Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 29

E Jehova Zẹ E Jọsua

E Jehova Zẹ E Jọsua

Vbe ọ ghi bu ẹghẹ ne Mosis khian ya wu, iyeke vbe ọ ghi su Ivbi Izrẹl vbe ọwara ukpo nibun nẹ, e Jehova keghi tama rẹn wẹẹ: ‘Ẹi re uwẹ ẹre ọ khian su Ivbi Izrẹl la Otọ Na Yan Rẹn. Sokpan I gha gu ruẹ bẹghe otọ nii.’ E Mosis keghi tama e Jehova, ne ọ zẹ ọmwa nọ khian ghi gha su Ivbi Izrẹl. E Jehova keghi tama rẹn wẹẹ: ‘Bu e Jọsua, ne u ya tama rẹn wẹẹ irẹn nọ.’

E Mosis keghi tama Ivbi Izrẹl wẹẹ te irẹn khian ghi wu na, kevbe wẹẹ e Jọsua ẹre Jehova zẹ nọ khian ghi su iran la Otọ Na Yan Rẹn. E Mosis keghi tama e Jọsua wẹẹ: ‘Ghẹ gi ohan muẹn. E Jehova gha ru iyobọ nuẹ.’ Vbe ọ ma he kpẹẹ vba, e Mosis kegha rrie uhunmwu Oke Nebo, evba ẹre Jehova na ghi gie ẹre ma rẹn ighẹ otọ nọ yan rẹn ma Ebraham, Aizik kevbe Jekọb wẹẹ, irẹn gha mu ne ivbi iran. Ukpo 120 ẹre Mosis ghaa ye vbe ọ wu.

E Jehova keghi tama e Jọsua wẹẹ: ‘Fian Ẹzẹ e Jọdan rra, ne u gha rrie Kenan. I gha ru iyobọ nuẹ vbene I vbe ru iyobọ ne Mosis. Ghẹ gia miẹn ẹdẹ ọkpa ne u ma tie Uhi mwẹ. Ghẹ gi ohan muẹn. Gha mwẹ udinmwẹ. Gha khian ne u ya ru emwi ne I wẹẹ ne u ru.’

 E Jọsua keghi gie orhunmwu eva, ne iran ya ba otọ e Jẹriko ghee. Ma gha rẹn emwi nọ ghi sunu vba, vbe okha nọ lelẹe. Vbe iran ghi rre, iran keghi tama e Jọsua wẹẹ ẹghẹ sẹ nẹ, ne iran khian ya la otọ e Kenan. Ẹdẹ ghi gbe, e Jọsua keghi tama Ivbi Izrẹl ne iran kun emwi iran. Ẹre ọ na ka gie avbe ohẹn ni ghaa dada ẹkpẹti ile khian, ne iran ka gha rrie Ẹzẹ e Jọdan. Ẹzẹ nọ dinmwi ẹre nọ. Sokpan owẹ ọghe avbe ohẹn nii ghi wa dekaan nene ẹzẹ, ọ ma ghi lẹẹ, ẹre ẹzẹ nii na wa ka! Avbe ohẹn nii keghi mudia ye otọ ẹzẹ nii, a te miẹn wẹẹ Ivbi Izrẹl fiaẹn rra fo. Uwẹ ma yayi wẹẹ emwi ọyunnua na, yee iran re rre ighẹ emwi ne Jehova ru ne iran, vbe Okun Nọ Baa ra?

Vbe okiekie, Ivbi Izrẹl na do sẹtin sẹ Otọ Na Yan Rẹn. Iran na bọlọ owa ughughan. Iran na vbe gha mu ugbo. Otọ nọ maan emwi okọ ẹsẹse, ẹre otọ nii ghaa khin.

“Ẹghẹ hia mẹ gha ya gha su uwa, I ghi ya emwi ni maan sẹ uwa ọkẹn.”—Aizaia 58:11