Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

 IRUẸMWI 2

E Rebeka Ghaa Hoo Nọ Ye Ẹko Rhiẹnrhiẹn E Jehova

E Rebeka Ghaa Hoo Nọ Ye Ẹko Rhiẹnrhiẹn E Jehova

E Rebeka kegha re okhuo nọ hoẹmwẹ e Jehova. Eni ọdafẹn ọnrẹn kegha re Aizik. Ọ vbe hoẹmwẹ e Jehova. De vbene Rebeka ya miẹn Aizik hẹ? De vbene irẹn ya rhiẹre ma h wẹẹ, irẹn hoo nirẹn ye ẹko rhiẹnrhiẹn e Jehova? Gia ruẹ sayọ vbekpa re.

Erha vbe Iye ọghe Aizik kegha re Ebraham kevbe Sera. Otọ ọghe Kena ẹre iran ghaa ye. Ivbie ẹvbo nii, ma rẹn e Jehova. Sokpan Ebraham kegha hoo ne ovbiẹre rhie okhuo nọ ga e Jehova. Rhunmwuda ọni, ọ na gie ọguọmwadia ọghẹe, ughaghe Ẹlieza ẹre ọ gie nọ ya gualọ okhuo ne Aizik vbe ẹvbo na tie Heran, ehe ne ẹgbẹe ọghe Ebraham eso ye.

Rebeka wa ye ekhọe hia miẹn ẹsọn ya sa amẹ ne avbe ekẹtẹkẹtẹ

Ẹlieza kevbe eguọmwadia ọvbehe ọghe Ebraham keghi mu okhian gha rhie ẹvbo nii. Ẹvbo nii wa rre. Ekẹtẹkẹtẹ igbe ẹre iran ya kun evbare kevbe emwi izọhẹ lele egbe. De vbene Ẹlieza khian ya rẹn hẹ, okhuo nirẹn khian zẹ ne Aizik? Vbe ẹghẹ ne Ẹlieza kevbe eguọmwadia ni lelẹe ghi ya se Heran, iran keghi mudia ye ọkpẹn uhae ọkpa, rhunmwuda Ẹlieza rẹnrẹn wẹ, emwa gha rherhe do sa amẹ vba. Ọ na ghi na erhunmwu gie Jehova wẹẹ: ‘adeghẹ I na tama ọvbokhan okhuo ọkpa nọ sa amẹ mẹ, ọ na gele sa amẹ mẹ, kevbe ọ na vbe sa ne avbe ekẹtẹkẹtẹ mwẹ, I ghi rẹn wẹ, ọni ọre ne okhuo nu zẹ.’

ghẹ nii, ẹre Rebeka ne ovbialeke na gha die uhae. E Baibol khare wẹẹ, ọ wa mose  ẹsẹsẹmwẹse. Ẹlieza keghi tama rẹn nọ sa amẹ nirẹn wọn. Ẹre ọ na kha wẹẹ: ‘Ọma I gha sa amẹ nuẹn, I gha vbe sa nẹ avbe ekẹtẹkẹtẹ ruẹ.’ Wa muẹn roro! Avbe ekẹtẹkẹtẹ ne ovbamẹ gbe keghi wọn amẹ nọbun, rhunmwuda ọni, te Rebeka wa gha lẹ yo lẹ rre balọ amẹ ladian vbe uhae. Ma bẹghe ẹre vbe efoto na, vbe nọ kakabọ winna hẹ?Ọ keghi wa yan Ẹlieza unu ruan vbene Jehova ya họn erhunmwu ọghẹe.

Ẹlieza keghi kun emwi izọhẹ ne mosee nibun ne Rebeka. Ọ na ghi kue ne Ẹlieza kevbe eguọmwadia ni lelẹe rre gha die owa ọghe erhae. Ẹlieza na rhan otọre evbọzẹ ne Ebraham na gie irẹn gha dee, kevbe vbene Jehova ya họn erhunmwu ọghe irẹn hẹ. Ẹgbẹe ọghe Rebeka wa ye oghọghọ kueyọ nọ rọnmwẹ Aizik.

E Rebeka lele Ẹlieza gha rhie Kena, ọ na ya rọnmwẹ Aizik

Sokpan uwẹ roro ẹre wẹẹ e Rebeka hoo nọ rọnmwẹ Aizik ra?E Rebeka rẹn wẹẹ, e Jehova ẹre ọ gie Ẹlieza rre. Rhunmwuda ọni, vbe ẹgbẹe ọghe Rebeka ghi nọ rẹn degh ọ gha yo otọe Kena nọ ya rọnmwẹ Aizik, ọ keghi kha wẹẹ: ‘Ẹẹn, I gha yo.’ Ọwarọkpa ni, ọ na lele Ẹlieza kpa. Iran ghi sẹ e Kena, ọ na ghi rọnmwẹ Aizik.

Rhunmwuda wẹẹ, e Rebeka ru emwi ne Jehova hoo nọ ru, e Jehova na ghi fiangbẹe. Vbe ukpo nibun ghi gberra nẹ, a keghi do bie Jesu ye uwe ẹgbẹe nọ ke uniẹn ọghe Rebeka rre! Adeghẹ u na yegbe ta e Rebeka kevbe u na ye ẹko rhiẹnrhiẹn e Jehova, ọ gha vbe fiangbuẹ.

TIẸRE VBE BAIBOL RUẸ

  • Gẹnẹsis 12:4, 5; 24:1-58, 67