Gberra gha rhie uhunta

Avbe Osẹe Jehova

Hannọ urhuẹvbo Edo

Ọ Gha Yẹ Ruẹ Ne U Rẹn Ne Ẹmwata Ra?

Ọ Gha Yẹ Ruẹ Ne U Rẹn Ne Ẹmwata Ra?

NE ẹmwata vbekpa emwi nọ khin? Vbekpa usun avbe inọta eso nọ ru ekpataki sẹ ne emwa nagbọn ghi he nọ. Ughaghe ọ vbe kpa uwẹ odin vbekpa egbe avbe inọta ni ye vbenian:

  • Osanobua gele zẹ ye ima re ra?
  • Okuo kevbe usẹ gha sẹtin sẹ ufomwẹ ra?
  • Vbọ sunu dae ima vbe a gha wu?
  • Ayayẹro rhọkpa rrọọ ne emwa ni wulo ra?
  • De vbene I gha ya na erhunmwu ne Osanobua họn hẹ?
  • De vbene I gha ya miẹn oghọghọ hẹ vbe arrọọ?

De ehe ne u gha na gualọ avbe ewanniẹn ye avbe inọta na? Adeghẹ u na yo avbe aza ọghe ebe ra avbe owa ne a na dẹ ebe, gha sẹtin miẹn avbe ebe arriasẹn inu nọkhin nọ khawẹ iran mwẹ ne avbe ewanniẹn. Ẹghẹ hia, agharhemiẹn, te ebe ọkpa gbodan dae nọkpa. Eso ọvbehe yevbe ne ọ gbae vbe ẹghẹ na sokpan vbe nọ ma kpẹgbe ọ do gha re nei rre atẹ kevbe na dọlọ gbẹn ra a ye ọvbehe rri ihe ẹre.

Ebe ọkpa rrọọ vbọrhirhighayehẹ, nọ mwẹ avbe ewanniẹn na sẹtin mu ẹtin yan. Ọ keghi rre ebe ọghe ẹmwata. Jesu Kristi khare vbe ọ na erhunmwu gie Osanobua: “Ẹmwata ọre ẹmwẹ ruẹn khin.” (Jọn 17:17) Ẹdẹnẹrẹ ma rẹn ne Ẹmwẹ zẹvbe e Baibol Nọhuanrẹn. Vbe avbe ipapa ebe ni lelẹe, u gha fi aro muẹn avbe ewanniẹn ata nọ rriẹe ọghe Baibol ye avbe inọta ne ban.

Osanobua Gele Zẹ Ye Ima Re Ra?

Okpia ọkpa ne emwa gbẹbu lẹga

EVBỌZẸE NE A NA NỌ ỌTA NA: Ma keghi rre agbọn nọ vọẹn ne uyinmwẹ atosi kevbe ai bu ohiẹn ata. Ugamwẹ nibun ma emwa re wẹ avbe usẹ ne ima sẹ keghi re ahoo ọghe Osanobua.

EMWI NE BAIBOL MAMWA RE: Osanobua ma si emwi dan ẹdẹ. “Osanobua ne Udazi gha ru emwi ne ọ ma gba ra vbene!” Job 34:10 khare. Osanobua mwẹ emwamwa ahoẹmwọmwa ne emwa nagbọn. Ọna siẹe ne Jesu na ma ima re ne a gha na erhunmwu: “Erha mwa ne ọ rre ẹrinmwi,…gie arriọba ruẹ rre. Gia ru iho ọwuẹ vbe agbọn vbe ne iran ru vbe ẹrinmwi.” (Matiu 6:9, 10) Osanobua mwẹ igbaro ghe nọ dinmwi vbekpae ima serriọ wẹ Irẹn rhumwudọni rhie egbe tua yọ nọ ya ru amusẹ ye emwamwa ọghẹ e vbe ne ai gbe awawẹ yi.—Jọn 3:16.

Vbe ya ghe Gẹnẹsis 1:26-28; Jemis 1:13; kevbe 1 Pita 5:6, 7.

Okuo kevbe Usẹ Gha Sẹtin Sẹ Ufomwẹ Ra?

Iyokuo

EVBỌZẸE NE A NA NỌ ỌTA NA: Okuo wa ye viọ arrọọ ọghe emwa nagbọn nibun ne ai sẹtin ta. Ma hia keghi re ne usẹ ẹmwẹ agbọn ye obọ kaẹn.

EMWI NE BAIBOL MAMWA RE: Osanobua taẹ yotọ ẹghẹ ne Irẹn gha ya mu ọfumwegbe gbọọ vbe uhunmwu otagbọn hia. Vbe ototọ Arriọba ọghẹe, arriọba ẹrinmwi, emwa i ghi ra “mu egbe okuo ọvbehe.” Nọghaya gha yerriọ, iran gha “ya umozo iran dunmwu emwi nọ yevbe ẹguẹ.” (Aizaia 2:4) Osanobua gha sẹ ọfo ye ai buohiẹn ata hia kevbe usẹ. Ne e Baibol yanrẹn: “[Osanobua] gha khiẹn ameve hia hin aro iran rre, uwu i ghi arrọọ ọvbehe, ra akhiẹ ra obalọ. A ho emwi nẹdẹ [debae avbe aibuohiẹn ata kevbe usẹ ọghe ẹdẹnẹrẹ bẹkun nẹ].”—Arhie Maan 21:3, 4.

Vbe ya ghe Psalm 37:10, 11; 46:9; kevbe Maika 4:1-4.

Vbọ Sunu Dae Ima Vbe A Gha Wu?

Itẹ ọkpa

EVBỌZẸE NE A NA NỌ ỌTA NA: Nibun sẹhia vbe ugamwẹ ọghe agbọn na ma emwa ẹre wẹ emwi eso vbuwe ọmwa ye gha rrọọ khian vbe iyeke uwu. Eso yaeyi wẹ ni wulo nẹ sẹtin kuan ni rrọọ ra Osanobua rhie irioya ne emwa dan lekpa ne ọ fi iran fi obalọ ọghe etẹbitẹ vbuwe ẹrinmwi erhẹn.

EMWI NE BAIBOL MAMWA RE: Vbe uwu, arrọọ ọghe emwa nagbọn ghi wa sẹ ufomwẹ. “Iran ni wulo nẹ ma rẹn emwi rhọkpa,” vbene Asan-Ibo 9:5 khare. Ugbẹn vbe a miẹn wẹ iran ni wulo i ra sẹtin rẹn, mwẹ orrirri egbe, ra miẹn emwi ẹwaẹn rhọkpa, iran i sẹtin kuan emwa ra ru iyobọ ne iran ni rrọọ.—Psalm 146:3, 4.

Vbe ya ghe Gẹnẹsis 3:19 kevbe Asan-Ibo 9:6, 10.

Ayayẹro Rhọkpa Rrọọ Ne Emwa Ni Wulo Ra?

Ọmọ ọkpa nọ khiẹkhiẹ egbe ye uwu ọghe ọmwa nọ hoẹmwẹ ọnrẹn

EVBỌZẸE NE A NA NỌ ỌTA NA: Ma ho nima gha rrọọ, ne ima gha sọyẹnmwẹ arrọọ deba emwa nima hoẹmwẹ ọnrẹn. Emwi abiọmwabiẹ nọ ne ima gha mwẹ ekhọẹ ọyẹmwẹ na ya dọlegbe miẹn emwa ne ima hoẹmwẹ ọnrẹn ni wulo.

EMWI NE BAIBOL MAMWA RE: Emwa nibun sẹhia ni he wa wulo gha do gha re nọ rhiọkpaegbe. Jesu ru eyan wẹ “avbe orinmwi ni rre idin gha…ladian.” (Jọn 5:28, 29) Vbe ne ọ gu emwamwa nokaro ọghe Osanobua ro, enii na huẹn kpaegbe zẹvbe emwa nagbọn gha mwẹ ẹkpotọ ne ọ do gha rrọọ vbe agbọn vbe paradais. (Luk 23:43) Eyan ọghe odaro na debae egberranmwẹ nọgbae kevbe arrọọ ọghe etẹbitẹ ne emwa nagbọn ni hẹnmwẹ. Ne Baibol khare: “Ọmwata ọ re ọ ra yan otọe nii ọ ghi vbe yin ẹnrẹn rhinrin ẹdẹ.”—Psalm 37:29.

Vbe ya ghe Job 14:14, 15; Luk 7:11-17; kevbe Iwinna 24:15.

De Vbene I Gha Ya Na Erhunmwu ne Osanobua Họn Hẹ?

Okpia ọkpa nọ na erhunmwu

EVBỌZẸE NE A NA NỌ ỌTA NA: Emwa ni rre owa ugamwẹ nobụn sẹ ehia na erhunmwu. Ọrheyerriọ, nibun rorẹe wẹ erhunmwu iran i re na rhie ewanniẹn yi.

EMWI NE BAIBOL MAMWA RE: Jesu ma ima re na sobọ ẹre rua i ghẹ na gha lele ilele ẹmwẹ ọkpọkpa na ta vbe uwu erhunmwu ima. Irẹn khare, “U gha na erhunmwu,” “ghẹ gha ta ẹmwẹ ọkpa yangbe yangbe.” (Matiu 6:7) Adeghẹ ima ho ne Osanobua họn erhunmwu ọghomwa, te ima gha na erhunmwu vbe odẹ ne irẹn kue yi. Na do ru ọnii, evba gualọ nọ ne ima ruẹ emwi ne ahoo ọghe Osanobua khin kevbe vbe ẹghẹ nii, na erhunmwu vberriọ. Ebe Nokaro Ne Jọn gbẹn 5:14 rhan otọre: “Rẹn gha ru ẹe a deghẹ ma nọ rẹn emwi zẹ vbene ọ gua egbe emwi ne irẹn [Osanobua] ho ro.”

Vbe ya ghe Psalm 65:2; Jọn 14:6, 14; kevbe 1 Jọn 3:22.

De Vbene I Gha Ya Miẹn Oghọghọ Hẹ Vbe Arrọọ?

Okhuo ọkpa nọ fie gualọ oghọghọ lekpae ne a gha tie e Baibol

EVBỌZẸE NE A NA NỌ ỌTA NA: Emwa nibun yaeyi wẹ igho, otiti, ra ose gha ye iran gha mwẹ oghọghọ. Rhunmwudọni, iran ghi gha khu egbe emwi vberriọ iran ghi miẹn wẹ oghọghọ wi iran.

EMWI NE BAIBOL MAMWA RE: Jesu yẹrẹro isanrẹn ọghe ne oghọghọ vbe ẹghẹ ne irẹn na kha wẹẹ: “Oghọghọ nọ ne iran ni mu ẹmwẹ emwi orhiọn ọghiran roro.” (Matiu 5:3) Oghọghọ ọghe ẹmwata keghi re ne a gha sẹtin miẹn ọkpa nọ adeghẹ ima na zowẹ ne a ya vọẹn evba gualọ ọghomwa nọ kpọlọ sẹ, ọni ọre, hanmwẹ ọghomwa ye ẹmwata ọghe orhiọn vbekpa Osanobua kevbe emwamwa ọghẹe nima. Ẹmwata nii keghi re na miẹn vbuwe Baibol. Na do rẹn ẹmwata nii sẹtin ru iyobọ nima nẹ a ya rẹn emwi nọ gele hiunsi kevbe nẹi rọ re. Na gha gie ẹmwata e Baibol gha dia avbe atamuolọyan ọghomwa kevbe avbe emwi ne ima ru keghi su rhie arrọọ nọ mwẹ evbọdemu sayọ.—Luk 11:28.

Vbe ya ghe Itan 3:5, 6, 13-18 kevbe 1 Timoti 6:9, 10.

Enen kegha re a rhie aro lae kuẹi avbe ewanniẹn e Baibol ye avbe inọta ehan. Wẹ gualọ nọ ye sẹ ọni ra? Adeghẹ u rre usun enii ni “mu ẹmwẹ emwi orhiọn ọghiran roro,” vbe ne ai na gbe awawẹ u gualọ. Ughaghe avbe inọta ọvbehe kpa ruẹ odin, zevbe: ‘Adeghẹ Osanobua zẹye ima re, vbọzẹ ne irẹn na ye kue yọ ne emwi dan kevbe usẹ nọbun serriọ wa gha rrọọ ke ẹghẹ okha gha de? De vbene I gha ya sẹtin guaẹkpao hẹ umamwẹ arrọọ ọghe ẹgbẹe mwẹ?’ E Baibol rhie ewanniẹn nọ somwa kevbe nọ sọkẹn ye enena kevbe avbe inọta ọvbehe nibun.

Vbọrhirhigha ye hẹ, emwa nibun vbe ẹdẹnẹrẹ siegbe rẹrẹ ne a do tie ne Baibol. Iran ghe ẹre zẹvbe ebe negbiriri ne ọ lọghọ na rẹn ọtọre vbe ugbẹnso. Ọ gha yẹ ruẹ ne a ru iyobọ nuẹn ne u ya miẹn ne avbe ewanniẹn vbuwe Baibol ra? Avbe Osẹe Jehova wa rhie ne emwa emwi ilo eva nọ gha sẹtin ru iyobọ nuẹn.

Nokaro, ne ebe ẹmu De Emwi ne Osanobua Hoo Vbe Obọ Mwa? keghi re emwi na mwamwaẹn na ya ru iyobọ ne emwa nẹi miẹn ẹghẹ ya zanzan avbe ewanniẹn Baibol ni de waro rua ye avbe inọta kpataki. Ne emwi ilo nogieva keghi re emwamwa ọhẹ ọghe a ruẹ e Baibol vbe owa. Vbene ai na fian igho, ọkpa vbe usun avbe Osẹe Jehova ni rre ẹdogbo ruẹ kevbe nọ gbegba nọ ya ma ọmwa ne Baibol sẹtin bu ruẹ gha die owa ra ehe ọvbehe nọ yẹ ruẹ kevbe ẹghẹ kherhe vbe izọla ya sẹ izọla gha guẹ ziro yan ne Baibol. Ẹbo inu nọkhin vbe uhun otagbọn wa miẹn ere nẹ vbe emwamwa na. Nibun vbuwe iran do tae atamuolọyan nọ ye ẹko rhiẹnrhiẹn ọmwa: “I miẹn ne ẹmwata nẹ!”

Emwi ewe rhọkpa ọvbehe nọkpọlọ sẹ i rrọọ ne a khian miẹn. Ẹmwata ọghe Baibol rhie afevbiwe nima hin a mu idandan rre, ekhọe nọ lighii, kevbe ohan ọghe amakan. Ọ rhie ayayẹro nima, emwamwa kevbe ọyẹnmwẹ. Jesu keghi khawẹ: “Wa gha rẹn ne ẹmwata kevbe ne ẹmwata gha miẹn uwa fan.”—Jọn 8:32.

1. Okpia ọkpa nọ ruẹ emwi ne e Baibol mamwa re; 2. Okhuo ọkpa nọ ruẹ emwi ne e Baibol mamwa re