Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 52

Ivbi Iyokuo Ọghe Jehova Nọ Gborrirri

Ivbi Iyokuo Ọghe Jehova Nọ Gborrirri

Ẹghẹ hia ẹre Benhadad ne ọba ọghe Siria ya gha gu Ivbi Izrẹl khọn. Sokpan ẹghẹ ke ẹghẹ ne Benhadad ya mu okuo dee, Elaisia ghi tama ọba ọghe Izrẹl nọ lẹẹ fua. Rhunmwuda ọni, e Benhadad keghi gie ivbi iyokuo ọghẹe ne iran ya mu Elaisia ke Dotan rre.

Asọn ẹre ivbi iyokuo Asiria ya sẹ e Dotan. Vbe ẹdẹ ghi gbe, ọguọmwadia Elaisia keghi ladian, ọ na bẹghe ẹre wẹẹ ivbi iyokuo vuọn orere ẹvbo. Orrirri na gbe kue ọre, ẹre ọ na da tie Elaisia wẹẹ: ‘Enọwanrẹn, uwu ima wa miẹn na, vbe ima khian ghi ru nia?’ Elaisia keghi tama rẹn wẹẹ: ‘Emwa ni rre ima iyeke ẹre ọ bun sẹ ọghe iran.’ Vbe ọwarọkpa nii, e Jehova keghi ruẹ ne ọguọmwadia Elaisia bẹghe ivbi iyokuo ọghe irẹn, ni tota ye ikẹkẹ okuo nọ baa vbe na ghee erhẹn vbe uhunmwu oke.

Ugbẹnvbe Elaisia ghi bẹghe ẹre wẹẹ, ivbi iyokuo e Siria khian do mu irẹn, ọ na ghi rinmwia e Jehova nọ bibi iran odẹ. Vbe ọwarọkpa nii, iran ma ghi rẹn eke ne iran ghaa ye. Elaisia keghi tama ivbi iyokuo nii wẹẹ: ‘Ẹi  re ẹvbo na ẹre ọ khẹke ne uwa gha ye. Uwa lele mwẹ, ne I ya ma uwa eke ne okpia ne uwa gualọ ye.’ Elaisia keghi rhie iran gha rrie Sameria nọ re ehe ne ọba ọghe Izrẹl ye.

Okiekie ẹre aro ghi ya gbannọ Ivbi e Siria. Ọba ọghe Izrẹl na ghi nọ Elaisia wẹẹ: ‘Ne I gbele iran rua ra?’ Elaisia gha loo ẹkpotọ nọ kie nẹ na, ya rria ikhi ne egbe ẹre ra? Hiehie. Elaisia keghi kha wẹẹ: ‘Ghẹ gbele iran rua. Rhie evbare ne iran, ne u gi iran gha khian.’ Ọba Izrẹl keghi le evbare ọbọbọtizọ ne iran, iran ghi rri evbare nẹ, iran na gha rrie owa.

“Ọna ọ si ẹe ne afianma i na fian ima vbe odaro Osanobua, aro ima dae wẹ, irẹn gha ru ẹe, adeghẹ ima nọ rẹn emwi, zẹ vbene ọ gua egbe emwi ne irẹn hoo ro.”—1 Jọn 5:14