Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 Abọ 7

De Emwa Ni Ga Osanobua Vbe Odẹ Ọghe Ẹmwata?

De Emwa Ni Ga Osanobua Vbe Odẹ Ọghe Ẹmwata?

1. De emwi nọ khẹke ne ima ru nọ gha ya ẹko rhiẹnrhiẹn Osanobua?

NE IMA mieke na sẹtin gu e Jehova gha mwẹ asikẹgbe ne khuankhuankhuan, emwi nọ kaan ugamwẹ ohoghe i kaan ima. Ugamwẹ ọghe ẹmwata ẹre ọ khẹke ne ima gha ye. Vbe ẹdẹnẹrẹ, ẹbo emwa nibun vbe uhunmwu otagbọn hia wa rre ugamwẹ ọghe ẹmwata.

2. De ehe ne a na miẹn Avbe Osẹe Jehova? De iwinna ne iran ru?

2 Zẹvbe ne Baibol tae yotọ, emwa ni ga Osanobua vbe odẹ ọghe ẹmwata keghi re ‘oghẹn ne gbii’ ni ke ‘ẹvbo, uniẹn kevbe urhuẹvbo ughughan rre.’ (Arhie Maan 7:9) Ẹbo emwa nibun ni re Osẹe Jehova keghi ye izọghae kporhu vbe otọ ẹvbo 240, iran keghi ru iyobọ ne emwa ya rẹn emwi ne Jehova gualọ vbe obọ ima.

Odẹ Na Ya Rẹn Emwa Ugamwẹ Ọghe Ẹmwata

3. De ọmwa ne Avbe Osẹe Jehova ga? De aro ugamwẹ ne iran gbaengbe na?

3 Avbe Osẹe Jehova rẹnrẹn wẹẹ, e Jehova ọkpa ẹre ọ sẹ na ga. Ọna ẹre ọ si ẹre ne iran i na gbe uhunmwu kotọ ne avbe amazẹ kevbe efoto ne emwa loo vbe ugamwẹ. (1 Jọn 5:21) Iran i muohan emwa ni wu amaiwẹ te iran khian gha ga iran. Ọna ẹre ọ si ẹre ne iran i na mwẹ obọ vbe okpovbiẹ ra avbe idugie ọvbehe ni ye iyayi ọghe ohoghe kevbe ‘imamwaemwi ọghe avbe ugbogiorinmwi’ vẹwae. (1 Timoti 4:1) Sokpan, iran keghi rhie ifuẹko ne emwa ni khiẹ lekpae ne iran na maa iran re, avbe eyan ọghe Osanobua nọ dekaan arriọkpaegbe ọghe emwa ni wulo.—Jọn 5:28, 29; Iwinna 24:15.

4. De aro ne emwa ọghe Osanobua ya ghee ẹbo na ru?

4 Avbe Osẹe Jehova i mwẹ emwi ne iran ya ẹbo ru, iran i vbe deba oro azẹn rhunmwuda iran rẹn wẹẹ, obọ Esu ena hia ke rre. Iran i mu ẹtin yan ẹbo sokpan, e Jehova ẹre iran ya egbe kọ.—Itan 18:10.

5. De odẹ ne Avbe Osẹe Jehova ‘i ya re ọkpa vbuwe agbọn’?

5 Jesu keghi kha wẹẹ avbe erhuaengbe ọghẹe ‘i khian gha re ọkpa vbuwe agbọn.’ (Jọn 17:16) Jesu tobọre ma gha mwẹ obọ vbe otu azẹ vbe ọ rre agbọn. (Jọn 6:15) Avbe Osẹe Jehova i vbe mwẹ obọ vbe otu azẹ, oseghe ẹvbo kevbe ukpo na sinmwi nọ gua emwa nagbọn obọ ro. Vbọrhirhighayehe, iran zẹ igho uhunmwu, iran vbe lele uhi ọghe arriọba vbe ehe ke ehe ne iran ye.—Jọn 15:19; Rom 13:1, 7.

6. De adia ne eguọmwadia Osanobua lele nọ dekaan orọnmwẹ kevbe ebe orọnmwẹ na sọ?

6 Avbe Osẹe Jehova keghi lele uhi ọghe arriọba, ọna ẹre ọ si ẹre ne iran na ru orọnmwẹ zẹvbe nọ gu ilele ọghe arriọba ro. (Taitọs 3:⁠1) Iran wa vbe lele adia ọghe Osanobua, ọna ẹre ọ si ẹre ne iran i na rhie gberra okhuo ọkpa. (1 Timoti 3:2) Rhunmwuda eguọmwadia Osanobua lele ilele ọghẹe vbe arrọọ ọghe iran, ọ lọghọ a te miẹn wẹẹ iran sọ ebe orọnmwẹ.

7. De vbene Avbe Osẹe Jehova ya rhiẹre ma wẹẹ iran hoẹmwẹ egbe?

7 Avbe Osẹe Jehova họemwẹ egbe iran. Ahoẹmwọmwa na kevbe ne iran mwẹ ne Osanobua ẹre ọ ya iran mwẹ akugbe vbe uhunmwu otagbọn hia agharhemiẹn wẹẹ, ẹvbo ughughan ẹre iran ke rre. Vbe ẹghẹ oguomirẹ kevbe ibavbaro, Avbe Osẹẹ Jehova keghi ru iyobọ ẹgiẹgiẹ ne egbe iran. Ahoẹmwọmwa ọre ama na ya rẹn Avbe Osẹe Jehova.—Jọn 13:35.

Avbe Osẹe Jehova keghi mwẹ akugbe vbe uhunmwu otagbọn hia

8. De uyinmwẹ dan ne emwa ọghe Osanobua gbaengbe na?

8 Emwa ọghe Jehova keghi hia ne iran gha yin uyinmwẹ esi vbe ẹghẹ hia. Iran i rha, iran i taa ohoghe, iran i mwẹ obọ vbe uyinmwẹ esakan, iran i da ayọn gbe egbe, iran i vbe do ẹki omuru. Avbe odọ i gbe amwẹ iran. Vbene eso vbe uwu iran ke do gha re Osẹe Jehova, uyinmwẹ vbenia ka gua iran obọ ro sokpan, lekpae iyobọ ọghe Jehova, iran na fiwerriẹ. Iran keghi khian na ‘kpehuan’ vbe arọ Osanobua.—1 Kọrinti 6:9-11.

 Iran Ni Ru Ahoo Ọghe Jehova

9. De emwi ne ebe ọkpa khare vbekpae e esọsi ne a na miẹn aro vbe otọ Africa?

9 Emwa ugamwẹ nibun keghi kha wẹẹ, iran ẹre ọ rre odẹ ọghe ẹmwata. Emwi ọyunnuan ne avbe ọkaolotu ọghe esọsi eso ru, ẹre ọ ye iran kha wẹẹ odẹ ẹmwata iran ye. Vbe igiemwi, vbe nọ dekaan esọsi ne emwa na miẹn aro vbe otọ Africa, ebe ọkpa keghi kha wẹẹ: “Emwi ne emwa ni zẹ ọbo imamase te ru ẹre a ghi miẹn vbe esọsi ọghe ivbi orre na. . . . Iran kha wẹẹ iran mwẹ ẹtin na ya bẹghe emwi nọ khian sunu vbe odaro kevbe ẹtin na ya ru ẹmwi ọyunnuan. Iran ni tie egbe iran akhasẹ vbuwe ẹbu iran keghi miẹn aro, iran vbe rhan otọ imina. Iran loo amẹ nọhuanrẹn, ofigbọn nọhuanrẹn, emuẹn, e kando kevbe eturari ya mu emwa egbe rhan.”

10, 11. Vbọzẹ ne a na miẹn wẹẹ ẹi re emwi ọyunnuan ne emwa ru vbe ẹdẹnẹrẹ ẹre ọ rhiẹre ma wẹẹ Osanobua ye iran ike?

10 Emwa ugamwẹ na guan kaan na keghi kha wẹẹ emwi ọyunnuan ne iran ru ẹre ọ rhiẹre ma wẹẹ, Osanobua ẹre ọ ye iran ike. Sokpan ẹi re emwi ọyunnuan ọ rhiẹre ma wẹẹ ugamwẹ mwẹ akueyi ọghe Jehova. E Setan ẹre ọ rhie ẹtin ne emwa ugamwẹ ohoghe ne iran ya ru ‘iwinna ọyunnuan.’ (2 Tẹsalonaika 2:9) Yevbesọni, e Baibol tae yotọ wẹẹ, ẹtin na ya ru emwi ọyunnuan nọ ke obọ Osanobua rre vbe na ghee ọghe akhasẹ, urhuẹvbo ughughan na zẹ, kevbe irẹnmwi na ya we ọmwa “gha dobọ yi.”—1 Kọrinti 13:8.

11 Jesu keghi ya obọ sekhae wẹẹ: ‘Ẹi re emwa hia ni tie mwẹ “Nọyaẹnmwa, Nọyaẹnmwa” ọre ọ gha la Arriọba Osanobua, sokpan emwa ni ru ahoo ọghe erha mwẹ nọ rre ẹrinmwi. Ọ gha sẹ ẹdẹ na kha na, emwa nibun gha khama mwẹ wẹẹ, “Nọyaẹnmwa, Nọyaẹnmwa, ma ya eni ruẹ kporhu Osanobua. Ma khulo orhiọn dan nibun ladian. Ma winna iwinna ọyunnuan nibun vbe eni ruẹ.” Ẹghẹ nii ẹre I gha na tama iran wẹẹ, I ma rẹn uwa, wa ladian mwa, wa ni winna iwinna orukhọ.’—Matiu 7:21-23.

12. De emwa ni khian la Arriọba Osanobua?

12 De emwa ni khian ghi la Arrioba Osanobua? Emwa ni ru ahoo ọghe Jehova.

Iran Ni Kporhu Iyẹn Nọma Ọghe Arriọba Osanobua

13. De iwinna ne Osanobua waa emwa rẹn vbe ẹdẹnẹrẹ? De emwa ni winna iwinna na?

13 De iwinna ne Osanobua waa emwa rẹn re vbe ẹdẹnẹrẹ? Jesu keghi kha wẹẹ: “A gha kporhu Iyẹn nọ maan ọghe Arriọba na la otọ agbọn hia nẹ zẹ vbe osẹe ghe emwa hia, iyeke ọnii, ufomwe ghi do rre.” (Matiu 24:14) Ọna ọre iwinna ne Avbe Osẹe Jehova ye izọghae ru.

14. Vbọre Arriọba Osanobua? De emwa ni khian kha zẹvbe ọba?

14 Vbe “otọ agbọn hia,” Avbe Osẹe Jehova keghi kporhu iyẹn nọma ọghe Arriọba Osanobua na mugbọ vbe ẹrinmwi, nọ khian kha yan uhunmwu otagbọn hia vbe odẹ ọghe ata. Iran vbe maa emwa re wẹẹ, Jesu ẹre Jehova zẹ ye ukpo Ọba kevbe wẹẹ, emwa 144,000, na hannọ zẹ vbe uhunmwu otagbọn gha deba re kha zẹvbe ọba.—Daniẹl 7:14, 18; Arhie Maan 14:1, 4.

15. De emwi ne Arriọba Osanobua khian guọghua?

15 Avbe Osẹe Jehova keghi ya e Baibol maa emwa re wẹẹ, Arriọba Osanobua gha do guọghọ agbọn e Setan rua fẹẹrẹ. Vbe ẹghẹ nii, ai khian ghi gha miẹn ugamwẹ ohoghe, erriọ vbe nọ ne imamwaemwi ọghe ohoghe nẹi rhie uyi ne Osanobua sokpan Esu. (Arhie Maan 18:8) Te a khian vbe wabọre rua arriọba ọghe emwa nagbọn hia ni gbodan ghee Osanobua!—Daniẹl 2:44.

16. De emwa ni Jesu khian gha kha yan? De ehe ne iran khian dia?

16 Avbe Osẹe Jehova keghi yae wewe wẹẹ, Jesu Kristi gha fiangbe emwa hia ni ru ahoo ọghe Osanobua. Iran na, ẹre Jesu khian gha kha yan vbe uhunmwu otagbọn mwa. Osanobua yan rẹn vbe Baibol wẹẹ: ‘Rẹn gha miẹn avbe ivbiogue kevbe ni kpe tie ẹre fan deba iran nẹi mwẹ kevbe na hee. Ọ gha tohan iran ni ma wegbe kevbe ivbiogue, ọ ghi vbe gie iran ni rre ivbabọ miẹn uhunmwu.’—Psalm 72:12, 13.

17. De emwa ni ya Arrioba Osanobua wewe?

17 Ẹbu emwa ọvbehe i rrọọ ni kporhu iyẹn nọma ọghe Arriọba. Avbe Osẹe Jehova ọkpa ẹre ọ ya Arriọba Osanobua wewe la uhunmwu otagbọn hia.