Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 31

E Jọsua Kevbe Ivbi e Gibiọn

E Jọsua Kevbe Ivbi e Gibiọn

Okhekhe ọghe emwi nọ sunu daa e Jẹriko keghi gba agbẹnvbo hia ni ghi dekẹ vbe otọ e Kenan. Avbe ọba ọghe avbe agbẹnvbo nii, na si uhunmwu koko ne iran ya gu Ivbi Izrẹl khọn. Sokpan emwi ọvbehe ẹre Ivbi e Gibiọn wa gha mwẹ vbe ekhọe. Iran keghi yọ ukpọn ne yanghan yanghan, iran na bu e Jọsua ya tama rẹn wẹẹ: ‘Ẹvbo nọ rree ẹre ima ke dee na. Ma wa họn vbekpae emwi ne Jehova ru ne uwa vbe Igipt kevbe Moab. Ma gha khian eguọmwadia ọghe uwa, sokpan uwa ka ru eyan ma ima nẹ wẹẹ, uwa i khian guọghọ ima.’

E Jọsua keghi ya iran yi, ẹre ọ na vbe ru eyan ma iran. Ikpẹdẹ eso ghi gberra nẹ, e Jọsua na do rẹn wẹẹ ẹi re ẹvbo nọ rree ẹre iran ke rre. Otọ e Kenan ẹre iran ke rre. E Jọsua keghi nọ Ivbi e Gibiọn wẹẹ: ‘Vbọsiẹ ne uwa na ta ohoghe ma ima?’ Iran na kha wẹẹ: ‘Ohan ẹre ọ ghaa mu ima! Ma rẹnrẹn wẹẹ e Jehova ne Osa ọghe uwa, ẹre ọ gbinna ne uwa. Lahọ, uwa ghẹ gbe ima rua.’ E Jọsua keghi mu eyan ọghẹe sẹ, ọ ma ghi gbe iran rua.

 Vbe ọ ma he kpẹẹ vba, ọba isẹn ọghe otọ e Kenan na wẹẹ iran khian guọghọ Ivbi e Gibiọn. Ẹre Jọsua vbe ivbi iyokuo ọghẹe na gha khian vbe asọn nii ya miẹn iran fan. Okuo keghi suẹn vbe owiẹ nọ lelẹe. Ivbi e Kenan na suẹn gha lẹẹ fua. Ehe ke ehe ne iran rhirhi lẹẹ gha rrie, e Jehova keghi ru ẹre ne esia gha dele gbe iran. Ẹre Jọsua na ghi rinmwia e Jehova, ne ọ gi ovẹn mudia hii, nẹ ghẹ giẹ dero. Vbọsiẹ ne Jọsua na wẹẹ ne Jehova ru egbe emwi vberriọ nọ ma he ka sunu ẹdẹ? Rhunmwuda wẹẹ, ọ mu ẹtin yan e Jehova. Ovẹn ma de vbe ẹdẹ ohoho, a te miẹn wẹẹ Ivbi Izrẹl khọnmiotọ yan avbe ọba ọghe Kenan kevbe ivbi iyokuo ọghe iran.

“Deghẹ ‘Ẹẹn’ nọ wẹẹ ‘Ẹẹn,’ deghẹ ‘Ẹn o’ nọ wẹẹ ‘Ẹn o,’ ẹmwẹ ne ọ ghi gberra vberriọ, Esu mwẹ obọ vbọ, obọ ọmwa dan nii ẹre ọ ke rre.”—Matiu 5:37