸMWI 12

Ovbie tien e pol nokpia Wa Gha Mwẹ Udinmwẹ

Ovbie tien e pol nokpia Wa Gha Mwẹ Udinmwẹ

Gia ruẹ vbekpae ọvbokhan okpia ọkpa nọ miẹn arrọọ ọghe ọtien erhae fan. Ọtien erhae keghi re ukọ Pọl. Ma ma rẹn eni ọghe ọvbokhan okpia na, sokpan ma rẹnrẹn wẹẹ, ọ ru emwi nọ wa kakabọ gualọ udinmwẹ. U hoo nu rẹn vbekpae emwi nọ ru ra?—

E Pọl kegha rre eghan vbe Jerusalẹm. A keghi muẹn khui rhunmwuda ọ ghaa kporhu vbekpae Jesu. Emwa dan eso kegha khẹko e Pọl, rhunmwuda ọni, iran na khuan khọ re. Iran na kha wẹẹ: ‘Gia tama ọka iyokuo wẹẹ, ne ivbiyokuo ẹre mu e Pọl gha die owa ẹzọ. Ma ghi lẹre ye odẹ. E Pọl ghaa dee, ma ghi gbẹrua!

Ovbie ọtien e Pọl nokpia tama e Pọl kevbe ọka iyokuo vbekpae ne emwamwa dan

Ovbie ọtien e Pọl nokpia keghi họn vbekpae emwamwa na. De emwi nirẹn khian ghi ru? Ọ na bu e Pọl gha rrie eghan ya tama rẹn. Vbobọvbobọ, e Pọl na tama rẹn wẹẹ, nọ khama ọka iyokuo vbekpae emwamwa dan na. Wẹ roro ẹre wẹẹ, ọ wa khuẹrhẹ ne otien e Pọl nokpia ya gu ọka iyokuo guan ra?— Ẹn o, rhunmwuda, ne ọka iyokuo kegha re okpọmwa. Sokpan ovbie otien e Pọl nokpia kegha mwẹ udinmwe, ọ na gue ne ọka iyokuo guan.

Ne ọka iyokuo wa rẹn emwi nọ khẹke nọ ru zẹẹ. Ọ na sie ivbiyokuo nọ kẹ ekherhe nọ gba vbe 500 koko niran mudia ne Pọl, ne obọ ghẹ vba re! Ọ na tama iran, ne iran rhie Pọl gha rhie Sisaria vbe asọn nii. A miẹn arrọọ ọghe Pọl fan ra?— Ẹẹn, obọ emwa dan nii ma vba re! Emwamwa dan niran mwamwaẹn ma dunna.

De emwi nu gha miẹn ruẹ vbe okha na?— Wẹ gha vbe sẹtin gha mwẹ udinmwẹ vbene a ghe ovbie ọtien e Pọl nokpia. Ọ khẹke ne ima gha mwẹ udinmwẹ vbe ima gha gu emwa ọvbehe guan vbekpae Jehova. Wẹ gha sẹtin gha mwẹ udinmwẹ nu mieke na sẹtin gha gu emwa guan vbekpae Jehova ra?— U gha ru vberriọ, u gha sẹtin miẹn arrọọ ọghe ọmwa ọvbehe fan.

TIẸRE VBE BAIBOL RUẸ