Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

E Lẹta ne Ẹbu Nọ Su Gbẹn Rre

E Lẹta ne Ẹbu Nọ Su Gbẹn Rre

Ọtẹn nọ ghaan:

Zẹvbe nu rẹnrẹn, emwa ẹre Baibol mobọ wa guan kaan. Nibun vbe iran na, keghi re ikpia vbe ikhuo ni mwẹ ẹkoata, ni werrie aro daa avbe edanmwẹ ni khọ ọghe ima. “Ọmwa vbene ima ye” ẹre iran vbe gha khin. (Jems 5:17) Eso kegha re ne osi kevbe ọlọghọmwa wa siẹn yan ginna otọ. Eso vbe gha rrọọ ne etẹn vbuwe ẹgbẹẹ ra etẹn na gba ga, wa vbe ru ẹre emwi nọ balọ ọmwa se ugboloko. Nibun vbe gha rrọọ, ne ekhọe iran wa vbe gha fi iran uwẹnrhiẹn rhunmwuda emwi abakuru ne iran ru.

Egbe emwa vberriọ wa sẹ e Jehova rae fẹfẹfẹ ra? Ẹn o. Nibun keghi yevbe na ghe ọsihuan nọ na erhunmwu wẹẹ: ‘I bibi odẹ vbe na ghe ohuan nọ wiri. Gualọ ọguọmwadia ruẹ, rhunmwuda I ma he miamia avbe iyi ruẹ.’ (Psalm 119:176) Egbe iro vberriọ ẹre ọ vbe rre uwẹ ekhọe ra?

E Jehova i miamia eguọmwadia ọghẹe ni wii oghẹn hiehie. Nọghayayerriọ, ọ keghi ru iyobọ ne iran—vbene ọ na mobọ loo emwa ne iran gba rrọọ vbe iyayi. Vbe igiemwi, muẹn roro vbene Jehova ya ru iyobọ ne Job ne ọguọmwadia ọghẹe hẹ, vbe ẹghẹ ne orueghe ughughan ya dekun ẹnrẹn—usun orueghe na keghi re emwi ewe ọghẹe hia nọ wii ẹre, uwu ọghe ivbiẹre, kevbe emiamwẹ nọ wegbe nọ dekun ẹnrẹn. E Job vbe zin ẹmwẹ obalọ ne emwa nọ te khẹke nọ ru iyobọ ne irẹn, ghaa tama rẹn. Sokpan ọ ma fi iyeke gbe Jehova hiehie, agharhemiẹn wẹẹ ẹghẹ ghaa rrọọ nọ ya gha mwẹ iziro nọ ma gba. (Job 1:22; 2:10) De vbene Jehova ya ru iyobọ ne Job hẹ ya werriegbe gha mwẹ iziro nọ gbae?

Odẹ ọkpa ne Jehova ya ru iyobọ ne Job, ọre ne ọ na loo ọse ọre ọkpa nọ vbe ga Osanobua, na tiẹre Elihu. Vbe ẹghẹ ne Job ya gha ta emwi nọ kpokpo irẹn vbe orhiọn, Elihu keghi danmwehọ, ekhọe re na ghi guaekpa nọ guan. De ẹmwẹ nọ khian ghi ta nia? Te ọ khian ghi ya unu zaan e Job ra, ra te ọ khian ta ẹmwẹ nọ gha ye ekhọe Job gha fi ẹre uwẹnrhiẹn, ra nọ gha ye ekhue muẹn? Elihu ghe egbe irẹn zẹvbe ọmwa nọ maan sẹ e Job ra? Hiehie! Zẹvbe ne orhiọn nọhuanrẹn ọghe Osanobua ya guaekpa, Elihu keghi kha wẹẹ: “Ọkpa ẹre imẹ vbe ruẹ khin vbe odaro Osanobua, obuẹ ọre a ya ma, ima eveva.” Ọ ghi ta ọna nẹ, ọ na ghi rhie ilẹkẹtin ne Job wẹẹ: “Emwi ọkpa nọ gha ye ohan mwẹ gha muẹn i rrọọ, imẹ i ra dee yan ruẹn.” (Job 33:6, 7) Ne ọ gha te ya ta ẹmwẹ nọ gha ye ọlọghọmwa ọghe Job tua sayọ, Elihu keghi ye ahoẹmwọmwa rhie ibude kevbe igiọdu nọ rre ye ẹghẹ ne Job.

Lahọ, ma hoo nu rẹn wẹẹ egbe ekhọe ahoẹmwọmwa vberriọ ẹre ima vbe mwẹ, nọ ye ima gbẹn ebe ẹmu na. Vbe okaro ima keghi danmwehọ, ima na vbe muẹn roro ẹmwẹ ne emwa nibun ni wii oghẹn tae, kevbe vbene emwi ghaa ye iran hẹ. (Itan 18:13) Ẹre ima na vbe ya ghee uwe Evbagbẹn Nọhuanrẹn, ima na vbe na erhunmwu ma ke zanzan evbagbẹn yotọ nọ dekaan vbene Jehova ya ru iyobọ ne eguọmwadia ọghẹe hẹ vbe ẹghẹ nọ gberra, vbe iran ghaa rre uwẹ ọlọghọmwa vberriọ. Vbe okiekie, ima na ghi do kuẹ kugbe avbe okha ọghe Evbagbẹn Nọhuanrẹn nii, ya ba evbọ sunnu vbe ẹghẹ ne ima ye na. Ena hia ẹre ima ghi ya ru ebe ẹmu na. Ima ye oyaya gie na tie ruẹ nu do zanzan ebe na. Lahọ gha mwẹ ọnrẹn vbe ilẹkẹtin wẹẹ, ma ye ekhọe hia hoẹmwẹ ruẹ.

Ẹbu Nọ Su Ọghe Avbe Osẹe Jehova