Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 Abọ 2

De Vbene U Khian Ya Rẹn Ẹmwata Vbekpae Osanobua Hẹ?

De Vbene U Khian Ya Rẹn Ẹmwata Vbekpae Osanobua Hẹ?

1, 2. De igiemwi nọ rhiẹre ma wẹẹ, te ọ khẹke na gha mwẹ omwa na ya rẹn iyayi ọghe ẹmwata?

DE VBENE ima khian ya sẹtin rẹn Osanobua hẹ? Esa rrọọ na gha ya ru ezanzan ye imamwaemwi ọghe ugamwẹ hia ra? Ai vbe sẹtin. Uhiẹn deghẹ ima sẹtin, de vbene ima khian ya rẹn imamwaemwi ọghe ẹmwata hẹ?

2 Vbene ẹmwata, rhunmwuda iyayi ughughan ne emwa mwẹ vbekpae Osanobua, te ọ khẹke ne ima gualọ vbene ima gha ya rẹn odẹ ọghe ẹmwata ne emwa hia gha miẹn yi. Gia ru igiemwi yọ: Gia kha wẹẹ, emwa muan ẹmwẹ vbe ẹki vbekpae vbene ukpọn tan sẹ hẹ. Nọ khiẹn ọnrẹn wẹẹ, ọ sẹ e yad eha sokpan nọ khian dọe wẹẹ ọ ma sẹ vberriọ. De vbene a khian ghi ya zuze ye ẹmwẹ na hẹ? A ghi mwaan rẹn.

3. Vbọzẹ ne a na gbẹn e Baibol?

3 Ọ mwẹ omwa na ya rẹn iyayi ọghe ẹmwata ra? Ẹn, e Baibol nọ. Osanobua keghi loo emwa ya gbẹn e Baibol ne emwa vbe ehe hia mieke na sẹtin ruẹ vbekpae irẹn. Ai sẹtin ka inu e Baibol na he gbẹnnẹ ladian. A zedu ehia nẹ ra abọ eso vbọ vbe urhuẹvbo nọ gberra 2,600. Ọ lọghọ a ke miẹn ọmwa nẹi miẹn ẹmwata vbekpae Osanobua tie vbe urhuẹvbo ẹre.

4. De emwi eso ne Baibol guan kaan?

4 E Baibol keghi re emwi ọhẹ nọ hiunsi nọ ke obọ Osanobua rre. Ọ rhan otọ emwi ne ima ghẹ te sẹtin tobọ ima rẹn. Ọ guan kaan emwa ni rre ibozo ọghe orhiọn. Ọ ya ima rẹn avbe akpa, iziro, kevbe emwamwa  ọghe Osanobua. Ọ guan kaan obọ nọ ya mu emwa ukpo arriaisẹn nibun nọ gberra. Ọ vbe gima rẹn emwi nọ gha sunu vbe odaro kevbe vbene ima gha ya miẹn odẹ nọ su rrie arrọọ ọghe etẹbitẹ.

Evbozẹ Ne U Gha Na Yaeyi Emwi Ne Baibol Khare

5. De igiemwi nọ rhiẹre ma wẹẹ emwi ne Baibol tae guaero ighẹ emwi ne umẹwaẹn vbe taa?

5 Emwi bun nọ gha ya ima yayi wẹẹ, Ẹmwẹ ọghe Osanobua ẹre Baibol gele khin. Ọkpa vbọ ọre wẹẹ, emwi ne Baibol tae guaero ighẹ emwi ne umẹwaẹn tae. Vbe ẹghẹ nẹdẹ, emwa ni rre uhunmwu otagbọn hia kegha roro ẹre wẹẹ, ọ mwẹ uhunmwu emwi ne agbọn na rrie rrọ yi. Vbe odẹ Olarrie Owẹn ọghe Africa, emwa ka yaeyi wẹẹ, agbọn na keghi rre adesẹneva ẹyẹn nọ kiri lẹga igba 7,000. Ọrheyerriọ, emwi ne umẹwaẹn tae keghi guaero emwi ne ọkpa vbe usun emwa ni gbẹn e Baibol gbẹn yotọ odẹ ukpo 3,500 nọ gberra, nọ kha re wẹẹ, te Osanobua “mu agbọn na rrọ ye ideghedeghe.”—Job 26:7.

6. De osẹ nọ ghi wa sẹ ehia nọ rhiẹre ma wẹẹ, obọ Osanobua ẹre Baibol ke rre?

6 Osẹ nọ ghi wa sẹ ehia nọ rhiẹre ma wẹẹ, obọ Osanobua ẹre Baibol ke rre, ọre ne ẹmwẹ akhasẹ ni rre uwu ẹre na mwẹ amusẹ. Nọ ya lughaẹn nẹ iha ne emwa nagbọn fi, Osanobua ọkpa ẹre ọ rẹn ẹdẹ ne akhuẹ; emwi hia ne irẹn taa keghi sunu taara vbe nọ tae.

7. De ẹmwẹ akhasẹ eso ni rre Baibol ni mwẹ amusẹ vbe ẹghẹ nọ gberra?

7 Ẹmwẹ akhasẹ nibun ni rre Baibol keghi mwẹ amusẹ vbe ẹghẹ nẹdẹ. Vbe igiemwi, e Baibol keghi tae yotọ wẹẹ, a gha biẹ Jesu vbe Bẹtlẹhẹm ukpo 700 ọ te sẹ ẹghe na ya biẹ ọre. Ukpo 700 ẹre ọ gberra zẹẹ a ke gele biẹ ọre. (Maika 5:2; Matiu 2:3-9) Usun ẹmwẹ akhasẹ ọvbehe nọ dekaan Jesu ọre ne Baibol na kha wẹẹ, uvbi na ma he vba vbe owa, ẹre ọ khian biẹ ọre kevbe wẹẹ, esiliva 30 ẹre a khian ya ye Jesu dẹ. Te avbe akhasẹ na wa vbe mwẹ amusẹ. Vbene ẹmwata, ai miẹn ọmwa nagbọn nọ gha sẹtin ru emwi vbenia!—Aizaia 7:14; Zẹkaraia 11:12, 13; Matiu 1:22, 23; 27:3-5.

8. De ẹmwẹ akhasẹ eso ni mwẹ amusẹ nia? De emwi ne iran rhiema?

8 Ẹmwẹ akhasẹ nibun wa vbe mwẹ amusẹ vbe ẹghẹ ne ima ye na. A gha ya unu kaan eso nia:

  • “Agbọn ẹvbo ọkpa gha mu okuo gie  agbọn ẹvbo ọvbehe, arriọba ọkpa ghi gha gu arriọba ọvbehe gbinna; igbohiotọ ọyan aro rua ghi gha sunu, okpe emianmwẹ kevbe ukhunmwu ghi gha rre ehe hia.”—Luk 21:10, 11.

  • Te uyinmwẹ ‘ọkhọ khian gha muan yọ muan yọ.’—Matiu 24:12.

  • ‘Vbe ẹghẹ okiekie ẹdẹ . . . emwa ghi khian ni rẹn enegbe iran ọkpa, iran ghi hoẹmwẹ igho, . . . iran i ghi họn ẹmwẹ ne evbibiẹ iran, . . . iran gha yin pirhipirhi, aro iran ghi gha kpannọ ugiọnmwẹ erhẹn, ohu emwi nọ maan ghi gha mu iran, . . . iran gha hio, Iran ghi gha hoẹmwẹ egberọkhọmwẹ vbene iran i na hoẹmwẹ Osanobua.’—2 Timoti 3:​1-5.

Ena hia i gele sunu vbe ẹghẹ na? Ne ẹmwẹ akhasẹ hia ni rre Baibol na mwẹ amusẹ zẹvbe na tae yotọ keghi rhiema wẹẹ, ẹi re ebe kẹkan. Ebe na ye orhiọn nọhuanrẹn ọghe Osanobua gbẹn nọ!—2 Timoti 3:16.

E Baibol Fiwerriẹ Nẹ Ra?

9, 10. Vbọ rhiẹre ma wẹẹ Osanobua ma kue ne emwa nagbọn fi e Baibol werriẹ?

9 Gia kha wẹẹ u mwẹ isiwinna ọghe obọ ruẹ, u na yi uhi eso ne emwa ni winna lele ruẹ. Eghian gha ghi do fi uhi ne u gbẹn yotọ werriẹ, vbua khian ru hẹ? Ẹi re te u gha werriegbe gbẹn emwi ne u ka gbẹn? Odẹ vberriọ, ẹre Osanobua ma vbe ya kue ne emwa fi ẹmwata nọ rre uwu e Baibol werriẹ.

10 Ọkpa ma gbe ifuẹn ne emwa ni te hia ne iran fi imamwaemwi ni rre Ẹmwẹ Ọghe Osanobua werriẹ. Ma gha ye Baibol ne ima loo vbe ẹghẹ na gie na gbẹnnẹ vbe ẹghẹ nẹdẹ, alughaẹn rhọkpa i rrọọ. Ọna rhiema wẹẹ, e Baibol ma he fiwerriẹ ke ẹghẹ na ya gbẹn ọnrẹn do fi ebanban.