Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

A Dia Egbe Ọmwa—Akpa Nọ Khẹke Ne Ima Gha Mwẹ Ne Ima Mieke Na Ya Ẹko Rhiẹnrhiẹn E Jehova

A Dia Egbe Ọmwa—Akpa Nọ Khẹke Ne Ima Gha Mwẹ Ne Ima Mieke Na Ya Ẹko Rhiẹnrhiẹn E Jehova

“Vbe imẹ vbe ọtẹn mwẹ ne ima gba re ihiẹnhiẹn ghi gha muan ẹmwẹ vbe ẹdẹ ọkpa, I na wa ya obọ da re ẹho yi, I na gha piẹn ọnrẹn. I na te gha hoo ne I gbe ẹre rua.”—Paul.

“Emwi kherhe ke sunu vbe owa, I mu ohu nẹ, uhiẹn emwi nọ ma sẹ emwi ẹre ọ mu mwẹ ohu. I ghaa mu ohu nẹ, emwi ne obọ mwẹ rhirhi vba, I ghi zaghae rua, uhiẹn ya sẹ egbe emwi ne ivbi mwẹ ya ku.”—Marco.

A sẹtin miẹn wẹẹ, ima ma he ka ru emwi ne Paul vbe Marco ru. Ọrheyerriọ, ọ keghi lọghọ vbe ugbẹnso ne ima sẹtin dia egbe ima. Emwi nọ si ẹre nọ na mobọ ye vberriọ ọre wẹẹ, te ima hia rri orukhọ vbe ukhu vbe obọ Adam. (Rom 5:12) Vbe na ghee Paul vbe Marco ne ima sunu yi ban, ọ keghi lọghọ emwa eso, ne iran sẹtin dia egbe iran vbe ohu ghaa mu iran. Isievẹn ne eso werriẹ aro daa ọre ne iran sẹtin dia iziro ọghe iran. Vbe igiemwi, emwi nọ ya ohan mu iran ra emwi nọ gbe orhiọn ye iran iwu, ẹre iran mu roro vbe ẹghẹ hia. Eso vbe rrọọ nẹi sẹtin dia egbe iran vbe ọ gha de ọghe ayọn na da gbe egbe, ikpẹ ukhunmwu na loo ghee ihan kevbe alamoghẹ.

Emwa nẹi sẹtin dia egbe iran ra iziro ọghe iran keghi si ọlọghọmwa gie egbe iran. De emwi nọ gha ru iyobọ ne ima, ne egbe emwi vbenian ghẹ sunu daa ima? Ọ khẹke ne ima hia ne ima gha dia egbe ima. Ne ima mieke na sẹtin ru ọna, gi ima ziro yan inọta eha: (1) Vbọ re a dia egbe ọmwa? (2) Vbọzẹe nọ na khẹke ne ima gha mwẹ akpa na? (3) De vbene ima khian ya gha mwẹ akpa na hẹ, nọ re ọkpa vbe usun akpa ne orhiọn nọhuanrẹn ya ọmwa mwẹ? (Gal 5:22, 23) Ma gha vbe ziro yan emwi ne dọmwadẹ ima gha ru, deghẹ ọ na gha lọghọ ima vbe ugbẹnso ne ima rhie akpa na ma.

VBỌ RE A DIA EGBE ỌMWA?

Ọmwa nọ dia egbe ẹre, keghi re ọmwa nẹi wa ru emwi vbene egbe ya gua ẹre kpa. Ọmwa vbenian keghi hia nẹ ghẹ ta ẹmwẹ, ra nẹ ghẹ ru emwi nọ gha sọnnọ Osanobua.

Igiemwi ọghe Jesu ya ima rẹn emwi ne a dia egbe ọmwa gele demu

Igiemwi ọghe Jesu ya ima rẹn emwi ne a dia egbe ọmwa gele demu. E Baibol khare wẹẹ: “Ugbẹnvbe a tie ihẹn nẹẹn, ọ ma tie ha osa. Ugbẹnvbe ọ rri oya, ọ ma ya obọ sekhae ne ọmwa rhọkpa, sokpan, ọ keghi wa mu idaehọ ẹre hia yan Osanobua, ọmwa nọ bu ohiẹn nẹi bu eku.” (1 Pit 2:23) Jesu keghi dia egbe ẹre, vbe ẹghẹ ne eghian na gha yae gbogiẹ vbe ọ rre erhan irrioya. (Mat 27:39-44) Ọ te sẹ ẹghẹ na kha na, Jesu keghi dia egbe ẹre vbe ẹghẹ ne avbe ọkaolotu ugamwẹ ya gha nọ rẹn avbe ọta ohoghe, ne iran ya gualọ ẹmwẹ ne unu ẹnrẹn. (Mat 22:15-22) Igiemwi esi ẹre Jesu rhie yotọ ne ima, vbe ẹghẹ ne Ivbi e Ju eso na gha filo ugbe gbe ẹre. Ne Jesu gha te ya rria ikhi ne egbe ẹre, ọ na “rhie egbe lẹre, ọ keghi kpa vbe Ọgua Osa rre.”—Jọn 8:57-59.

Ọ khẹke ne ima hia ne ima gha lele igiemwi ọghe Jesu. Ukọ e Pita khare wẹẹ: “E Kristi tobọ ẹre rri oya, ọ keghi rhie igiemwi ne uwa wẹẹ, ne uwa gha lele ukpowẹ irẹn.” (1 Pit 2:21) Agharhemiẹn wẹẹ, emwa ni ma gba ẹre ima khin, ma gha sẹtin ya egbe tae Jesu vbe odẹ nọ ya gha dia egbe ẹre. Vbọzẹe nọ na khẹke ne ima ru vberriọ?

VBỌZẸE NỌ NA KHẸKE NE IMA GHA DIA EGBE IMA?

Ma ghaa hoo ne ima ya ẹko rhiẹnrhiẹn e Jehova, ọ khẹke ne ima gha dia egbe ima. Ọ gha khọnrẹn wẹẹ, ọ kpẹẹ re ne ima ke ga e Jehova, ma sẹtin mu  asikẹgbe ne ima gu e Jehova mwẹ rhia, deghẹ ima i dia egbe ima vbe ẹmwẹ ne ima ta kevbe emwi ne ima ru.

Gia guan kaẹn Mosis ne Baibol tie ẹre, ọmwa nọ ghi “mwẹ ekhọe ọmẹhẹ sẹ emwa hia ni rre agbọn na” vbe ẹghẹ nii. (Nọm 12:3, NW) Ukpo nibun ẹre Mosis wa ya zin egbe ovian ne Ivbi Izrẹl ghaa vian ye ọre ehọ. Sokpan vbe asẹ ọkpa, ọ ma ghi sẹtin zin ọnrẹn. Vbe Ivbi Izrẹl ghi vian wẹẹ, iran ma miẹn amẹ wọn, ohu keghi mu e Mosis. Ọ na ya ohu tama iran wẹẹ: “Wa danmwehọ, wa ne etẹ na! Uwu okuta na ẹre ima gha ke samẹ ladian ne uwa ra?”—Nọm 20:2-11.

E Mosis ma ghi sẹtin dia egbe ẹre. Ọ ma vbe rhie uyi nọ khẹke ne Jehova ye amẹ nọ kpemehe ẹre ne iran vbe odẹ ọghe ọyunnuan. (Psm 106:32, 33) Rhunmwuda ọni, e Jehova ma ghi kue nọ la Otọ Na Ru Eyan Rẹn. (Nọm 20:12) Ẹi mwẹ e Mosis ma gha gbe I ma rẹn ye emwi nọ ru na, ọ te ya wu.—Diut 3:23-27.

De emwi ne ọna maa ima re? Ọ gha khọnrẹn wẹẹ, ọ kpẹẹ re ne ima ke ga e Jehova, ọ ma zẹdẹ khẹke ne ima gha ya ohu gu emwa guan, rhunmwuda wẹẹ iran ru emwi nọ sọnnọ ima, ra rhunmwuda wẹẹ ima khian rhie adia ne iran. (Ẹfis 4:32; Kọl 3:12) Ẹmwata nọ wẹẹ, ọmwa ghaa khian ọmaẹn nẹ, ọ ghi do gha lọghọ nọ sẹtin gha zin egbe emwi vbe ugbẹnso. Sokpan, ọ khẹke ne ima ye igiemwi ọghe Mosis rre. Ọ khẹke ne ima gha begbe ne ima ghẹ do rhunmwuda emwi nọ ma sẹ emwi, mu asikẹgbe ne ima gu e Jehova mwẹ fua. De emwi ne ima gha ru, ne ima mieke na sẹtin gha dia egbe ima?

EMWI NE IMA GHA RU NE IMA MIEKE NA SẸTIN GHA DIA EGBE IMA

Rinmwian Osanobua nọ rhie orhiọn nọhuanrẹn nuẹn. Vbọzẹe? Rhunmwuda, a dia egbe ọmwa keghi re ọkpa vbe usun akpa ne orhiọn nọhuanrẹn ya ọmwa mwẹ. Ma gha rinmwian e Jehova nọ rhie orhiọn nọhuanrẹn ne ima, ọ gha họn erhunmwu ima. (Luk 11:13) Orhiọn nọhuanrẹn ẹre Jehova loo ya ru iyobọ ne ima ya sẹtin gha dia egbe ima. (Fil 4:13) E Jehova gha vbe sẹtin ru iyobọ ne ima ya gha mwẹ akpa nikẹre ne orhiọn nọhuanrẹn ya ọmwa mwẹ, vbe na ghee ahoẹmwọmwa. Ma ghaa mwẹ avbe akpa na, ọ ghi gha khuẹrhẹ ne ima sẹtin gha dia egbe ima.—1 Kọr 13:5.

Gha lẹẹ ne emwi ke emwi nọ gha yae lọghọ ne u sẹtin gha dia egbuẹ

Lẹẹ ne emwi ke emwi nọ gha yae lọghọ ne u sẹtin gha dia egbuẹ. Vbe igiemwi, gha lẹẹ ne avbe wẹbsait kevbe ughe nọ dekaẹn uyinmwẹ esakan. (Ẹfis 5:3, 4) Vbene ẹmwata, te ima gha lẹẹ ne emwi ke emwi nọ gha ya iziro dan la ima ekhọe. (Itan 22:3; 1 Kọr 6:12) Vbe igiemwi, ọ gha maan sẹ, deghẹ ọmwa ne iziro ọghe alamoghẹ rherhe la re ekhọe na wa gban egbe fẹfẹfẹ ne avbe ughe kevbe ebe ni dekaan iku ọghe ọdọ vbe amwẹ.

Ọ sẹtin gha lọghọ ne ima lele adia na. Sokpan deghẹ ima na gha hia, e Jehova gha ru iyobọ ne  ima, ne ima sẹtin gha dia egbe ima. (2 Pit 1:5-8) Ọ gha ru iyobọ ne ima ya sẹtin gha dia iziro ọghe ima, ẹmwẹ ne ima ta kevbe emwi ne ima ru. Igiemwi ọghe Paul kevbe Marco ne ima ka ya unu kaẹn sin so igiẹ ye ọna. Vbe okiekie, iran eva na do sẹtin gha dia egbe iran, vbe ohu ghaa mu iran. Gia vbe guan kaẹn ọtẹn nokpia ọkpa nọ te ka wa rherhe mu ohu. Ohu muẹn sẹrriọ wẹẹ, vbe ọ ghaa fi imọto khian, ọ ghi gha gu avbe driver ne ihua re muan ẹmwẹ. De emwi ne ọtẹn na ghi ru? Ọtẹn na keghi kha wẹẹ, “Ẹdẹgbegbe ẹre I ya gha na erhunmwu ne Jehova ru iyobọ mẹ. I na gha tie avbe ebe ọghomwa eso ni guan kaẹn a dia egbe ọmwa. I gha miẹn ako Evbagbẹn Nọhuanrẹn nọ gha sẹtin ru iyobọ mẹ, I ghi hia ne I rẹn ọnrẹn ye uhunmwu. Ukpo nibun gberra nẹ, ne I ke hia ne I gha re ọmwa nẹi rherhe mu ohu, ọrheyerriọ, ẹdẹ ọkpa i gbe, I ma ye egbe mwẹ rre wẹẹ, ọ khẹke ne I hia ne I gbe ibiẹ rrie vbe emwi ke emwi nọ rhirhi sunu vbe ẹdẹrriọ. Emwi ọvbehe nọ vbe ru iyobọ mẹ ọre wẹẹ, I keghi hia ne I gha rherhe kpa hin owa rre, ne I ghẹ mieke na do gha ya okhirhikhirhi fi imọto khian, ra ne I ghẹ do gha ya ọkpankpan ye emwa ọvbehe egbe.”

ADEGHẸ Ọ NA GHA LỌGHỌ NE IMA SẸTIN GHA DIA EGBE IMA

Ugbẹnso, ọ keghi lọghọ ne ima sẹtin gha dia egbe ima. Egbe emwi vbenian gha sunu, ekhue sẹtin do gha mu ima vbe ima gha khian na erhunmwu gie Jehova. Sokpan, ẹghẹ vbenian ẹre ọ khẹke ne ima ya na erhunmwu sẹ. Egbe emwi vbenian gha sunu daa ima, ọ khẹke ne ima na erhunmwu gie Jehova vbobọvbobọ. Ma ghi rinmwiaẹn nọ yabọ ima kevbe nọ ru iyobọ ne ima. Ma ghi vbe hia ne ima ya emwi nọ sunu nii wan ne egbe. (Psm 51:9-11) Ghẹ roro ẹre wẹẹ, e Jehova i khian họn erhunmwu ruẹ vbe u gha rinmwiaẹn nọ yabọ ruẹ. (Psm 102:17) Ukọ e Jọn keghi kha wẹẹ, esagiẹn Jesu gha “ya ima khian nọhuanrẹn hin orukhọ hia rre.” (1 Jọn 1:7; 2:1; Psm 86:5) Ghẹ mianmian wẹẹ, e Jehova wẹẹ ne eguọmwadia ẹre gha yabọ egbe vbe ẹghẹ hia. Rhunmwuda ọni, ma mwẹ ilẹkẹtin wẹẹ, e Jehova tobọre gha vbe yabọ ima.—Mat 18:21, 22; Kọl 3:13.

Ẹko ma rhiẹnrhiẹn e Jehova ye emwi ne Mosis ru vbuwe ato, vbe ẹghẹ nọ ma na sẹtin dia egbe ẹre. Sokpan e Jehova na ye yabọe. Uhiẹn, te Evbagbẹn Nọhuanrẹn ye ka e Mosis ba emwa ni mwẹ amuẹtinyan nọ wegbe nọ khẹke ne ima ya egbe taa. (Diut 34:10; Hib 11:24-28) Ẹmwata nọ wẹẹ, e Jehova ma kue ne Mosis la Otọ Na Ru Eyan Rẹn, sokpan ọ gha kue ne Mosis gha rre Paradais vbe uhunmwu otagbọn na. Ẹghẹ nii, ẹkpotọ ghi kie nẹẹn ya gha rrọọ vbe etẹbitẹ. Ẹkpotọ sẹtin vbe kie ne ima ya gha rre agbọn na vbe etẹbitẹ deghẹ ima na gha dia egbe ima vbe ẹghẹ hia.—1 Kọr 9:25.