Gberra gha rhie uhunta

Avbe Osẹe Jehova

Hannọ urhuẹvbo Edo

Adia Na Khian Lele Vbe Ne Iko Uyinmwẹ Kevbe Iwinna Ọghe Ima Ne Ivbiotu E Kristi

Adia Na Khian Lele Vbe Ne Iko Uyinmwẹ Kevbe Iwinna Ọghe Ima Ne Ivbiotu E Kristi

Dọmwadẹ Uhunmwuta Ni Rre Uwu Ẹre

 

Okhuẹn

Ẹmwẹ Ọghe Omuso

 2

Emwi Ewe Ni Rre Uwu Ẹmwẹ Ọghe Osanobua

 3

Rhiegbe Ye Iwinna Ikporhu Iyẹn Nọ Maan

 4

Uyinmwẹ Ọghe Ima Ne Ivbiotu E Kristi

 5

Ẹmwẹ Na Khian Ya Mu Iko Sẹ Ufomwẹ

 6

Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi

 7

Ẹmwẹ Adia

 8

Ẹghẹ

 9

Otuẹ Ọghe Ọgbaroghe Ọghe Otako

 10

Uzọla Ọghe Asikoko Ne Kherhe Ra Nọkhua

 11

Uzọla Ọghe Ugie Ayere

 12

Ọgbaroghe Ọghe Iko Uyinmwẹ Kevbe Iwinna Ọghe Ima

 13

Olaga Ọghe Iko Uyinmwẹ Kevbe Iwinna Ọghe Ima

 14

Ọsiemwiẹnro Ọghe Ẹbu Ediọn

 15

Ọbude Ọghe Etẹn Ni Ya Ọta Guan

 16

Iko Na Do Vbe Ughugha Ọvbehe

 17

E Vidio

 18

1. Iko Uyinmwẹ Kevbe Iwinna Ọghe Ima keghi re na khian gha do zẹvbe nọ rre adia na gbẹnnẹ ye ototọ mwa kevbe nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Ọ khẹke na rhie igiọdu ne etẹn hia ni ya iyẹn wewe, ne iran gha mwẹ obọ vbe abọ ọghe owebe. Emwa ọvbehe ni yo iko vbe ẹghẹ hia, sẹtin gha mwẹ obọ vbọ, deghẹ iran miẹn ọnrẹn yi ighẹ imamwaemwi ọghe Baibol, kevbe deghẹ iran vbe loo arrọọ ọghe iran zẹvbe nọ gua ilele ọghe Ivbiotu e Kristi ro.​—⁠be-E ipapa 282.

 2. Ẹmwẹ Ọghe Omuso: Ifuanro 3 ra ẹi khian sẹ vberriọ. Vbe uzọla uzọla, vbe iyeke ihuan kevbe erhunmwu na khian ya suẹn, olaga ọghe Iko Uyinmwẹ Kevbe Iwinna Ọghe Ima, ghi ta ẹmwẹ nọ gha ya etẹn kpẹho khẹ emwamwa nọ khian lelẹe. Usun odẹ nọ gha ya ru ọna, ọre ne ọ sunu ye ọkpa vbe inọta nọ rre Ebe Ewanniẹn Ọghe Ne Iko Uyinmwẹ Kevbe Iwinna Ọghe Ima Ne Ivbiotu E Kristi.

 3. Emwi Ewe Ni Rre Uwu Ẹmwẹ Ọghe Osanobua:

  • Ọta Ọghe Ọwara: Ifuanro 10. Uhunmwuta na khian guan yan kevbe uhunmwu ẹmwẹ eva ra eha keghi rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Ọkpa vbe ediọn ra ọguọmwadia iwinna nọ gbegba ẹre a khian gha rhie ọta na na. Adeghẹ ebe ọghe ọgbọn vbuwe Baibol ẹre a khian suẹn gha tie vbe uzọla nii, a ghi kpee vidio ya muẹn so ighẹ ebe ọghe Baibol nii. Ọmunu sẹtin rhiẹre ladian, vbene vidio nii ya dekaan uhunmwuta nii hẹ. Vbọrhirhighayehẹ, ọ khẹke nọ guan yan avbe uhunmwu ẹmwẹ na  yunu kaan vbe ebe iwinna. Deba ọni, deghẹ ẹghẹ na gha rrọọ, ọ ghi rhan otọ avbe efoto ni rre ebe iwinna, kevbe avbe uhunmwu ẹmwẹ ni hẹnhẹn egbe yan Evbagbẹn Nọhuanrẹn, rhunmwuda ena gha ya etẹn rẹn otọre sayọ ighẹ ako iruẹmwi ọghe uzọla nii.

  • Gualọ Emwi Ewe Ọghe Orhiọn: Ifuanro 8. Ọna keghi re abọ ọghe inọta vbe ewanniẹn, nẹi mwẹ ẹmwẹ na ya mu ẹnrẹn so ra na ya mu ẹnrẹn sẹ ufomwẹ. Ọkpa vbe ediọn ra ọguọmwadia iwinna nọ gbegba ẹre ọ khian gha ru abọ na. Ọtẹn nọ khian ru abọ na sẹtin loo ẹghẹ ya rhie olika ẹmwẹ ni rre inọta enẹ na ladian, vbe odẹ nọ gha ya ru iyobọ ne etẹn vbe iko. Vbọrhirhighayehẹ, ọ khẹke ne ọ nọ etẹn inọta enẹ na. Obọ ọtẹn nọ khian ru abọ na ẹre ọ ye, deghẹ a gha tie ako ọghe evbagbẹn nọhuanrẹn hia na sunu yi, ni rre inọta eva nokaro. Emwa na tiere nọ zẹ ewanniẹn ghi loo ẹghẹ nẹi khian gberra ibuanro 30 ra nẹi khian sẹ vberriọ.

  • E Baibol Na Tie: Ifuanro 4 ra ẹi khian sẹ vberriọ. Ọtẹn nokpia ẹre ọ khian gha ru abọ ọghe owebe na. Ọtẹn na, nọ mwẹ obọ vbe abọ ọghe owebe ghi tie ako na rhie nẹẹn, vbe nẹi khian na ta ẹmwẹ ọghe omuso ra ẹmwẹ nọ khian ya muẹn sẹ ufomwẹ. Olaga ọghe iko ghi ru iyobọ ne ọtẹn na, katekate nọ sẹtin gha tie ebe vbe odẹ nọ gbae, vbe odẹ nọ gia rẹn otọre, vbe odẹ nọ rriẹ, kevbe nọ vbe sẹtin rẹn ẹmwẹ nọ khẹke na tua unu mu, ehe nọ khẹke ne a na fi urhu werriẹ, ehe nọ khẹke ne a na gbamẹ sawọn, kevbe nọ tiẹre vbe odẹ ọghe abiọmwabiẹ.

  4. Rhiegbe Ye Iwinna Ikporhu Iyẹn Nọ Maan: Ifuanro 15 ra ẹi khian sẹ vberriọ. Evbọzẹe ne a na mwamwa asefẹn ọghe iko na keghi re, ne etẹn ya guẹ sayọ vbe odẹ ne iran ya kporhu iyẹn nọ maan kevbe odẹ ne iran ya maa emwa emwi. Ọtẹn na rhie abọ ọghe otuẹ nokaro kevbe atuẹ werriegbe na, ghi lele igiemwi ọghe vbene a ya kporhu hẹ nọ rre ipapa 1 ọghe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Etẹn ẹre ọ khian zẹ ne egbe iran deghẹ iran gha kpee ẹre ra iran gha rhiẹre ladian ighẹ ọkpa vbe usun avbe vidio ra ebe ne ima mobọ loo ya maa emwa emwi vbe ikporhu. Ẹghẹ ne dọmwadẹ etẹn ni mwẹ obọ vbe abọ ọghe owebe khian loo keghi rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima, gberra ọni, adia ọvbehe ne etẹn na, gha lele sẹtin vbe ladian vbe Ebe Iwinna. Ọ ma khẹke ne etẹn ni mwẹ obọ vbe abọ ọghe owebe rhie ẹmwẹ ba ọta na rhie ne iran, rhunmwuda iran hoo ne iran loo ẹghẹ na rhie ne iran fo. Orhiema na muegbe ẹre yotọ ẹsẹsẹmwẹse, sẹtin fo ọ te sẹ ẹghẹ na rhie yọ. Adeghẹ esa na gha rrọọ, a sẹtin rhie abọ ọghe owebe ne ediọn.

  • E Vidio Ọghe Vbene A Ya Kporhu Hẹ: Vbe uzọla uzọla vbe dọmwadẹ uki, a gha kpee vidio ọghe vbene a ya kporhu hẹ, a ghi vbe ziro yan rẹn. Olaga kevbe etẹn ni rre uwu ẹbu ẹre ọ khian koko ziro yan rẹn. Avbe vidio na keghi re orhiema ọghe otuẹ nokaro, atuẹ werriegbe nokaro kevbe atuẹ werriegbe nogieva. Olaga ọghe Iko Uyinmwẹ Kevbe Iwinna Ọghe Ima ẹre ọ yan abọ na.

  • Otuẹ Nokaro: Orhiema na, keghi re abọ ọghe owebe ne ọtẹn nokpia ra ọtẹn nokhuo gha sẹtin ru. Adeghẹ ọtẹn nokpia ẹre a rhie ọta na, ọtẹn nokpia ẹre ọ khẹke nọ ru iyobọ nẹẹn, erriọ wa vbe nọ zẹẹ deghẹ ọtẹn nokhuo ẹre a rhie ọta na. Ọkpa vbuwe ẹgbẹe sẹtin vbe ru iyobọ ne iran. Ọtẹn nọ khian ru orhiema na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọtẹn na, ghi tuẹ ọ yan owa, otuẹ nọ khẹke na tuẹ vbe ẹdogbo nii. Ẹmwẹ na khian ta vbe orhiema na, ghi hẹnhẹn egbe yan igiemwi ọghe vbene a ya kporhu hẹ.

  • Atuẹ Werriegbe Nokaro: A sẹtin rhie abọ ọghe owebe na ne ọtẹn nokpia ra ọtẹn nokhuo. Adeghẹ ọtẹn nokpia ẹre a rhie ọta na, ọ khẹke ne ọtẹn nokpia ru iyobọ nẹẹn,  erriọ wa vbe nọ zẹẹ deghẹ ọtẹn nokhuo ẹre a rhie ọta na. (km-E 5/⁠97 ipapa 2) Ọtẹn nọ khian ru abọ na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọ khẹke ne ọtẹn na, ru orhiema ọghe ẹmwẹ nọ khian ta vbe ọ gha mu otuẹ gie ọmwa nọ danmwehọ vbe otuẹ nokaro. Ẹmwẹ na khian ta vbe orhiema na, ghi hẹnhẹn egbe yan igiemwi ọghe vbene a ya kporhu hẹ, nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima.

  • Atuẹ Werriegbe Nogieva: A sẹtin rhie abọ ọghe owebe na ne ọtẹn nokpia ra ọtẹn nokhuo. Adeghẹ ọtẹn nokpia ẹre a rhie ọta na, ọ khẹke ne ọtẹn nokpia ru iyobọ nẹẹn, erriọ wa vbe nọ zẹẹ deghẹ ọtẹn nokhuo ẹre a rhie ọta na. (km-E 5/⁠97 ipapa 2) Ọtẹn nọ khian ru abọ na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọ khẹke ne ọtẹn na, ru orhiema ọghe ẹmwẹ nọ khian ta vbe ọ gha mu otuẹ gie ọmwa nọ danmwehọ vbe atuẹ werriegbe nokaro. Ẹmwẹ nọ khian ta vbe orhiema na, ghi hẹnhẹn egbe yan igiemwi ọghe vbene a ya kporhu hẹ nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima.

  • E Baibol Na Gu Ọmwa Ruẹ: A sẹtin rhie abọ ọghe owebe na ne ọtẹn nokpia ra ọtẹn nokhuo. Adeghẹ ọtẹn nokpia ẹre a rhie ọta na, ọ khẹke ne ọtẹn nokpia ru iyobọ nẹẹn, erriọ wa vbe nọ zẹẹ deghẹ ọtẹn nokhuo ẹre a rhie ọta na. (km-E 5/⁠97 ipapa 2) Ọtẹn nọ khian ru abọ na kevbe nọ khian ru iyobọ nẹẹn sẹtin ru ẹre vbe itota ra vbe imudia. Ọ khẹke nọ gha re orhiema ọghe Baibol na gu ọmwa ruẹ nọ khian vbe obọ. Esa i rrọọ na gha ya ta ẹmwẹ omuso ra ẹmwẹ na khian ya muẹn sẹ ufomwẹ, sokpan wẹẹ ọni ọre ako na hoo ne ọtẹn na winna yan. Esa i rrọọ na ya tiẹre ladian ighẹ okhuẹn hia na khian gu ọmwa ruẹ, sokpan ai wua deghẹ a na vbe ru vberriọ. Ọ khẹke ne ọtẹn na rhie ọta na, rhiẹre ma vbene a ya maa ọmwa emwi hẹ vbe odẹ ọghe ifuẹro.

  •   Ọta Ọghe Ọwara: Ọtẹn nokpia ẹre ọ khian ya ọta na guan. Te ọ khian wa yae guan vbe iko zẹvbe ọta ọghe ọwara.

  5. Uyinmwẹ Ọghe Ima Ne Ivbiotu E Kristi: Ihuan ẹre a khian ya suẹn abọ na. Vbe ifuanro 15 nọ ghi lelẹe, a gha guan yan ọta ọkpa ra eva, nọ gha ru iyobọ ne etẹn ya rhiẹre ye uyinmwẹ emwi ne iran ruẹ vbe Ẹmwẹ Ọghe Osanobua. Sokpan wẹẹ te a rhie adia ọvbehe rre, abọ na keghi re na khian gha rhie ne ediọn ra eguọmwadia iwinna ni gbegba. Sokpan ediọn ọkpa, ẹre ọ khian gha ru abọ ọghe evba gualọ vbe iko.

  • Iruẹmwi E Baibol Ọghe Iko: Ifuanro 30. Ọkpa vbe ediọn nọ gbegba ẹre a khian gha rhie abọ na na. (Vbe iko ne ediọn i na bun, a sẹtin rhie abọ na ne eguọmwadia iwinna ni gbegba.) Ẹbu ediọn ẹre ọ khian kpasẹ yọ deghẹ ọmwa gbegba nọ gha siẹnro Iruẹmwi E Baibol Ọghe Iko. Te ọ khẹke ne etẹn ni khian gha siẹnro ẹre loo ẹghẹ nọ somwa ya muegbe ẹre yotọ, ne iran mieke na sẹtin siẹnro ẹre vbe odẹ ne emwa hia gha na miẹn ere vbọ, vbene iran i na gbe ẹghẹ. Iran ghi niania avbe ako ọghe evbagbẹn nọhuanrẹn ni rhie olika ẹmwẹ ni rrọọ ladian, iran ghi vbe hia ne iran ru iyobọ ne etẹn ya rhiẹre ye uyinmwẹ ighẹ evba ruẹre vbe uzọla nii. Iran gha tie adia ni rre ebe ọghomwa ọghe vbene a ya siẹnro Iruẹmwi Ebe Owa Ọkhẹ hẹ, ọ gha ru iyobọ ne iran. Etẹn ughughan ẹre ọ khẹke nọ gha siẹnro Iruẹmwi E Baibol Ọghe Iko, etẹn ughughan ẹre ọ vbe khẹke nọ gha tie vbe uzọla uzọla vbe iko ne etẹn ni gbegba na bun. Adeghẹ olaga ọghe Iko Uyinmwẹ Kevbe Iwinna Ọghe Ima na kha wẹẹ, na fian ẹghẹ na khian loo vbe Iruẹmwi E Baibol Ọghe Iko kanmwa, ọtẹn nọ khian siẹnro ẹre, ẹre ọ khian ghi ya ẹwaẹn obọ re fiaẹn kanmwa. Ọ sẹtin sẹ okhuẹn eso rae nọ te khẹke na tie.

  6. Ẹmwẹ Na Khian Ya Mu Iko Sẹ Ufomwẹ: Ifuanro 3 ra ẹi khian sẹ vberriọ. Olaga ọghe Iko Uyinmwẹ Kevbe Iwinna Ọghe Ima ghi ru ogbewerriẹ ọghe avbe uhunmwu ẹmwẹ ne kpataki na ruẹre vbe iko ọghe ẹdẹrriọ, ya sẹ egbe inọta kevbe ewanniẹn nọ rre Ebe Ewanniẹn Ọghe Ne Iko Uyinmwẹ Kevbe Iwinna Ọghe Ima Ne Ivbiotu E Kristi. Ọ ghi vbe rhie etẹn ekhọe ghee evba khian ziro yan vbe uzọla nọ khian ghi lelẹe, ọ sẹtin sunu ye inọta ọkpa na khian rhie ewanniẹn yi vbe uzọla nii. Adeghẹ ẹghẹ rrọọ, ọ sẹtin sunu ye eni ọghe etẹn ni khian gha mwẹ obọ vbe abọ ọghe owebe vbe uzọla nọ khian ghi lelẹe. Sokpan wẹẹ te a rhie adia ọvbehe rre, olaga ghi tie ayawewe kevbe lẹta nọ ru ekpataki ma iko vbuwe ẹghẹ nọ khian ya gha ta ẹmwẹ nọ khian ya khui iko. Ọ ma khẹke na yae wewe vbe uhunmwu ogiukpo ighẹ ayahọmwaehọ nọ rre ke ẹghẹ ya fi ẹghẹ, vbe na ghe emwamwa ọghe iwinna ikporhu iyẹn nọ maan kevbe emwamwa ọghe akpehuan, sokpan deghẹ ayawewe vberriọ rrọọ, te ọ khẹke na sikaẹn ye bọdi ọghe ayahọmwaehọ. Adeghẹ ẹghẹ i khian sẹ a ya tie lẹta ra ayawewe ma iko, olaga ghi tama etẹn ni mwẹ ọta vbe asefẹn ọghe Uyinmwẹ Ọghe Ima Ne Ivbiotu E Kristi, ne iran fian ẹghẹ ne iran khian loo vbe ọta ọghe iran kanmwa. (Ya ghee  okhuẹn 5 kevbe  9.) A ghi ya ihuan kevbe erhunmwu khui iko na.

 7. Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi: Ke uzọla ọghe January 7, 2019 kpa, ebe ẹmu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi ẹre olaga ọghe Iko Uyinmwẹ Kevbe Iwinna Ọghe Ima khian gha loo ya rhie etian ra adia ne etẹn ni mwẹ obọ vbe abọ ọghe owebe. Ọ khẹke ne dọmwadẹ etẹn na rhie ọta na vbe abọ ọghe owebe, winna yan iruẹmwi nọ rre ebe ẹmu na. A gha sẹ ako lẹga enọmba ọghe iruẹmwi ne iran khian winna yan vbe abọ ọghe owebe nọ rre Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Vbe uzọla nokaro vbe dọmwadẹ uki, olaga ọghe Iko Uyinmwẹ Kevbe Iwinna Ọghe Ima, kevbe etẹn ni gbẹbu ghi koko ziro yan iruẹmwi ọkpa vbe ebe ẹmu na. Ne ako, “Vbene U He Mwẹ Alaghodaro Sẹ Hẹ,” nọ rre ebe ẹmu na, keghi re ne etẹn ni mwẹ obọ vbe abọ ọghe owebe khian gha loo. Olaga i khian gha sẹ ama yọ.

  8. Ẹmwẹ Adia: Dọmwadẹ etẹn ni mwẹ obọ vbe abọ ọghe owebe gha ghi ru abọ ọghe iran nẹ, olaga ọghe Iko Uyinmwẹ Kevbe Iwinna Ọghe Ima, keghi mwẹ odẹ ifuanro ọkpa nọ khian ya rhie etian ra adia nọ ladian vbe ebe ẹmu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi ne etẹn na. Olaga gha tie ọtẹn nọ mwẹ obọ vbe abọ ọghe owebe nọ do ru abọ ọghẹe, ẹi khian yae wewe ako nọ khian winna yan. Vbọrhirhighayehẹ, ọtẹn na gha ru abọ ọghẹe fo nẹ, olaga ghi ka wa tian rẹn. Vbe iyeke ọni, ọ sẹtin tama iko, ako na wẹẹ ne ọtẹn na winna yan, ọ ghi sunu ye emwi eso nọ ru nọ rhiẹre ma wẹẹ, ọ wa hia vbe ako na wẹẹ nọ winna yan. Deghẹ ọ vbe khẹke nọ ye winna yan ako nii, ọ ghi vbe fẹko tama rẹn. Olaga sẹtin vbe guan yan abọ ọvbehe vbe nene orhiema ne ọtẹn ru, deghẹ ọ ghee ẹre wẹẹ, ọtẹn nọ ru abọ nii ra emwa ni gbẹbu gha miẹn ere vbọ. Olaga sẹtin loo ebe ẹmu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi ra ne ebe Ministry School ya rhie adia ọvbehe ne etẹn ni mwẹ obọ vbe abọ ọghe owebe. Ọ sẹtin ru ọna vbe ẹkhokho vbe a gha zobọ nẹ, ra vbe ẹdẹ ọvbehe, kevbe wẹẹ, adia na sẹtin dekaan ako na rhie nẹẹn nọ winna yan ra ako ọvbehe.​—⁠Adeghẹ u hoo ne u rẹn sayọ vbekpae iwinna ọghe ọgbaroghe ọghe Iko Uyinmwẹ Kevbe Iwinna Ọghe Ima, kevbe ọbude ọghe etẹn ni ya ọta guan, ya ghee  okhuẹn 13 kevbe  16.

    9. Ẹghẹ: Ọ ma khẹke ne ọmwa rhọkpa gbe ẹghẹ, ya sẹ egbe olaga ọghe Iko Uyinmwẹ Kevbe Iwinna Ọghe Ima. Deghẹ etẹn ni mwẹ obọ vbe abọ ọghe owebe, na loo gberra ẹghẹ ọghe iran nẹ, a ghi wa ya ẹwaẹn da iran obọ yi. Deghẹ a na loo gberra ẹghẹ nọ khẹke vbe abọ ọvbehe vbe iko na, ọbude ọghe etẹn ni ya ọta guan ghi gu ọtẹn nọ gbe ẹghẹ guan vbe ẹkhokho. Ọ khẹke ne ẹghẹ na khian ya suẹn iko na, ya sẹ ẹghẹ na khian ya zobọ, deba ihuan kevbe erhunmwu gha re ughaẹdẹ 1 kevbe ifuanro 45.

 10. Otuẹ Ọghe Ọgbaroghe Ọghe Otako: Ọgbaroghe ọghe otako gha mu otuẹ rre, a ghi do iko na zẹvbe nọ rre adia ọghe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Sokpan afiwerriẹ nọ khian gha rrọọ ẹre na khin: Ai khian ghi ru Iruẹmwi E Baibol Ọghe Iko. Ọta ọghe ifuanro 30 ne ọgbaroghe ọghe otako khian ya guan, ẹre ọ khian ghi rhihe ẹre. Ọ te sẹ ẹghẹ ọta na, olaga ọghe Iko Uyinmwẹ Kevbe Iwinna Ọghe Ima ghi ru ogbewerriẹ ọghe iko nọ wa da fo, ọ ghi rhie etẹn ekhọe ghee evba yaro yi vbe uzọla nọ dee, ọ ghi vbe tie lẹta ra ayawewe nọ khẹke ma iko, ọ ke tie ọgbaroghe ọghe otako. Ọgbaroghe ọghe otako gha ghi ya ọta ọghẹe guan fo nẹ, ọ ghi ya ihuan ne irẹn tobọre zẹ ya mu iko sẹ ufomwẹ. Ai khian do iko vbe avbe ughugha nekherhe vbe ẹghẹ ne ọgbaroghe ọghe otako khian ya mu otuẹ rre. Ẹbu ni ya urhuẹvbo ọvbehe do iko, sẹtin ye do iko vbe uzọla ne ọgbaroghe ọghe otako ya mu otuẹ rre. Vbọrhirhighayehẹ, ne ẹbu na mieke na danmwehọ ọta ọghe ọgbaroghe ọghe otako, ọ khẹke ne iran ya deba iko vbe ughugha nọkhua.

 11. Uzọla Ọghe Asikoko Nekhere Ra Nọkhua: Ai khian do iko rhọkpa vbe uzọla ọghe asikoko nekherhe ra nọkhua. Dọmwadọghẹ ra ẹgbẹe ghi ziro yan rẹn vbe owa ighẹ emwamwa nọ te rrọọ vbe uzọla nii.

 12. Uzọla Ọghe Ugie Ayere: Adeghẹ ẹdẹ na khian do Ugie Ayere na de ye uwu uzọla, ai ghi do iko ne a do vbe uwu uzọla, nọ re Iko Uyinmwẹ Kevbe Iwinna Ọghe Ima. Sokpan, ọ khẹke na ye do iko ọghe emwamwa ikporhu iyẹn nọ maan vbe ẹdẹ Ugie Ayere.

  13. Ọgbaroghe Ọghe Iko Uyinmwẹ Kevbe Iwinna Ọghe Ima: Ẹbu ediọn ghi zẹ ọkpa vbuwe iran nọ khian gha ga zẹvbe ọgbaroghe ọghe Iko Uyinmwẹ Kevbe Iwinna Ọghe Ima. Iwinna rẹn nọ na miẹn wẹẹ, a do iko na zẹvbe nọ gua emwamwa ro kevbe na lele adia na rhie yotọ. Ọ khẹke ne irẹn vbe ọbude ọghe etẹn ni ya ọta guan gha ziro kugbe zẹvbe nọ khẹke. Ẹghẹ ke ẹghẹ ne ọghe uki rhọkpa ya ladian vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima, ọgbaroghe ọghe Iko Uyinmwẹ Kevbe Iwinna Ọghe Ima, ghi ghae abọ ọghe owebe vbe uki nii, ne etẹn ni khian gha mwẹ obọ vbọ. (Ya ghee  okhuẹn 4.) Ọ khẹke nọ rherhe ghae re ne etẹn ni mwẹ obọ vbe abọ ọghe owebe, ighẹ abọ ọghe iran. Ọ gha ghi sikẹ otọ gbe, ọ gha re uzọla eha ọ te sẹ ẹdẹ ne iran khian ru abọ ọghe iran. Ọ ghi loo Ebe Na Ya Ghae Abọ Na Khian Ru Vbe Ne Iko Uyinmwẹ Kevbe Iwinna Ọghe Ima Ne Ivbiotu e Kristi (S-89).

 14. Olaga Ọghe Iko Uyinmwẹ Kevbe Iwinna Ọghe Ima: Uzọla uzọla, ọkpa vbuwe ediọn ghi gha re olaga vbe Iko Uyinmwẹ Kevbe Iwinna Ọghe Ima. (Vbe iko ne ediọn i na bun, a sẹtin rhie abọ na ne eguọmwadia iwinna ni gbegba.) Irẹn ẹre ọ khian ta ẹmwẹ omuso, kevbe ẹmwẹ na khian ya mu iko sẹ ufomwẹ. Deghẹ a na kpee vidio ọghe vbene a ya kporhu hẹ, kevbe vidio nọ guan kaan dọmwadẹ iruẹmwi nọ rre ebe ẹmu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi, irẹn kevbe etẹn ni rre uwu ẹbu ghi koko ziro yan rẹn. Irẹn ẹre ọ khian vbe gha tie dọmwadẹ etẹn ni mwẹ obọ vbe iko vbe ẹdẹrriọ. Irẹn sẹtin vbe ru abọ ọvbehe, sokpan ọna hẹnhẹn egbe yan vbene ediọn bun sẹ vbe iko nii. Etẹn gha ghi ya ọta ọghe iran guan nẹ, ẹmwẹ kuẹi ẹre ọ khẹke nọ ta. Ẹbu ediọn ẹre ọ khian koko tae, usun iran nọ gbegba nọ gha winna iwinna na. Ke ẹghẹ ya fi ẹghẹ ẹre ediọn ni gbegba khian ya gha ru olaga. A sẹtin miẹn wẹẹ ọgbaroghe ọghe Iko Uyinmwẹ Kevbe Iwinna Ọghe Ima, ẹre ọ khian gha ru olaga sẹ avbe ediọn ni gbegba nikẹre, rhunmwuda vbene iko nii ye hẹ. Adeghẹ ọkpa vbe ediọn gbegba nọ gha siẹnro Iruẹmwi E Baibol Ọghe Iko, ọ gha kẹ, ọ vbe gbegba nọ gha ga zẹvbe olaga ọghe iko na. Vbọrhirhighayehẹ, gha mwẹ ọnrẹn vbe ekhọe wẹẹ, te ediọn ni khian gha ru olaga khian gha rhie etian kevbe adia nọ ru iyobọ ne ọmwa, ne etẹn ni mwẹ obọ vbe abọ ọghe owebe. Ọ khẹke ne olaga hia, na miẹn wẹẹ a ma gbe ẹghẹ. (Ya ghee  okhuẹn 6 kevbe  9.) Adeghẹ  olaga hoo na ru ẹre vberriọ kevbe deghẹ ẹkpotọ nọ somwa na gha rrọọ, a sẹtin wa mu amigbo ọghe obọ re mudia ye uhunmwu ogiukpo vba, ọ ghi ke evba gha tie nọ sọregbe, vbene ọtẹn nokpia ne irẹn tiere nọ do ya ọta guan gha na gberra ghee ehe ne uhanhan na mu ebe yi ye, nọ ya suẹn ọta ọghẹe. Erriọ vbe ye, olaga sẹtin vbe tota vbe odaro eteburu nọ rre uhunmwu ogiukpo vbe ẹghẹ ne ọtẹn nọ mwẹ obọ vbe abọ ọghe owebe khian ya gha tie Baibol. Ọ sẹtin vbe ru vberriọ vbe ẹghẹ ne etẹn khian ya gha ru abọ ni rre ototọ asefẹn ọghe Rhiegbe Ye Iwinna Ikporhu Iyẹn Nọ Maan. Ọna sẹtin zẹ wẹẹ a ma gbe ẹghẹ.

 15. Ọsiemwiẹnro Ọghe Ẹbu Ediọn: Vbọ gberra abọ ọghe owebe, ọsiemwiẹnro ọghe ẹbu ediọn ẹre ọ khian gha ghae ọta hia ọghe iko ne etẹn. Irẹn ẹre ọ khian vbe gha ghae re ne dọmwadẹ ediọn na kpasẹ yi ighẹ abọ ọghe olaga nọ rrọọ vbuwe uzọla uzọla. Ọsiemwiẹnro ọghe ẹbu ediọn kevbe ọgbaroghe ọghe Iko Uyinmwẹ Kevbe Iwinna Ọghe Ima, ghi ku obọ gbe na miẹn wẹẹ, a sikaẹn ye ebọdi ighẹ, ebe na ru emwamwa hia fẹrẹ ọghe nene iko yi.

  16. Ọbude Ọghe Etẹn Ni Ya Ọta Guan: Adeghẹ emwi nọ gha gia ru nọ, ọ khẹke ne ọkpa vbe ediọn na khian loo ye iwinna na, gha re ọmunu nọ guẹ vbene a ya ye ọta guan hẹ. Iwinna ọbude ọghe etẹn ni ya ọta guan keghi re adia na rhie ne ediọn kevbe eguọmwadia iwinna vbe ẹkhokho deghẹ esa na gha rrọọ, vbe nọ dekaan abọ ne iran rhirhi ru. Ọna keghi dekaan abọ ọghe iran vbe Iko Uyinmwẹ Kevbe Iwinna Ọghe Ima, ọta azagba, kevbe abọ ọghe na siẹnro ẹre ra na tie vbe Iruẹmwi Ebe Owa Ọkhẹ ra Iruẹmwi E Baibol Ọghe Iko. (Ya ghee  okhuẹn 9.) Adeghẹ ediọn bun vbe iko nii, ni wa guẹ vbene a ya ye ọta guan kevbe vbene a ya maa ọmwa emwi hẹ, a sẹtin gha loo ediọn ughughan ni gbegba vbe ukpo ukpo zẹvbe ọbude ọghe etẹn ni ya ọta guan. Esa i rrọọ, ne ọbude ọghe etẹn ni ya ọta guan gha ya rhie adia ne etẹn vbe ẹghẹ ne iran rhirhi ya ru abọ ọghe iran.

 17. Iko Na Do Vbe Ughugha Ọvbehe: Iko sẹtin ru emwamwa ọghe iko na do vbe ughugha ọvbehe, na khian na gha ru abọ ọghe owebe, sokpan ọna hẹnhẹn egbe yan vbene etẹn ni ru abọ ọghe owebe bun sẹ hẹ vbe iko nii. Ọ khẹke ne egbe iko vberriọ na do vbe ughugha ọvbehe gha mwẹ ọtẹn nọ gbegba nọ dia re. Ọ gha maan sẹ, deghẹ ọtẹn na, na gha re ọdiọn vbuwe iko. Vbe iko ne ediọn i na bun, a sẹtin loo ọguọmwadia iwinna nọ gbegba. Ẹbu ediọn ẹre ọ khian zẹ ọtẹn nọ khian gha winna iwinna na, iran ẹre ọ khian vbe tae deghẹ emwa ughughan ẹre ọ khian gha ru ẹre. Ọtẹn nọ khian gha siẹnro ẹre, ghi lele adia nọ rre  okhuẹn 8. Adeghẹ iko na do vbe ughugha ọvbehe na gha rrọọ, a ghi khama etẹn ni mwẹ obọ vbe abọ ọghe owebe ne iran gha rrie avbe ughugha nii, vbe iyeke abọ ọghe Gualọ Emwi Ewe Ọghe Orhiọn. Iran ghi werriegbe do deba etẹn nikẹre vbe iyeke asefẹn ọghe Rhiegbe Ye Iwinna Ikporhu Iyẹn Nọ Maan. Deghẹ a na gha guan yan e vidio, etẹn ni rre ughugha ọvbehe ghi kẹ evba gha ghee ẹre ra gha danmwehọ re, deghẹ ọ na gia ru. Deghẹ ẹi re erriọ, ọtẹn nọ siẹnro iko na, ghi loo vbene efoni ra e tablẹt ye ya kpee vidio na. Ọ gha kpee ẹre nẹ, irẹn vbe etẹn ni rre nene ughugha ghi koko ziro yan rẹn.

 18. E Vidio: Emwamwa rrọọ na khian ya gha kpee vidio eso vbuwe ẹghẹ na khian ya gha do iko na. U gha sẹtin ya efoni kevbe kọmputa danlod e vidio eso na loo vbe iko na do vbuwe uzọla vbe JW Library app. Ugbẹnso, a sẹtin kpee vidio ọghe vbene a ya kporhu hẹ, vbe iko ọghe emwamwa ikporhu, vbe a gha ghi kpee ẹre nẹ vbe Iko Uyinmwẹ Kevbe Iwinna Ọghe Ima.

© 2018 Watch Tower Bible and Tract Society of Pennsylvania

S-38-ED 9/18