Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 6

De Ayayẹro Ne Emwa Ni Wulo Mwẹ?

De Ayayẹro Ne Emwa Ni Wulo Mwẹ?

1. De iyẹn nọma nọ rrọọ ne emwa ni wulo nẹ?

Vbe ẹghẹ ne Jesu ya se Bẹtani, ẹvbo nọ sikẹ Jerusalẹm, ọ do vba ghẹ ọse ọre ghe Lazarọs wu nẹ vbe ọwarẹ ikpẹdẹ enẹ. Jesu na lele Mata kevbe Meri, ni re etẹn nikhuo ọghe Lazarọs gha rhie ehe na rẹre yi. Vbe ọma he kpẹ niran se evba, ẹre emwa na wa gbẹbu. U miẹn oghọghọ ne ọ ghaa rre ekhọe ọghe Mata kevbe Merri vbe Jesu ghi huẹn e Lazarọs kpaegbe!—Tie Jọn 11:21-24, 38-44.

Mata ka rẹn vbekpae iyẹn nọma nọ dekaẹn emwa ni wu. Ọ rẹnrẹn wẹẹ, e Jehova gha huẹn emwa ni wulo kpaegbe, ne iran werriegbe do gha rre agbọn.—Tie Job 14:14, 15.

2. Vbọ ghi sunnu dae emwa ni wulo nẹ?

Osanobua tama Adam: ‘Ekẹn ẹre u khin, ekẹn ni ẹre u khian werriegbe khian.’—GẸNẸSIS 3:19.

Ekẹn ẹre a ya yi emwa nagbọn. (Gẹnẹsis 2:7; 3:19) Ma ne emwa nagbọn i re evbayi ọghe orhiọn nọ mwẹ ifun. Ma keghi re evbayi ọghe ikpakpa. Rhunmwuda ọni, ma gha wu, emwi rhọkpa i kpa vbe egbe ima. Ma gha wu, ẹrherhe ọghomwa ghi vbe wu. Ẹdẹrriọ, ẹre iro ọghomwa fo. Ọni ẹre ọ siẹ ne Lazarọs ma na ta emwi rhọkpa nọ ye aro miẹn, rhunmwuda, emwa ni wulo ma rẹn emwi rhọkpa.—Tie Psalm 146:4; Asan-Ibo 9:5, 6, 10.

Osanobua ye erhẹn giẹn emwa vbe iran gha wu nẹ ra? Ugbẹnvbe a miẹn wẹẹ, e Baibol khare wẹẹ, emwa ni wulo ma rẹn emwi rhọkpa, ọdewuarorua wẹẹ, imamwaemwi ọghe ẹrinmwi erhẹn keghi ọghe ohoghe, kevbe wẹẹ, ọ keghi mu eni  Osanobua rria. Egbe iziro vberriọ, ọghe na gha giẹn emwa vbe erhẹn keghi sọnnọ irẹn.—Tie Jerimaia 7:31.

Ghee vidio nọ mwẹ uhunmwuta nọ khare wẹẹ Vbọ Sunu Daa Emwa Ni Wulo Nẹ?

3. Emwa ni wulo gha sẹtin gu ima guan ra?

Emwa ni wulo nẹ i sẹtin guan, iran i sẹtin vbe họn ẹmwẹ. (Psalm 115:17) Sokpan avbe odibo dan eso rrọọ ni gu emwa guan, iran ghi vbe mu akpa ọghe emwa ni wulo nẹ yọ. (2 Pita 2:4) Ọ keghi re emwi awua vbe odaro e Jehova, na hia na gha gu emwa ni wulo guan.—Tie Diuteronomi 18:10, 11.

4. De emwa ni khian rriọkpaegbe?

Ẹbo emwa nibun ni wulo nẹ ni rre uwe idin, gha rriọkpaegbe, iran ghi werriegbe do gha rrọọ vbe agbọn na. Uhiẹn ya sẹ egbe emwa eso ne i ma rẹn Osanobua, ni ru emwi dan gha rriọkpaegbe.—Tie Luk 23:43; Iwinna 24:15.

Emwa ni rriọkpaegbe gha sẹtin ruẹ emwi vbekpae ẹmwata nọ dekaẹn Osanobua, iran gha sẹtin vbe mu ẹtin yan Jesu lekpae ne iran họn ẹmwẹ nẹ. (Arhie Maan 20:11-13) Iran ni rriọkpaegbe ni ghi ru emwi esi, gha sẹtin sọyẹnmwẹ arrọọ vbe etẹbitẹ vbe agbọn.—Tie Jọn 5:28, 29.

5. De emwi ne arriọkpaegbe gima rẹn vbekpae Jehova?

Osanobua keghi gie ovbiẹre gha de, ne ọ do wu ne ima, ne emwa ni wu mieke na gha mwẹ ayayẹro. Ma bẹghe ẹre nia wẹẹ, arriọkpaegbe gie ima rẹn wẹẹ, Jehova keghi mwẹ ahoẹmwọmwa kevbe ekhọesi. Vbe ẹghẹ ne emwa ni wu gha ya rriọkpaegbe, de ọmwa nu gha hoo nu ka miẹn?—Tie Jọn 3:16; Rom 6:23.