Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 Abọ 9

U Gha Miẹn Afiangbe Ọghe Etẹbitẹ Vbe Ugamwẹ Ẹmwata!

U Gha Miẹn Afiangbe Ọghe Etẹbitẹ Vbe Ugamwẹ Ẹmwata!

1. De ere ne ima khian miẹn vbọ deghẹ ima na “sikẹ Osanobua”?

E JEHOVA hoẹmwẹ emwa ni gae. U ghaa ga e Jehova, ọ gha fiangbuẹ nia kevbe ẹghẹ nọ dee vbe odaro. E Baibol khare wẹẹ: “Wa sikẹ Osanobua, irẹn gha vbe sikẹ uwa.”—Jems 4:8.

2. De vbene ima khian ya sẹtin sikẹ Osanobua? De vbene ọna ya dekaan erhunmwu ne ima na?

2 Ne ima mieke na sẹtin sikẹ Osanobua, te ọ khẹke ne ima gha ya emwi ne ima ruẹ vbe Baibol ru emwi. E Jehova gha họn erhunmwu ruẹ deghẹ ọ gu ahoo ọghẹe ro. Ukọ e Jọn keghi gbẹn wẹẹ: ‘Ọna ọ si ẹre ne afianma i na fian ima vbe odaro Osanobua, aro ima dae wẹẹ, rẹn gha ruẹ, adeghẹ ma nọ rẹn emwi, zẹ vbene ọ gu ahoo ọghẹe ro. Ẹghẹ ke ẹghẹ ne ima ya nọ rẹn emwi, ọ wa họn, ugbẹnvbe ima ghi rẹn nẹ wẹẹ ẹmwata ọna khin, ma mwẹ ilẹkẹtin wẹẹ, emwi ne ima rhirhi nọ rẹn, ọ gha ruẹ ne ima.’—1 Jọn 5:14, 15.

3-7. De vbene ima khian ya sẹtin gha mwẹ ewaẹn nọ ke obọ Osanobua rre? De afiangbe ne ima gha lae miẹn?

3 Yevbesọni, zẹvbe ne u ya sikẹ Osanobua sayọ, irẹn gha rhie ẹwaẹn nuẹ, nu ya guẹ orhikhan ọghe agbọn na loo. E Baibol khare wẹẹ: ‘Deghẹ a miẹn nẹi mwẹ ẹwaẹn vbe uwu uwa, we nọ na erhunmwu gie Osanobua.’—Jems 1:5.

4 De vbene ẹwaẹn nọ ke obọ Osanobua rre gha ya ru iyobọ nuẹ? Okaro, ọ gha ru iyobọ nuẹ ya rẹn emwi nẹi ya ẹko rhiẹnrhiẹn e Jehova. U ghi vbe rẹn evbọzẹ ne emwi vberriọ i na ya ẹko rhiẹnrhiẹn ọnrẹn kevbe odẹ nu gha ya gbaengbe ne iran. Irẹnmwi na gha ru iyobọ nuẹ, nu ghẹ de fi ọlọghọmwa ne emwa nagbọn werriẹ aro daa. Vbe igiemwi, ma gha lele adia ọghe Osanobua nọ dekaan uyinmwẹ esakan, ma i khian de fi avbe ọlọghọmwa vbenia: okpe emianmwẹ na mu vbe oghẹ, ẹko na mu vbe oghẹ kevbe orọnmwẹ nọ vuọn ne oyanghan nọ ghi ya ọdọ vbe amwẹ sọ ebe orọnmwẹ.

5 De iyobọ ọvbehe ne ẹwaẹn nọ ke obọ Osanobua rre gha ru nuẹ? Ọ gha ru iyobọ nuẹ ya sẹtin loo arrọọ ọghuẹ vbe odẹ nọ ghi maan sẹ. Ọ gha ru iyobọ nuẹ ya gha ye ẹwaẹn loo igho ruẹ. Ẹkpotọ ghi do kie nuẹ ya gha khu ẹre khian avbe evba kọnrẹn nọ mwẹ evbọ demu, ẹi re nẹi mwẹ esa.

6 Ẹwaẹn nọ ke obọ Osanobua rre gha sẹtin ya ruẹ gu emwa ọvbehe gha mwẹ asikẹgbe nọ maan. Ẹgbẹe ruẹ ghi do gha mwẹ oghọghọ sayọ. U do gha mwẹ avbe ọse nu gba ẹko ẹre, uhiẹn emwa nẹi ga Osanobua ghi gha ya ọghọ nuẹ.

7 Ẹwaẹn nọ ke obọ Osanobua rre gha sẹtin ya ruẹ khian ọmwa nẹi ghi si osi. Ọ gha ru iyobọ nuẹ ya sẹtin guẹ loo avbe ọlọghọmwa nu werriẹ aro daa kevbe wẹẹ, u vbe sẹtin ziengbe deghẹ emwi nu te yaro yi ma ghi sẹ obọ. Deba ọni, u do gha mwẹ ayayẹro wẹẹ, emwi hia gha dunna vbe odaro. Deghẹ ima i ghi si osi, orhiọn ima ghi sotọ, egbe ghi vbe rran ima sayọ.—Itan 14:30; Aizaia 48:17.

8. U ghaa ga Osanobua, de ohan emwi nẹi khian ghi gha muẹn?

8 U ghaa ga Osanobua ọghe ẹmwata, ohan i ghi muẹn vbe nọ mu emwa ne Esu bibi ọre  odẹ. U i khian gha mu ohan emwa ni wulo nẹ, rhunmwuda u rẹnrẹn wẹẹ, iran i sẹtin rhie ikuaengbe nuẹ. Rhunmwuda u mwẹ ilẹkẹtin wẹẹ, Osanobua gha huọn emwa ni wulo kpaegbe, u i ghi mu ohan uwu. Ne u na rẹn wẹẹ Osanobua ọre olẹtin, u i ghi mu ohan azẹn kevbe emwa ni ze ọbo edunna.—Jọn 8:32.

Emwa Esi Ẹre Khian Yin Agbọn Na

9-11. De emwa ni khian gha rre Paradais? De emwa nẹi khian gha rrọọ?

9 U gha sikẹ Osanobua, u i ghi si osi ba ẹmwẹ vbene emwi khian gha ye hẹ vbe odaro. Ọlọghọmwa ne emwa werriẹ aro daa vbe ẹdẹnẹrẹ keghi re na gbẹn yotọ vbe Baibol. E Jehova khare wẹẹ, ovbi ẹghẹ kherhe ẹre avbe ọlọghọmwa na khian ya vbe otọ; vbe nẹi khian ghi kpẹ gbe, Arriọba Osanobua gha do ya uhunmwu otagbọn na khian e paradais.—Luk 21:10, 11, 31; 23:43.

10 Emwa ni sikẹ e Jehova ọkpa kevbe ni gae, ẹre ọ khian la e Paradais. E Baibol khare wẹẹ: “Vbe ọ ma he kpẹe wan, a gha ho emwa dan bẹkun. U gha gualọ iran sokpan u i ra miẹn iran. Sokpan emwa ọmẹhẹ ẹre ọ ra yan otọe nii, iran ghi vbe gha ye ọfunmwegbe zọmọ vbe uwu ẹre.”—Psalm 37:10, 11.

11 Emwa ni zẹ utun vbe ehọ, ni ma lele uhi ọghe Osanobua gha gbẹro vbe etẹbitẹ. (2 Tesalonaika 1:8, 9) Ai khian ghi werriegbe miẹn iran. Ọfuan ọghe etẹbitẹ ẹre ọ khian rhuan e Setan, avbe ugbogiorinmwi kevbe iran ni zẹ utun vbe ehọ. (Arhie maan 20:10, 14) Sokpan emwa ni ga e Jehova vbe odẹ ọghe ẹmwata ẹre ọ khian gha sọyẹnmwẹ vbuwe ọfunmwegbe vbe Paradais vbe uhunmwu otagbọn na.

Arrọọ Ne Gele Gele Nọ Dee Vbe Odaro!

12. De emwi ne Baibol khare vbekpae ẹghẹ nọ dee vbe odaro?

12 E Jehova mwamwa emwi ọyunnuan nibun yotọ khẹ emwa ni hoẹmwẹ ọnrẹn! Gima ziro yan emwi ne Baibol khare vbekpae vbene arrọọ khian gha ye hẹ vbe Paradais:

  • Evbare ghi kpọ vbe ehe hia: “Te evbare gha kpọ vbe otọe nii; te emwiokọ gha gba uhunmwu oke hia.”—Psalm 72:16.

  • Owa ne mose ni fu ọmwa egbe rre: ‘Emwa gha bọlọ owa, iran ghi vbe yin ẹnrẹn.’—Aizaia 65:21.

  • Iwinna ọyẹnmwẹ: ‘Iran gha miẹn ere vbe emwi ne iran miẹn ẹsọn yi. Emwi ne iran ru gha wa gha dinna odẹ.’—Aizaia 65:22, 23.

  • Ai ghi khuọnmwi: “Ai ghi vbe miẹn orhiọnkpa nọ gha kha wẹẹ rẹn khuọnmwi.”—Aizaia 33:24.

  • Ai ghi miẹn ọmwa ne egbe ma gba na: “Arhuaro gha bẹghe odẹ, ayin ehọ gha họn ẹmwẹ. Arọ gha san ghe odukhunmwu, ọ ghi gha kuu. Iran nẹi sẹtin guan gha davan ne oghọghọ.”—Aizaia 35:5, 6

  • Ai ghi miẹn obalọ, akhiẹ kevbe uwu: ‘Ọ gha khiẹn ameve hia hin aro iran rre. Uwu i khian ghi gha rrọọ, ra akhiẹ ra obalọ. A ho emwi nẹdẹ hia bẹkun nẹ.’—Arhie Maan 21:4.

  • Ai ghi miẹn okuo: “Ọ dobọ okuo yi vbe uhunmwu otọ agbọn hia.”—Psalm 46:9.

  • Arrọọ ọghe etẹbitẹ: ‘Emwa esi ẹre ọ khian yin agbọn na vbe etẹbitẹ.’—Psalm 37:29.

13. De ọmwa nọ khian sẹtin ye agbọn na khian paradais? Vbọzẹ nọ gha na sẹtin?

13 Emwa nagbọn i sẹtin ru ena rhọkpa, e Jehova ọkpa ẹre ọ mwẹ ẹtin na ya mu eyan rẹn sẹ. Emwi rhọkpa i sẹtin daa re obọ yi nẹ ghẹ ru emwi nọ rrọọ orhiọn. E Baibol khare wẹẹ: “Emwi ọkpa i rrọọ nẹi gie Osanobua ru.”—Luk 1:37.

14. Vbua khian ya sẹtin gha rre odẹ nọ su rrie arrọọ ọghe etẹbitẹ?

14 Lekpae ikporhu iyẹn nọma ne Avbe Osẹe Jehova kpee, e Jehova keghi kie ẹkpotọ ne emwa vbe ehe hia, ne iran ya “la onurho ne wẹnrẹn” nọ su rrie arrọọ ọghe etẹbitẹ. Gia miẹn wẹẹ, u deba emwa ni sọyẹnmwẹ rhunmwuda iran miẹn itie na yi. U vbe gha rre ugamwẹ ọghe ẹmwata nu mieke na sọyẹnmwẹ afiangbe ọghe Jehova vbe etẹbitẹ!—Matiu 7:13, 14.