Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 3

Ekhọe Orriara—Adeghẹ Ima Vbe Ọtẹn ‘Gba Mwẹ Egbe Ẹzọ’

Ekhọe Orriara—Adeghẹ Ima Vbe Ọtẹn ‘Gba Mwẹ Egbe Ẹzọ’

“Ọtẹn nokhuo ọkpa vbe iko ne I ye, keghi zẹ ba mwẹ wẹẹ, I do irẹn igho rhie. Emwa ọvbehe vbuwẹ iko ghi họn ẹmwẹ na, iran na wa deba re. Vbe okiekie, ọtẹn nokhuo na, na ghi vbe tama mwẹ wẹẹ, emwi eso rrọọ ne irẹn họn nọ rhiẹre ma wẹẹ, ima rẹn ọkpa ima rẹn eva. Agharhemiẹn wẹẹ, ọ do rinmwian mwẹ, I na ye gha mwẹ ọnrẹn vbe ekhọe wẹẹ, I i khian sẹtin yabọ ẹre, rhunmwuda emwi nọ ye aro mwẹ miẹn.”—Linda.

U GHA sẹtin daa ne Linda, zẹvbe ne ọ ya balọe se ugboloko ighẹ emwi ne ọtẹn ne iran gba ga ru ẹre ra? Ọ keghi re emwi nọ da ọmwa wẹẹ, emwa eso wa gie uyinmwẹ ọghe emwa ọvbehe rrua iran owẹ sẹ vberriọ wẹẹ, a de ghe iyeke na do gha rre ugamwẹ ọghe iran. Ọ he sunnu da uwẹ vberriọ ẹdẹ ra?

Ọmwa Rhọkpa Gha Sẹtin “Wannọ Ima Hin Ahoẹmwọmwa Ọghe Osanobua Rre Ra”

Vbene ẹmwata, ọ sẹtin gha rẹ evbọ kakabọ lọghọ na yabọ ọtẹn nọ ru ima khọọ. Sẹ ehia, ọ khẹke ne Ivbiotu e Kristi gha hoẹmwẹ egbe. (Jọn 13:34, 35) Adeghẹ ọtẹn na gba ga na ru ima emwi khọọ, egbewọmwẹ kevbe obalọ nọ lelẹe khian keghi re nọ ze ẹbe.Psalm 55:12.

Vbene ẹmwata, e Baibol khare wẹẹ ẹghẹ eso rrọọ ne Ivbiotu e Kristi ya ru emwi nọ do gha ye iran ‘mwẹ egbe ẹzọ.’ (Kọlose 3:13) Ọrheyerriọ, ugbẹnso adeghẹ ima tobọ ima vbe ọtẹn ọvbehe ẹre ọ gba mwẹ egbe ẹzọ, ọ sẹtin gha lọghọ ima na sẹtin sọfurre yọ. Emwi rhọkpa rrọọ nọ gha ru iyobọ ne ima ra? Ziro yan ilele eha ọghe Evbagbẹn Nọhuanrẹn:

Erha mwa nọ rre ẹrinmwi rẹn emwi hia. Aro e Jehova keghi sotọ vbe egbe emwi hia nọ sunnu, deba a gbe ọmwa ekueku nọ rhirhi gha khin, kevbe usẹ nọ si ye ima egbe. (Hibru 4:13) Yevbesọni, e Jehova keghi tohan ima vbe ima gha se usẹ. (Aizaia 63:9) Irẹn i kue hiehie ne “orueghe ra ọlọghọmwa” ra emwi ọvbehe—uhiẹn ọguọmwadia ọghe irẹn ọvbehe—“wannọ ima hin ahoẹmwọmwa ọghe Osanobua rre.” (Rom 8:35, 38, 39) Ọ ma khẹke ne ima vbe gha mwẹ egbe ekhọe vberriọ wẹẹ, ima i khian kue ne emwi ke emwi ra ọmwaikọmwa la ẹkpo ima vbe Jehova ra?

Na yabọ ma rhiema wẹẹ, te a kue ye emwi dan. Adeghẹ ima na yabọ emwa ni ru ima khọọ, ọni ma rhiema wẹẹ te ima biabia re rua, ra te ima yẹrike, ra te ima kueyọ uyinmwẹ ọghe iran. Yerre wẹẹ e Jehova ma kpasẹ ye orukhọ na ru hiehie, sokpan irẹn keghi yabọ deghẹ esa na gha rrọọ nọ ru vberriọ. (Psalm 103:12, 13; Habakọk 1:13) Ne irẹn na bu ima ude ne ima gha yabọ emwa ọvbehe, te Jehova tama ima ne ima gha ya egbe ta irẹn. Irẹn i “mu ohu ne ai mu ye otọ.”Psalm 103:9; Matiu 6:14.

Ima gha mu ohu fua, egbe ghi vbe rọkhọ ima. De odẹ nọkhin? Ye aro ekhọe ruẹ ghee igiemwi na. U rhie ikpokuta vbe otọ, egbọre ne ikpokuta ma khua gbe, u daeyi vbe obọ ruẹ nu niẹn uan. Ẹi khian khua ruẹ adeghẹ ovbiẹghẹ kherhe ẹre u ya daeyi. Sokpan deghẹ u na ghi hoo nu daeyi la ẹghẹ nọ taẹn vbo? Vbua khian daeyi kpẹẹ sẹ hẹ?—ifuanro eso nọ ra? ukẹdẹ eso nọ ra? ra ọ gha kpẹẹ sẹ ọni? Vbene ai na gbe awawẹ, obọ ghi do yan ruẹ! Vbene ẹmwata, afiwerriẹ i khian gha rrọọ vbe nọ dekaan vbene okuta nii gele khua sẹ hẹ. Sokpan vbene u ya daeyi kpẹẹ, erriọ khian ya gha khua sayọ vbe obọ ruẹ. Erriọ vbe ye ighẹ ohu  na sẹ rae ye ẹko. Vbene ohu ya kpẹẹ vbe ẹko ima—a gha we te ọ ye kherhe—erriọ vbe ya rhie ikuaengbe ne ima. Ẹi khabe ne Jehova na bu ima ude ne ima gha mu ohu fua. Gelegele, umamwẹ ọghe egbe ima ẹre ima ya re gualọ, deghẹ ima na mu ohu fua.—Itan 11:17.

Ima gha mu ohu fua, egbe ghi vbe rọkhọ ima

“Ọ Na Yevbe Na Miẹn Wẹẹ e Jehova Tobọre Ẹrọ Wa Gha Gu Mwẹ Guan”

Vbọ ru iyobọ ne Linda nọ ma na sẹ ye ekhọe, ighẹ emwi ne ọtẹn ni iran gba ga ruẹre? Ọkpa vbe usun emwi ne irẹn ru ọre wẹẹ, ọ na gha muẹn roro emwi ne Evbagbẹn Nọhuanrẹn khare nọ dekaan evbọzẹ na gha na mwẹ ayabọ. (Psalm 130:3, 4) Evbọ mobọ gu e Linda kpa ọre ne irẹn na rẹn wẹẹ, ma gha yabọ emwa, e Jehova ghi vbe yabọ ima. (Ẹfisọs 4:32–5:2) Vbe nọ dekaan vbene iziro vberriọ ya dekaan irẹn hẹ, ọ keghi kha wẹẹ: “Ọ na yevbe na miẹn wẹẹ e Jehova tobọre ẹrọ wa gha gu mwẹ guan.”

Vbọ ghi se ẹghẹ, e Linda na do sẹtin mu ohu fua. Ọ na ye ekhọe hia yabọ ọtẹn nokhuo nii, kevbe ọse ne kankankan ẹre irẹn vbe ọre ghi khin nia. Te Linda ghi mwẹ alaghodaro vbe ugamwẹ ọghe Jehova. Gha mwẹ ọnrẹn vbe ilẹkẹtin wẹẹ, Jehova hoo nọ ru iyobọ nuẹ vbe ya ru vberriọ.