Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

 IRUẸMWI 6

E Devid Ma Gha Mwẹ Imuohan

E Devid Ma Gha Mwẹ Imuohan

Vbua khian ru vbe ohan ghaa mu ruẹ?— Egbọre u ghi rhulẹ bu iyuẹ ra erha nọ ru iyobọ nuẹ. Sokpan ọmwa ọvbehe vbe rrọọ nọ gha vbe sẹtin ru iyobọ nuẹ. Ọ mwẹ ẹtin sẹ ọmwa nọ rhirhi gha khin. Wẹ rẹn ọmwa nọ khin ra?Ẹẹn, Osanobua ne Jehova nọ. Gima guan kaẹn ọvbokhan okpia ọkpa vbe Baibol na tiẹre Devid. Ọ rẹnrẹn wẹẹ, e Jehova gha ru iyobọ nẹ vbe ẹghẹ ke ẹghẹ, rhunmwuda ọni ọ ma gha mwẹ imuohan.

Ke ẹghẹ ne Devid ya gha re ọmobọ, ẹre erhae vbe iyẹ ya ma re nọ hoẹmwẹ e Jehova. Ọna keghi ru iyobọ ne Devid ne ohan ghẹ muẹn, uhiẹn deghẹ emwi nọ sie ohan na sunnu da re. Ọ rẹnrẹn wẹẹ ọse ọghẹe ẹre Jehova khin, kevbe wẹẹ, ọ gha ru iyobọ nẹ. Vbe ẹdẹ ọkpa, vbe ẹghẹ ne Devid ya gha su avbe ohuan ọghẹe eso, oduma nọkhua na vin rre, ọ na ye unu ẹrẹn gu ọkpa rrie vbe avbe ohuan nii! Wẹ rẹn emwi ne Devid ru ra? Ọ na zẹ oduma ni khu, ọ na ye obobọ gbẹ rua! Vbe ẹghẹ ọvbehe ne akpakomiza na vbe hẹ rhuẹ avbe ohuan ọghẹe, e Devid na vbe gbẹ rua! De ọmwa ne uwẹẹ roro ghẹ ọ ru iyobọ ne Devid?Ẹẹn, e Jehova nọ.

Ẹghẹ ọvbehe vbe gha rrọọ ne Devid na wa kakabọ din. Ivbie Izrẹl kegha gu ivbie ẹvbo na tiẹre Filistin khọn. Ọkpa vbe usun ẹn iyikuo ọghe ivbie Filistin kegha re okpia nọ wa kakabọ zogọ, arhuanran wa ghaa nọ! Eni ẹnrẹn ọre Golaiat. Arhuanran na kegha ye iyokuo ọghe ivbie Izrẹl kevbe Jehova gbogiẹ. Golaiat keghi tama ivbiyokuo ọghe ivbie Izrẹl wẹẹ, deghẹ iran mwẹ udinmwẹ, we ne iran gha de do gu irẹn gbinna. Vbe Devid ghi họn ẹmwẹ na, ọ na tama Golaiat: ‘I gha gu ruẹ gbinna! E Jehova gha ru iyobọ mẹ, te I khian gbuẹ rua!’ Wẹ roro ẹre wẹẹ, e Devid ghaa mwẹ udinmwẹ ra?Ẹẹn, ọ wa ghaa mwẹ udinmwẹ kakabọ. Wẹ hoo nu rẹn emwi nọ ghi sunnu ra?

E Devid keghi rhie umọvọn rẹn kevbe ikpokuta isẹn ne miọghọn, ọ na bue ne arhuanran ya guẹ gbinna. Vbe Golaiat ghi bẹghe wẹẹ ọvbokhan kherhe ẹre Devid khin, ọ na gha yae gbogiẹ. Sokpan e Devid na tama rẹn wẹẹ, ‘u rhie umozo mwẹ obọ bu mwẹ gha de, sokpan eni ọghe Jehova ẹre I ya bu ruẹ dee!’ Ẹre ọ na ghi rhie ikpokuta ọkpa ye umọvọn rẹn, ọ na rhulẹ bue Golaiat kevbe wẹẹ, ọ na ye ne umọvọn fi ikpokuta nii gbẹe. Ne ikpokuta na wa ya vba Golaiat vbe  uharo! Ne arhuanran na de gbotọ, ọ na wu! Orhirhi na wa gbekue ivbie Filistin sẹrriọ wẹẹ iran na lẹfua. De vbene ọvbokhan kherhe vbene Devid ye, ya sẹtin gbe arhuanran rua hẹ?E Jehova ẹre ọ ru iyobọ nẹ, kevbe wẹẹ e Jehova wa mwẹ ẹtin sẹ arhuanran nii ẹsẹsẹmwẹse!

Devid ma gha mwẹ imuohan rhunmwuda ọ rẹnrẹn wẹẹ, e Jehova gha ru iyobọ nẹ

De emwi nu gha miẹn ruẹ vbe okha ọghe Devid?E Jehova mwẹ ẹtin sẹ ọmwaikọmwa. Kevbe wẹẹ, ọse ruẹ ẹre nọ. Rhunmwuda ọni ẹghẹ ne ohan gha werriegbe ya muẹn, yerre wẹẹ, e Jehova gha ru iyobọ nuẹ nu gha mwẹ udinmwẹ!

TIẸRE VBE BAIBOL RUẸ