Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 34

E Gidiọn Keghi Khọn Miotọ Yan Ivbi E Midian

E Gidiọn Keghi Khọn Miotọ Yan Ivbi E Midian

Ọ ghaa mwẹ asẹ ọkpa ne Ivbi Izrẹl ya werriegbe suẹn gha ga ẹbọ. Ọwara ukpo ihinrọn ẹre Ivbi e Midian ya gha do ẹre viọ ighẹ emwi irri ọghe Ivbi Izrẹl, iran na vbe gha guọghọ emwi okọ ọghe iran. Ivbi Izrẹl keghi ya lẹre ye uvun okuta kevbe uhunmwu oke, ne obọ Ivbi e Midian ghẹ mieke na vba iran. Iran keghi rinmwia e Jehova nọ miẹn iran fan. Ẹre Jehova na ghi gie odibo ọghẹe gie okpia ọkpa na tie ẹre Gidiọn. Odibosa nii keghi tama rẹn wẹẹ: ‘E Jehova zẹ ruẹ nẹ, ne u gha re ovbi iyokuo nọ wegbe.’ E Gidiọn keghi nọ rẹn wẹẹ: ‘De vbene imẹ ne ẹi re ọmwa agbọn, khian ya miẹn Ivbi Izrẹl fan hẹ?’

Ne Gidiọn ya rẹn wẹẹ, e Jehova gele zẹ irẹn, ọ na rhie iku oru ye otọ, ọ na tama e Jehova wẹẹ: ‘Adeghẹ amẹ na gha rre iku oru na vbe owiẹ ne akhuẹ, vbe evbu gha tuo yan rẹn, sokpan otọ nọ ye na ka, I ghi rẹn wẹẹ uwẹ ẹre ọ gele zẹ mwẹ ne I miẹn Ivbi Izrẹl fan.’ Vbe ẹdẹ ghi gbe, amẹ na vuọn iku oru nii, vbene otọ nọ ye na ka! Sokpan e Gidiọn na vbe kha wẹẹ, ne iku oru nii ka, ne amẹ gha rre otọ vbe ẹdẹ gha vbe gbe. Ọ ghi vbe sunu vberriọ, e Gidiọn na do yayi wẹẹ, e Jehova gele zẹ irẹn. Ẹre ọ na si ivbi iyokuo ọghẹe koko ne iran ya gu Ivbi e Midian khọn.

 E Jehova keghi tama e Gidiọn wẹẹ: ‘I gha ruẹ ne Ivbi Izrẹl khọn miotọ. Sokpan ne ivbi iyokuo ruẹ na wa bun, uwa sẹtin gha roro ẹre wẹẹ uwa tobọ uwa ẹre ọ khọn miotọ. Tama ọmwaikọmwa ne ohan mu, ne ọ gha rrie owa.’ Ẹre ivbi iyokuo 22,000 na gha rrie owa, sokpan 10,000 na mudia. E Jehova keghi kha wẹẹ: ‘Ivbi iyokuo ni dekẹ ye bun gbe. Viọ iran gha rrie ẹzẹ, ne u gi iran ya wọn amẹ. Ọmwaikọmwa nọ ghi wọn amẹ, ọ na vbe gha bodẹ, ẹre ọ khian lele ruẹ gha rrie nene okuo.’ Ivbi iyokuo 300 ọkpa kẹkan ẹre ọ ghaa bodẹ vbe iran wọn amẹ. E Jehova keghi tama rẹn wẹẹ ivbi iyokuo na, ẹre ọ khian khọn miotọ yan ivbi iyokuo e Midian ni re 135,000.

Vbe asọn nii, e Jehova keghi tama e Gidiọn wẹẹ: ‘Ọna ẹre ọ wa re ẹghẹ ne uwa khian ya guọghọ Ivbi e Midian!’ E Gidiọn keghi viọ okpe, ovbieluba kevbe ukpa ne ivbi iyokuo ọghẹe. Ọ na tama iran wẹẹ: ‘Wa gha ghee mwẹ, ne uwa ru emwi ne I rhirhi ru.’ E Gidiọn keghi kpee okpe, ọ na gbe ovbieluba ọghẹe, ọ na vbe fieghe ukpa nọ mu mwẹ obọ, ẹre ọ na datu wẹẹ: ‘Umozo ọghe Jehova kevbe ọghe Gidiọn!’ Ivbi iyokuo ọghẹe ni re 300 na vbe ru vberriọ zẹẹ. Orrirri keghi gbe kue Ivbi e Midian, ẹre iran na gha lẹẹ gbe egbe. Rhunmwuda ezagha nọ la iran egbe, iran na suẹn gha gbele egbe rua. E Jehova keghi werriegbe ru iyobọ ne Ivbi Izrẹl ya khọn miotọ yan eghian ọghe iran.

“Ne a miẹn ehe na rhie ma wẹ, ẹtin ne ọ sẹ ehia, ọghe Osanobua nọ, ighẹ ẹi re ọghe ọmwa.”—2 Kọrinti 4:7