Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 5

E Samuẹl Wa Gha Ru Emwi Esi Vbe Ẹghẹ Hia

E Samuẹl Wa Gha Ru Emwi Esi Vbe Ẹghẹ Hia

Ke ẹghẹ ọvbokhan gha de, ẹre Samuẹl ke wa gha rrọọ vbe ibọkpọ ọghe Osanobua, ọ na vbe gha winna vba. Ibọkpọ na, ẹre emwa na do gha ga e Jehova. Wẹ rẹn vbene Samuẹl do ya gha rre ibọkpọ ni hẹ ra? Gia ka ruẹ nẹ, vbekpae iye Samuẹl ighẹ Hanna.

Vbe ẹghẹ nọ kpẹre, Hanna wa gha gualọ ọmọ, sokpan ọ ma miẹn. Ọ na ghi na erhunmwu gie Jehova nọ ru iyobọ nẹ. Irẹn na ghi ru eyan wẹẹ, adeghẹ irẹn na sẹtin bie ọmokpia, irẹn ghi rhiẹre ya ye owa ọghe Osanobua nọ gha winna vba. E Jehova keghi họn erhunmwu ọghẹe, ọ na ghi bie ọmokpia. Eni nọ mu nẹ ọre Samuẹl. Zẹ vbene Hanna yan rẹn, vbe Samuẹl ghi rre odẹ ukpo eha ra enẹ, ọ na rhie ẹre gha rrie ne ibọkpọ nọ gha ga e Jehova vba.

Ogiohẹn ẹre Elai ghaa khin vbe ne ibọkpọ. Ivbiẹre nikpia eva na vbe gha ga vba. Yerre wẹẹ, ne ibọkpọ keghi re owa ugamwẹ ọghe Osanobua, kevbe ọ khẹke ne emwa gha ru emwi nọma vbe vba. Sokpan ivbie Elai nikpia na wa gha ru emwi dan ne sẹlẹkẹ. E Samuẹl bẹghe emwi niran ghaa ru. E Samuẹl deba ivbie Elai gha ru emwi dan ra?Ẹn o, ọ na wa gha ru emwi nọma vbe ẹghẹ hia zẹ vbene erhae vbe iyẹ ma re nọ gha ruẹ.

De emwi ne uwẹ roro wẹẹ, ọ khẹke ne Elai ru vbekpae ivbiẹre?— Ọ te khẹke nọ rrie iran oya. Ọ ma te khẹke nọ ye kue niran gha ga vbe owa ọghe Osanobua. Sokpan Elai ma ru vberriọ, rhunmwuda ọni, ohu ẹre kevbe ọghe ivbiẹre nikpia eva kegha mu e Jehova. E Jehova na ghi tae wẹẹ, te irẹn khian rrie iran oya.

E Samuẹl tama Elai uhunmwiu ne Jehova gie

Vbe asọn ọkpa vbe Samuẹl ghi vbiẹ, ọ keghi họn vbe ọmwa tiẹre: ‘Samuẹl!’ Ọ na rhulẹ bu Elai, sokpan Elai na kha wẹ, ‘I ma tie ruẹ.’ Emwi na keghi werriegbe sunnu igbava. Vbe iyeke nogieha, Elai na tama Samuẹl wẹẹ, ọ gha werriegbe họn vbe ọmwa tiẹre, ọ ghi kha wẹẹ: ‘Lahọ gu mwẹ guan e Jehova, I danmwehọ.’ Erriọ e Samuẹl rure. Ẹre Jehova na ghi tama e Samuẹl wẹẹ, ‘Tama Elai wẹẹ, te I khian rrie ẹgbẹ ọre oya ye emwi dan niran he ru.’ We roro ẹre  wẹẹ, ọ wa khuẹrhẹ ne Samuẹl nọ ta ẹmwẹ na ma Elai ra?Ẹn o, ọ ma khuẹrhẹ. Sokpan, agharhemiẹn wẹ, ohan ghaa mu e Samuẹl, ọ ru emwi ne Jehova tama rẹn nọ ru. Ẹmwẹ ne Jehova tae gele sunnu. A keghi gbele ivbie Elai nikpia eva rua, kevbe Elai na vbe wu.

Uyinmwẹ ọghe Samuẹl keghi re nọma nima gha ye egbe taa. Ọ ru emwi nọma, agharhemiẹn wẹẹ, ọ bẹghe ẹre vbe emwa ọvbehe ru emwi dan. Uwẹ vbe vbo? Wẹ gha ye egbe ta e Samuẹl nu gha ru emwi nọma vbe ẹghẹ hia ra? U gha ru vberriọ, u gha ye ẹko rhiẹnrhiẹn erha, iyuẹ, kevbe Jehova.

TIẸRE VBE BAIBOL RUẸ

  • 1 Samuẹl 2:22-26; 3:1-21