Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 38

E Jehova Keghi Ya E Samsin Wegbe

E Jehova Keghi Ya E Samsin Wegbe

Ivbi Izrẹl nibun na werriegbe suẹn gha ga ẹbọ, ọni ẹre ọ si ẹre ne Jehova na zinegbe ne Ivbi e Filistin rhie obọ yan iran uhunmwu. Sokpan Ivbi Izrẹl eso ye gha rrọọ ni hoẹmwẹ e Jehova. Ọkpa vbe iran na ọre Manoa. Irẹn vbe ọvbokhan rẹn i mwẹ ọmọ. Vbe ẹdẹ ọkpa, e Jehova keghi gie odibo ọghẹe bu ọvbokhan e Manoa. Odibosa nii keghi tama rẹn wẹẹ: ‘U gha biẹ ọmọ okpia. Irẹn ẹre ọ khian miẹn Ivbi Izrẹl fan vbe obọ Ivbi e Filistin. E Nazarait khian gha nọ.’ U rẹn emwa ni ghaa re Nazarait ra? Iran kegha re eguọmwadia e Jehova ne kpataki. Avbe Nazarait i gbe eto ọghe iran.

Vbe ẹghẹ ghi sẹ, ọvbokhan e Manoa keghi biẹ ọmọ okpia, a na gha tie ẹre Samsin. Vbe Samsin ghi waan nẹ, e Jehova keghi yae wegbe. Ọ wegbe sẹrriọ wẹẹ, ọ na ya obọ re eveva gbe oduma rua. Ọ vbe gha mwẹ ẹghẹ ọkpa ne Samsin ya gbe Ivbi e Filistin 30 rua. Ivbi e Filistin na gha mu ohu ẹre, iran na gha gualọ vbene iran khian ya gbe ẹre rua. Vbe Ivbi e Filistin ghi họn wẹẹ e Samsin vbiẹ vbe Gaza vbe ẹdẹ ọkpa, iran na ya gba khẹ ọre vbe onurho orere ẹvbo, ne iran mieke na gbe ẹre rua vbe ẹdẹ gha gbe. Sokpan vbe ogiasọn, e Samsin keghi vu urho nii mu ye izabọ gha rrie uhunmwu oke, vbe ọkpẹn Hibrọn!

Vbe ọ ghi zẹ kpẹẹ, Ivbi e Filistin keghi bu egbakhian ọghe Samsin na tie ẹre Delila, iran na tama rẹn wẹẹ: ‘Ma gha hae ruẹ igho nọkhua deghẹ u na gu ima gualọ otọ emwi nọ ya e Samsin wegbe. Ma hoo ne ima muẹn ye eghan.’ Igho nii keghi viẹn ye Delila aro, ọ na ghi kue ye emwi ne iran khare. Vbe okaro, e Samsin ma tama rẹn emwi nọ ya irẹn wegbe. Sokpan ọ ma gi egbe rọkhọ e Samsin ba ẹmwẹ na; vbe ọ ghi zẹ kpẹẹ, e Samsin na do vẹ oro nii ma rẹn. Ọ keghi tama rẹn wẹẹ: ‘Rhunmwuda ne I na re Nazarait, a ma he gbe mwẹ eto ke na ya biẹ mwẹ. Adeghẹ a na wa gbe mwẹ eto nia, ẹtin mwẹ ghi wa fo.’ U miẹn abakuru nọkhua ne Samsin ru!

E Delila keghi ya tama Ivbi e Filistin vbobọvbobọ wẹẹ: ‘I miẹn otọre nẹ!’ E Delila keghi bọ e Samsin ye ovbe, ẹre ọ na ghi wẹẹ ne ọmwa gia re  eto. E Delila keghi datu wẹẹ: ‘Samsin, ghee vbe Ivbi e Filistin rre!’ Vbe Samsin ghi kpaegbe, ẹtin na wa fo ẹre. Ivbi e Filistin keghi rhu ẹre aro eveva, iran na ya muẹn ye eghan.

Vbe ẹdẹ ọkpa, Ivbi e Filistin nibun keghi si egbe koko vbe ogiukpo ọghe ẹbọ ne iran gho na tie ẹre Dagọn, iran na gha kha wẹẹ: ‘osa ọghe ima mu e Samsin ye ima obọ nẹ! Rhie Samsin ladian, ne u gi ima yae gbogiẹ kherhe!’ Iran keghi muẹn mudia ye ẹkpo orrẹ eva, iran na gha yae gbogiẹ. E Samsin keghi da tie Jehova wẹẹ: ‘Eo Jehova, rhie ẹtin mẹ vbe uhukpa na.’ Vbe ẹghẹ na kha na, eto ọghe Samsin werriegbe zọọ nẹ. E Samsin keghi loo ẹtin ẹnrẹn hia ya rhua orrẹ ọghe ogiukpo nii gbotọ. Owa nii hia keghi dele gbotọ, emwa hia ni ghaa rrọọ keghi wulo ya sẹ egbe Samsin.

“I mwẹ ẹtin ne I ya ye egbe miẹn emwi hia vbe ekpa ẹtin ne [Osanobua] rhie mẹ.”—Filipai 4:13