Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 UYINMWẸ ỌGHE IMA NE IVBIOTU E KRISTI

Ku Obọ Gbe Ba Ilele Ọghe Jehova

Ku Obọ Gbe Ba Ilele Ọghe Jehova

E Jehova keghi mwẹ ilele nọ dekaan uyinmwẹ ne irẹn hoo ne emwa nagbọn gha lele. Vbe igiemwi, ọ hoo ne okpia gha rhie okhuo ọkpa kevbe ne iran rọnmwẹ egbe sẹ ota. (Mat 19:4-6, 9) Irẹn keghi gbe ikhan ye uyinmwẹ esakan nọ rhirhi gha khin. (1 Kọr 6:9, 10) Ọ vbe mwẹ ilele nọ dekaan odẹ na ya muegbe kevbe na ya tegbe nọ gha ya eguọmwadia ọghẹe lughaen ne emwa ọvbehe.—Diut 22:5; 1 Tim 2:9, 10.

Vbe agbọn ne ima ye na, emwa nibun i ya avbe ilele ọghe Jehova ru emwi. (Rom 1:18-32) Iran keghi hoo ne iran gua usun ro vbe nọ dekaan vbene a ya muegbe, vbene a ya tegbe kevbe odẹ na ya yin. Ekhue enegbe iran i mu iran, iran gha kue miẹn ọmwa nọ ru emwi esi, iran ghi gha ghee ẹre ọzuọ.—1 Pit 4:3, 4.

Zẹvbe Osẹe Jehova, te ima gha ya udinmwẹ ku obọ gbe ba avbe ilele ọghe Osanobua. (Rom 12:9) De vbene ima khian ya ru ọna hẹ? Te ima gha fẹko gi emwa rẹn emwi nọ yẹẹ e Jehova. Te ọ khẹke ne ima vbe gha ya ilele nọ gbae ru emwi vbe arrọọ ọghe ima. Vbe igiemwi, adeghẹ ima khian muegbe kpa vbe owa, ma sẹtin nọ egbe ima wẹẹ: ‘Ukpọn ne I yọ na ra odẹ ne I ya tegbe gua ilele ọghe Jehova ro ra, ra ọghe agbọn na nọ? Ọ rhiẹre ma wẹẹ ọmwa nọ mwẹ imuohan Osanobua ẹre imẹ khin ra?’ Ra ima ke ghee ughe rhọkpa, ma sẹtin nọ egbe ima wẹẹ: ‘Ọna gha ya ẹko rhiẹnrhiẹn e Jehova ra? Ilele ọghe Osanobua ẹre ọ dekaan ra, ra ọghe agbọn na nọ? Ughe na gha ru iyobọ mẹ ya sẹtin da egbe mwẹ yi vbe I gha werriẹ aro daa edanmwẹ ra? (Psm 101:3) Ọna gha sẹtin khian okuta irhuawẹ ne ẹgbẹe mwẹ ra emwa ọvbehe ra?’—1 Kọr 10:31-33.

Vbọsiẹ ne ọ na khẹke ne ima ku obọ gbe ba avbe ilele ọghe Jehova? Jesu Kristi gha rherhe do guọghọ agbọn na vbene ọ gha na wabọ emwi dan hia rua. (Ezik 9:4-7) Emwa ni ru ahoo ọghe Jehova ọkpa ẹre ọ khian gha rre agbọn na. (1 Jọn 2:15-17) Nọnaghiyerriọ, gima ku obọ gbe ba avbe ilele ọghe Jehova ne emwa mieke na gha lekpae uyinmwẹ esi ọghe ima rhie uyi ne Osanobua.—1 Pit 2:11, 12.

De aro ọmwa ne emwa ghee mwẹ ẹre, vbe I gha muegbe ladian?

VBE A GHA GHI GHEE ẸRE FO NẸ IGHE NE VIDIO DO GHA RE ỌSE ỌGHE JEHOVA—ỌDỌ ỌKPA VBE OKHUO ỌKPA, U GHI ZẸ EWANNIẸ YE AVBE INỌTA NA:

  • Vbọsiẹ ne ọ na re emwi ẹwaẹn deghẹ a na gha ya avbe ilele ọghe Jehova ru emwi?

  • Vbọsiẹ ne ọ na khẹke ne evbibiemọ ke egbe ọvbokhan maa ivbiran avbe ilele ọghe Jehova?

  • De vbene ima hia ke ọmaẹn ke ẹghele khian ya ru iyobọ ne emwa ọvbehe hẹ, ne umanmwẹ ọghe Osanobua mieke na sẹ egbe iran?