Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 4

Ọmokhuo Nọ Ye Ẹko Rhiẹnrhiẹn Erhae Kevbe Jehova

Ọmokhuo Nọ Ye Ẹko Rhiẹnrhiẹn Erhae Kevbe Jehova

De eyan ne Jẹfta ru vbe emwa na nia gie Jehova?

Ọ ma gha khuẹrhẹ, sokpan ovbie Jẹfta keghi mu eyan ọghe erhae sẹ

U bẹghe ọmokhuo nọ rre efoto na ra?— Ovbie okpia ọkpa na tiẹre Jẹfta ẹre nọ. E Baibol ma ta eni rẹn ma ima, sokpan ma rẹn wẹẹ, irẹn keghi ye ẹko rhiẹnrhiẹn Erhae kevbe Jehova. Gia ruẹ vbekpae ọmokhuo na kevbe erhae ighẹ e Jẹfta.

Ọmwa esi ẹre Jefta wa gha khin, kevbe ẹghẹ hia ẹre ọ ya ma ovbiẹre nokhuo emwi vbekpae Jehova. Ọ keghi re okpia nọ wegbe kevbe ọkaolotu nọma. Rhunmwuda ọni, Ivbie Izrẹl na tama rẹn nọ do karo niran ya gu eghian ọghe iran khọn.

E Jẹfta keghi na erhunmwu ne Osanobua ru iyobọ ne irẹn ya khọnmiotọ. E Jẹfta na ru eyan wẹẹ, adeghẹ irẹn na khọnmiotọ, irẹn gha yae fiohan ne Jehova ọmwa nokaro nọ ladian do gbọbokhian ne irẹn vbe irẹn gha se owa. Ọmwa na ghi diẹya kevbe  wẹẹ, ọ gha winna vbe ibọkpọ ọghe Osanobua vbe ẹdẹ agbọn rẹn hia fẹrẹ. Ne ibọkpọ keghi re owa ne emwa na ga Osanobua vbe ẹghẹ nii. Ọ keghi sunnu wẹẹ, e Jẹfta na khọnmiotọ vbe igbinna nii. U rẹn ọmwa nọ ka ladian vbe uwe owa re do gbọbokhian nẹ ra?—

Ẹẹn, ovbiẹre nokhuo ẹre nọ! Ukpọmọ ọkpa ọghe Jefta ẹre irẹn ghaa khin. Nia, te Jẹfta khian ghi giẹ kpa hin owa rre. Ọ na keghi wa kakabọ dae rua. Sokpan yerre wẹẹ, ọ ru eyan. Ọwarọkpa nii, ovbiẹre keghi tama rẹn wẹẹ: ‘Baba, u ru eyan ma e Jehova nẹ, ọ khẹke nu muẹnsẹ.’

Vbe ukpukpo, avbe ọse ọghe ovbie Jẹfta kegha mu otuẹ giẹ

Ọ wa vbe da ovbie Jẹfta rua. Ẹi khian sẹtin rọnmwẹ ọdọ kevbe nọ vbe biẹlẹ emọ vbe ibọkpọ nii. Irẹn ke wa gha hoo nirẹn ye ekhọe hia muẹnsẹ, eyan ọghe erhae kevbe nọ ye ẹko rhiẹnrhiẹn e Jehova. Ọni ẹre ọ ru ekpataki nirẹn sẹ nọ rọnmwẹ ọdọ ra nọ biẹlẹ emọ. Rhunmwuda ọni, ọ na kpa hin owa rre, kevbe ọ na do gha rre ne ibọkpọ rhinrin vbe ẹdẹ agbọn rẹn hia.

Wẹ roro ẹre wẹẹ, emwi nirẹn ru ye ẹko rhiẹnrhiẹn erhae kevbe Jehova ra?— Ẹẹn, ọ ye ẹko rhiẹnrhiẹn iran! Adeghẹ u na gha họn ẹmwẹ kevbe u na hoẹmwẹ e Jehova, u gha yevbe na ghe ovbie Jẹfta nokhuo. Wẹ gha vbe ye ẹko rhiẹnrhiẹn erha, iyuẹ, kevbe Jehova.

TIẸRE VBE BAIBOL RUẸ

  • Diuteronomi 6:4-6

  • Giọgis 11:30-40

  • 1 Kọrinti 7:37, 38