Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 39

Ọba Ọghe Izrẹl Nokaro

Ọba Ọghe Izrẹl Nokaro

Ọbuohiẹn ẹre Jehova rhie ne Ivbi Izrẹl nọ gha su iran, sokpan iran na wẹẹ, iran gualọ ọba nọ gha su iran. Iran keghi tama e Samuẹl wẹẹ: ‘Agbẹnvbo hia ni lẹga ima mwẹ avbe ọba ni kha yan iran. Ma vbe hoo ne ima gha mwẹ ọba.’ E Samuẹl keghi mu ẹmwẹ na ma e Jehova vbe erhunmwu rhunmwuda, irẹn ghee ẹre zẹvbe iziro nọ ma gba. E Jehova keghi tama e Samuẹl wẹẹ: ‘Ẹi re uwẹ Ivbi Izrẹl he. Mẹ tobọ imẹ ẹre iran he. Tama iran wẹẹ, I gha rhie ọba ne iran, sokpan ọ gha ya agbọn lọghọ iran.’ Vbe ọ ghi tama iran vberriọ, iran na ye kha wẹẹ: ‘Ọ gha khọnrẹn. Ma hoo ne ima gha mwẹ ọba!’

E Jehova keghi tama e Samuẹl wẹẹ, e Sọl ẹre ọ khian gha re ọba nokaro ọghe Ivbi Izrẹl. Vbe Sọl ghi ya tuẹ e Samuẹl vbe Rama, ọ keghi hannọ e Sọl zẹ lekpae ne ọ na tue ori ye ọre uhunmwu.

Vbe ọ ma he kpẹẹ vba, e Samuẹl keghi si Ivbi Izrẹl hia koko nọ mieke na ma iran ọba ọghe iran. Sokpan iran ma miẹn e Sọl. U rẹn emwi nọ si ẹre ra? E Sọl na ya lẹre ye ehe na viọ ihẹ yi. Vbe iran ghi sẹtin miẹn e Sọl, iran na rhiẹre gha die adesẹneva ọghe ikọbikẹvbo. E Sọl ẹre ọ ghi taan sẹ vbe ẹvbo nii hia, kevbe wẹẹ ọ wa vbe mose ẹsẹsẹmwẹse. E Samuẹl keghi kha wẹẹ: ‘Ọna ẹre Jehova zẹ ne ọ gha re ọba ọghe uwa.’ Ivbi Izrẹl hia na kha wẹẹ: ‘Ọba gha tọ, ọ kpẹẹ re!’

Vbe Sọl da khian ọba, ọ na wa gha họn ẹmwẹ ne Samuẹl kevbe Jehova. Sokpan vbe ẹghẹ ghi zẹ khian, ọ na do fiwerriẹ. Vbe igiemwi, a ma kpasẹ yọ ne ọba gha zọ ese. Vbe ẹghẹ ne Samuẹl ya tama e Sọl ne ọ mudia khẹ irẹn, ne irẹn do zọ ese, e Samuẹl ma rherhe rre. Rhunmwuda ọni, e Sọl na wa tobọre zọ nene ese. De emwi ne Samuẹl ghi ru? Ọ keghi tama e Sọl wẹẹ: ‘U ghẹ te he ẹmwẹ ye Jehova obọ.’ Ọna gha rhie ẹwaẹn ne Sọl ra?

Vbe ọ ma he kpẹẹ vba, e Samuẹl keghi tama e Sọl wẹẹ, nọ gbele emwa hia rua vbe ọ gha ya khọn Ivbi Amalẹk. Sokpan e Sọl na sẹ Ọba Agag rae. E Jehova keghi tama e Samuẹl wẹẹ: ‘E Sọl yangbe mwẹ nẹ, ẹi ghi họn ẹmwẹ mẹ.’ Ọna keghi balọ e Samuẹl vbe ekhọe, ọ na ghi tama  e Sọl wẹẹ: ‘Rhunmwuda wẹẹ u i ghi họn ẹmwẹ ne Jehova, ọ gha zẹ ọba ọvbehe.’ Vbe Samuẹl khian ghi kpa, e Sọl na da re ukpọn yi, ẹre ehọ ukpọn rẹn na sọọ. E Samuẹl keghi tama e Sọl wẹẹ: ‘E Jehova miẹn ruẹ arriọba ọghuẹ nẹ.’ Ọmwa nọ gha hoẹmwẹ e Jehova kevbe nọ gha họn ẹmwẹ nẹ, ẹre Jehova khian ghi mu arriọba nii na.

“A họn ẹmwẹ nẹẹn, ọre ọ maan sẹẹ ne a gha gbe ohuan ne ọ maan sẹẹ nẹẹn.”—1 Samuẹl 15:22