Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 49

Osanobua Keghi Rri Oloi Dan Oya

Osanobua Keghi Rri Oloi Dan Oya

Ewindo ẹguae ọghẹe nọ rre Jezrẹl, ẹre Ọba Ehab ke gha ghee ugbo emwiokọ ọghe okpia ọkpa na tie ẹre Nabọt. Ehab na gha hoo nọ gu e Nabọt dẹ otọ na. Sokpan e Nabọt ma kue, rhunmwuda e Jehova ma kpasẹ yọ na gha khiẹn otọ na re vbe ukhu. Sokpan Ehab wa hẹwẹ vberriọ ra, ugbẹnvbe a miẹn wẹẹ erriọ uhi ọghe Osanobua khare? Ẹn o. Ohu na gha muẹn. Ohu muẹn sẹrriọ wẹẹ, ọ na khui egbe ẹre ye ughugha, ọ ma ghi rri evbare.

Ọvbokhan Ehab na tie ẹre Jezibẹl keghi tama rẹn wẹẹ: ‘Uwẹ ọre ọba ọghe Izrẹl. Ọ khẹke ne emwi ne u rhirhi gha gualọ sẹ ruẹ obọ. I gha ruẹ ne otọ nii sẹ ruẹ obọ.’ Ọ keghi gbẹn elẹta gie ediọn ni rre ẹvbo nii, ọ na wẹẹ ne iran mu ohoghe ba e Nabọt wẹẹ, ọ tie ihẹn ne Osanobua, na mieke na ya ugbe gbe ẹre rua. Vbe iran ghi ru vberriọ, e Jezibẹl na ya tama Ehab wẹẹ: ‘E Nabọt wu nẹ. Otọ ọghẹe khian ọghuẹ nẹ.’

Gberra e Nabọt, e Jezibẹl vbe gbele eguọmwadia e Jehova nibun ni ma rẹn ọkpa rẹn eva. Ẹbọ ẹre irẹn wa gha ga, ọ na vbe gha ru emwi dan nibun. Vbe uwẹ a yayi wẹẹ, e Jehova khian ru e Jezibẹl hẹ?

Vbe Ehab ghi wu nẹ, ovbi ẹre ighẹ e Jehoram na rri ọba lelẹe. E Jehova keghi gie Jehu nọ ya rri e Jezibẹl vbe ẹgbẹe ọre oya.

E Jehu keghi fi ikẹkẹ okuo ọghẹe gha rrie Jezrẹl nọ re ẹvbo ne Jezibẹl ye. E Jehoram keghi fi ikẹkẹ okuo ọghẹe ya vba e Jehu, ẹre ọ na nọ rẹn wẹẹ: ‘Okhian kue maan yi?’ E Jehu keghi kha wẹẹ: ‘Vbọ khian ya okhian gha maan, vbe iyuẹ ne ọmwa dan ye rre agbọn?’ E Jehoram na te gha hoo nọ lẹẹ, sokpan e Jehu keghi ya ifẹnmwẹ hae, ẹre ọ na wu.

E Jehu na gha rrie ẹguae Jezibẹl. Vbe ọ ghi họn wẹẹ e Jehu dee, e Jezibẹl na ya muegbe ẹsẹse, ọ na vbe ba aro. Ẹre  ọ na ya tota ye ewindo nọ rre uhunmwu egedege ọghẹe. Vbe Jehu ghi rre, e Jezibẹl na ya ukpẹ ihue tuẹ ọre. E Jehu keghi tama eguọmwadia e Jezibẹl wẹẹ: “Uwa sua re fua!” Iran keghi sua e Jezibẹl fua, erriọ e Jezibẹl ya wu.

Vbe iyeke ọni, e Jehu keghi gbele ivbi Ehab 70, ọ na guọghọ e Bel ne ẹvbo nii te ga. Uwẹ ma bẹghe ẹre wẹẹ e Jehova rẹn emwi hia, kevbe wẹẹ ọ gha rri emwa dan oya vbe ọ gha sẹ ẹghẹ ra?

“Adeghẹ ọmwa na ya arovbẹmwẹ si ẹfe koko, ẹi rri ere ẹre sẹ ota.”—Itan 20:21NW