Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

 IRUẸMWI 94

Orhiọn Nọhuanrẹn Tuorre Yan Avbe Erhuanegbe Jesu

Orhiọn Nọhuanrẹn Tuorre Yan Avbe Erhuanegbe Jesu

Vbe ọ ghi rre ikpẹdẹ igbe ne Jesu kpa gha rrie ẹrinmwi, orhiọn nọhuanrẹn keghi tuorre yan erhuanegbe ẹre. Ẹdẹ e Pẹntikọst ghaa nọ vbe ukpo 33 C.E. Emwa keghi ke ẹvbo ughughan rre do do Ugie Pẹntikọst vbe Jerusalẹm. Avbe erhuanegbe Jesu ni re odẹ 120 keghi si egbe koko vbe ughugha nọ rre egedege ọkpa. Emwi ọyunnuan na wa sunu vbe udemwurri. Emwi nọ yevbe na ghee erhẹn kegha rre uhunmwu dọmwadẹ erhuanegbe ni rre ughugha nii. Iran na suẹn gha zẹ urhuẹvbo ughughan. Emwa kegha họn owogho nọ yevbe na ghee ọghe ogbigbi ẹhoho, vbe owa ne avbe ukọ ghaa ye.

Erhunmwuyẹn ni ke ẹvbo ọvbehe rre, ghi họn owogho nii, iran keghi rhulẹ gha rrie owa nii, ne iran ghee emwi nọ sunu. Te ọ wa kpa iran odin vbe iran ghi bẹghe ẹre wẹẹ, avbe erhuanegbe Jesu zẹ urhuẹvbo ọvbehe. Ẹre iran na ghi kha wẹẹ: ‘Ẹi re Ivbi e Galili ẹre iran na khin? Vbọsiẹ ne iran na ghi zẹ urhuẹvbo ọghe ima?’

Ẹre Pita kevbe avbe ukọ nikẹre na ghi mudia vbe odaro emwa ni  gbẹbu nii. E Pita keghi rhan otọre ma iran vbene Jesu ya wu hẹ kevbe vbene Jehova ya huẹn ọnrẹn kpaegbe hẹ. Ọ na vbe tama iran wẹẹ: ‘Jesu rre oberhọmwa ọghe Osanobua vbe ẹrinmwi nia. Irẹn ẹre ọ gie orhiọn nọhuanrẹn ọghe Osanobua nọ tuorre yan ima zẹvbe ne ọ yan rẹn. Ọna ẹre ọ si ẹre ne uwa na bẹghe emwi ọyunnuan na hia.’

Ẹmwẹ ne Pita tae keghi wa mu iran ekhọe. Iran na ghi gha nọ wẹẹ: ‘Vbe ima khian ghi ru nia?’ E Pita keghi tama iran wẹẹ: ‘Wa fiwerriẹ vbe orukhọ ọghe uwa, ne uwa dinmwiamẹ vbe eni Jesu. Ẹghẹ nii, Osanobua ghi ya orhiọn nọhuanrẹn ọghẹe we uwa.’ Orhunmwu 3,000 ẹre ọ dinmwiamẹ vbe ẹdẹrriọ. Ke ẹghẹ nii kpa, erhuanegbe Jesu kegha muan yọ muan yọ vbe Jerusalẹm. Lekpae iyobọ orhiọn nọhuanrẹn, avbe ukọ kegha mu iko ughughan gbọ, ne iran mieke na sẹtin gha maa iran emwi ighẹ emwa ni do khian erhuanegbe, zẹvbe ne Jesu vbe maa iran re.

“Deghẹ uwẹ ye akhuarhamwunu ruẹn tae wẹẹ, ‘Nọyaẹnmwa ọre Jesu khin,’ u na vbe yayi vbe ekhọe ruẹ wẹẹ, Osanobua huẹn ọnrẹn hin idin rre, u gha re ne a miẹnfan.”—Rom 10:9