Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 47

E Jehova Rhie Igiọdu Ne Elaija

E Jehova Rhie Igiọdu Ne Elaija

Vbe Jezibẹl ghi họn emwi nọ sunu daa avbe akhasẹ e Bel, ohu na gha muẹn. Ọ na ghi gie uhunmwu gie Elaija wẹẹ: ‘Emwi nọ rruan avbe akhasẹ e Bel ẹre ọ khian vbe rruan ruẹ, ọ te sẹ ẹdẹ nakhuẹ.’ Elaija ghi họn ẹmwẹ na, ohan kegha muẹn. Ọ na lẹẹ gha rrie uwu ato. Ọ keghi na erhunmwu gie Jehova wẹẹ: ‘E Jehova, egbe ena hia wọọ mwẹ nẹ. I wa wu ẹre ọ maan sẹ.’ Vbe iyeke ọni, ovbe na rhie Elaija ye ototọ erhan rhunmwuda egbe nọ wọọ re.

Odibosa ọkpa keghi ya obọ kan rẹn. Ọ na fẹko tama rẹn wẹẹ: ‘Kpaegbe ne u do rri evbare.’ Elaija keghi bẹghe ududu eka vbe uhunmwu ugbe nọ tọn kevbe eluba amẹ. Elaija keghi rri nene eka, ọ na vbe wọn amẹ. Vbe iyeke ọni, ọ na werriegbe lovbiẹ. Odibosa nii keghi werriegbe huẹn ọnrẹn. Ọ na tama rẹn wẹẹ: ‘Rri evbare, ne u mieke na miẹn ẹrhiọn ya mu okhian gha rrie eke ne u rrie.’ Ẹre Elaija na werriegbe rri evbare. Vbe iyeke ọni, ọ keghi ya ikpẹdẹ 40 mu okhian gha rrie Oke Horẹb. Ọ ghi sẹ evba, ọ na ya lovbiẹ ye uwu uvun okuta. E Jehova keghi nọ rẹn wẹẹ: ‘Elaija, vbua ru mwa yi?’ Elaija keghi wanniẹn wẹẹ: ‘Ivbi Izrẹl ma mu eyan ọghe iran sẹ. Iran guọghọ aka izọese ọghuẹ, iran na vbe gbele avbe akhasẹ ruẹ rua. Mẹ ẹre iran ghi hoo ne iran gbe na.’

E Jehova keghi tama rẹn wẹẹ: ‘Ladian ne u ya mudia ye uhunmwu oke.’ Vbe okaro, ogbigbi ẹhoho keghi hoho gberra uvun okuta nii. Vbe ẹhoho ghi hoho fo nẹ, igbohiotọ keghi sunu. Vbe iyeke ọni, erhẹn na suẹn gha baa. Ẹre Jehova na ya urhu ne khuẹrhẹ gu Elaija guan. Elaija ghi họn urhu na, ọ na ya agbada ẹwu ọghẹe gue aro. Ọ na ya mudia vbe odaro uvun okuta nii. E Jehova keghi nọ rẹn wẹẹ, ‘vbọsiẹ ne u na lẹẹ?’ Ẹre Elaija na wanniẹn wẹẹ: ‘Mẹ ọkpa ẹre ọ ghi kẹ.’ Sokpan, e Jehova keghi tama rẹn wẹẹ: ‘Ẹi re uwẹ ọkpa ẹre ọ kẹre. Emwa 7,000 ye rre otọ Izrẹl, nọ ye ga mwẹ. Gha khian, ne u zẹ Elaisia zẹvbe akhasẹ nọ khian rhihe ruẹ.’ Elaija na ru vbene Jehova tama rẹn zẹẹ. E Jehova gha vbe ru iyobọ nuẹ, deghẹ u na họn ẹmwẹ nẹ. Gia ghee emwi nọ sunu vbe ẹghẹ ne uyunmwu nii ya vbe otọ.

“Ghẹ si osi ye emwi rhọkpa, sokpan gha ya erhunmwu ne a na, nọ emwi ne u hoo hia vbe obọ Osanobua, u ghi gha ye ekhọe ọkpọnmwẹ ẹse nọ rẹn vbe ẹghẹ hia.”—Filipai 4:6