Gberra gha rhie uhunta

Avbe Osẹe Jehova

Hannọ urhuẹvbo Edo

De Vbene Avbe Osẹe Jehova Ya Miẹn Igho Ne Iran Loo Ye Iwinna Ọghe Iran Hẹ?

De Vbene Avbe Osẹe Jehova Ya Miẹn Igho Ne Iran Loo Ye Iwinna Ọghe Iran Hẹ?

Ehe ne a na mobọ miẹn igho na loo ye iwinna ikporhu iyẹn nọma na, ọre okozẹ nọ ke ọmwa ekhọe rre ne Avbe Osẹe Jehova ru. Ai zẹ igho vbe iko ne ima do, ai vbe muẹn kpan ye ọmwa rhọkpa egbe nọ ye obọ igbe ọghe emwi nọ mwẹ ya ru izọhẹ. (Matiu 10:7, 8) Nọghayayerriọ, ma keghi mu avbe ẹkpẹtin okozẹ ye ehe ne ima na do iko, nọ emwa gha sẹtin rrie igho yi deghẹ iran hoo. Ai sunnu ye eni ọghe emwa ni ru izọhẹ.

Emwi ọkpa nọ zẹẹ ghẹ igho ne ima miẹn se ima loo ọre wẹẹ, ima i mwẹ avbe olodigba ne ima ha osa na. Deba ọni, ai ha osa ne Avbe Osẹe Jehova ne iran ya kporhu ke owa ya se owa, kevbe wẹẹ, owa ugamwẹ ọghomwa keghi re nọ rre oreghe.

Izọhẹ ke izọhẹ na rhie gha rrie abotu ọghe Avbe Osẹe Jehova, keghi re na loo ya ru iyobọ ne emwa ni miẹn odekun ọghe evbayi vbene igbohiotọ ye. A vbe yae ru iyobọ nẹ avbe etẹn ima, ne ima gie ye isi rhunmwuda ikporhu iyẹn nọma na, kevbe avbe ọgbaroghe ọghe otako ni mu okhian lele dọmwadẹ iko. A vbe loo ẹre ya bọlọ owa ugamwẹ vbe avbe otọẹvbe ne obọ ma sọre, kevbe a vbe loo ẹre ya print kevbe ya kun ẹrẹn gie emwa ighẹ e Baibol kevbe avbe ebe ọvbehe ọghe Ivbiotu e Kristi.

Edọmwadọghẹ ẹre ọ khian zẹ ne egbe ẹre deghẹ o hoo nọ ru iyobọ igho na loo ye iwinna ọghe iko nọ rre ẹdogbo ẹre, ra iwinna ọghe otagbọn hia, ra eveva. Dọmwadẹ iko keghi na iyẹn ma iko vbe ẹghẹ hia vbene a ya loo igho hẹ.