Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 9

E Jerimaia Ma Dunu Yi Nẹ Ghẹ Guan Vbekpae Jehova

E Jerimaia Ma Dunu Yi Nẹ Ghẹ Guan Vbekpae Jehova

Vbọzẹ ne ohu e Jerimaia na gha mu ivbie ẹvbo ẹre?

E Jehova miẹ e Jerimaia fan

Ugbẹnso, emwa gha ye ima gbogiẹ ra iran gha mu ohu ima vbe ima ghaa guan vbekpae Jehova. Ọna sẹtin wa yae khan ima na gha guan vbekpae Osanobua. Uwẹ he ka roro vberriọ ẹdẹ ra?E Baibol gu ima guan vbekpae ọvbokhan ọkpa nọ hoẹmwẹ e Jehova, sokpan ọ na te wa khanrẹn na gha guan vbekpae Jehova. Eni rẹn ọre Jerimaia. Gia ruẹ sayọ vbekpa re.

Vbe ẹghẹ ne Jerimaia na gha rre igbama, e Jehova na tama rẹn nọ yobọ sekhae nẹ ivbie ẹvbo re niran dobọ emwi dan na ru yi. Iwinna na wa gha lọghọ e Jerimaia na ru, kevbe wẹẹ, ohan vbe gha muẹn. Ọ na tama Jehova: ‘I ma rẹn ẹmwẹ ni khian ta. Ọvbokhan kherhe ẹre I khin.’ Sokpan e Jehova na tama rẹn wẹẹ: ‘Ghẹ gie ohan muẹn. I gha ru iyobọ nuẹ.’

 Rhunmwuda ọni, e Jerimaia na suẹn gha yobọ sekhae ne emwa nii wẹẹ, a gha rrie iran oya deghẹ iran ma na fiwerriẹ. Wẹ roro ẹre wẹẹ, emwa nii ru emwi ne Jerimaia tae ra?Ẹn o. Iran na yae gha gbogiẹ, ra ohu ẹre na gha mu iran. Eso vbuwe iran na kue gha hoo ne iran gbẹ rua! Vbe uwẹ a roro ghẹ ekhọe Jerimaia ghaa ye hẹ?Ohan na gha muẹn, ọ na kha wẹẹ, ‘Ii khian ghi werriegbe guan vbekpae Jehova.’ Sokpan egbe gele wọọ irẹn ra?Ẹn o, egbe ma wọọ re. Ọ hoẹmwẹ e Jehova sẹrriọ wẹẹ, ọ ma sẹtin dunuyi nẹ ghẹ guan vbekpa re. Kevbe wẹẹ, rhunmwuda ne egbe ma na wọọ e Jerimaia, e Jehova ma kue na gbẹ rua.

Vbe igiemwi, emwa dan eso vbe ẹdẹ ọkpa na fie Jerimaia fie uwe uvun nọ dinmwi nọ vuọn nẹ ekhuọrrọ. Ọ ma miẹ evbare re, ọ ma vbe miẹ amẹ wọn. Te emwa dan nii te wa gha hoo niran sẹ e Jerimaia rae ye evba nọ wu. Sokpan e Jehova keghi ru iyobọ nẹ, ọ na sẹtin lẹfe!

De emwi nu gha miẹn ruẹ vbe igiemwi ọghe Jerimaia?Agharhemiẹn wẹẹ ohan ghaa mu irẹn ugbẹnso, ọ ma dunu yi nẹ ghẹ guan vbekpae Jehova. U ghaa guan vbekpae Jehova, emwa sẹtin ya ruẹ gbogiẹ, ra ohu ruẹ gha mu iran. Ekhue ra ohan sẹtin gha mu ruẹ. Sokpan ghẹ dunu yi hiehie nu ghẹ guan vbekpae Jehova. Ọ gha ru iyobọ nuẹ vbe ẹghẹ hia, zẹvbe nọ ru iyobọ ne Jerimaia.

TIẸRE VBE BAIBOL RUẸ

  • Jerimaia 1:4-8; 20:7-9; 26:8-19, 24; 38:6-13