Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 22

Emwi Ọyunnuan Nọ Sunu Vbe Okun Nọ Baa

Emwi Ọyunnuan Nọ Sunu Vbe Okun Nọ Baa

Vbe Fero ghi họn wẹẹ Ivbi Izrẹl kpa nẹ, ọ na werriegbe fi ekhọe werriẹ. Ọ na tama ivbi iyokuo ọghẹe wẹẹ: ‘Uwa viọ avbe ikẹkẹ okuo mwẹ ladian, ne uwa gia zẹ iran khu! Ma i ghẹ te kue ne iran kpa.’ Ẹre Fero vbe emwa ọghẹe na suẹn gha khu Ivbi Izrẹl khian.

E Jehova kegha su emwa rẹn khian, vbene ọ na gha ya okuku gue iran vbe ẹghẹ avan, ọ na vbe gi erhẹn gha baa vbe ẹghẹ asọn ne iran mieke na gha bẹghe odẹ. Vbe ọ ghi su iran sẹ Okun Nọ Baa, ọ na wẹẹ ne iran bu agọ ye evba.

Evba ẹre Ivbi Izrẹl na ghi bẹghe ẹre wẹẹ e Fero kevbe ivbi iyokuo ẹre khu iran dee. Ivbi Izrẹl ma ghi rẹn vbene iran khian ghi khian hẹ; ẹzẹ rre iran odaro, ivbi iyokuo Igipt rre iran iyeke. Iran keghi kpee tie Mosis wẹẹ: ‘Uwu ẹre ima miẹn na! U gha te fẹko sẹ ima rae ye otọ Igipt.’ Sokpan e Mosis keghi kha wẹẹ: ‘Uwa ghẹ gi ohan mu uwa. Uwa fẹko zin egbe ne uwa bẹghe vbene Jehova khian ya miẹn ima fan hẹ.’ E Mosis gele wa mu ẹtin yan e Jehova, ra ẹi re erriọ?

E Jehova keghi tama Ivbi Izrẹl ne iran fannọ ibọkpọ ọghe iran vbe eke ne iran bu agọ yi. Vbe asọn nii, e Jehova keghi ru ẹre ne okuku gha rre ẹkpo Ivbi Izrẹl kevbe Ivbi Igipt. Ebiebi keghi so vbe obọ ọghe Ivbi Igipt. Sokpan Ivbi Izrẹl na gha bẹghe odẹ vbe obọ ọghe iran.

 E Jehova keghi tama e Mosis ne ọ niẹn ọkpọ re daa okun. E Jehova keghi ru ẹre ne okpẹhoho la vbe asọn nii. Ẹre okun na ghi waa ye iheva, odẹ na ye gbodoo vbe adesẹneva okun. Ivbi Izrẹl hia ni re ẹbo nibun keghi fian okun nii gberra vbe otọ nọ kae, vbene amẹ na yevbe egbe ekẹn vbe obọ eveva.

Ivbi iyokuo e Fero na wẹẹ ne iran vbe lele Ivbi Izrẹl lae. E Jehova keghi ruẹ ne iro han iran. Owẹ ọghe ikẹkẹ okuo ọghe iran na gha yannọ kua. Ivbi iyokuo nii na gha solo, iran na kha wẹẹ: ‘Uwa gia werriegbe! E Jehova ẹre ọ gbinna ne iran na.’

E Jehova keghi tama e Mosis wẹẹ: ‘Niẹn ọkpọ ruẹ daa okun.’ Vbe ọwarọkpa nii, amẹ keghi vba rhu ivbi iyokuo ọghe Igipt. E Fero vbe emwa rẹn na wulo ye uwu ẹzẹ. Ne ọ miẹn uhunmwu ma ghaa rrọọ.

Ivbi Izrẹl ni fian nene okun gberra kegha so ihuan urhomwẹ gie Osanobua vbenia wẹẹ: “Uwa gi ima so ihuan gie Jehova ne Ọba ọghomwa. Ọkpa ma zẹdẹ kẹ vbe iyokuo ọghe Fero.” Vbe ẹghẹ ne iran ya gha so ihuan, ikhuo ni rrọọ na gha kpee ukusẹ, iran na gha gbe. Iran hia na gha ghọghọ rhunmwuda ne iran na miẹn fan.

“Rhunmwuda ọni, wa gie ima din ne a kha wẹẹ, ‘Nọyaẹnmwa ọre ne ọ yọ mwẹ obọ, ohan i ghi mu mwẹ. De emwi ne ọmwa gha sẹtin ru mwẹ re?’”—Hibru 13:6