Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 6

Orhunmwu Erẹnrẹn Keghi Miẹn Fan La Agbọn Ọgbọn

Orhunmwu Erẹnrẹn Keghi Miẹn Fan La Agbọn Ọgbọn

Vbe Noa vbe ẹgbẹe ọre kevbe avbe aranmwẹ ghi la uwu okọ nẹ, e Jehova keghi khui urho okọ nii. Ẹre amẹ na ghi suẹn gha rhọọ. Vbene amẹ nii ghi rhọọ sẹ, okọ ọghe Noa na suẹn gha khian vbe uhunmwu amẹ. Vbe amẹ ghi zẹ rhọọ, ọ na do ro gba uhunmwu otagbọn hia. Emwa dan hia na wulo. Sokpan e Noa vbe ẹgbẹe ọre ni ghaa rre uwu nene okọ na miẹn fan. Vbe uwẹ a yayi wẹẹ, ekhọe ọghe iran ghaa ye hẹ rhunmwuda ne iran na họn ẹmwẹ ne Jehova?

Vbe amẹ nii ghi rhọọ nẹ vbe ikpẹdẹ 40 kevbe asọn 40, ọ na ka. Amẹ nọ te ro vuọn ehe hia na suẹn gha ka kherhe kherhe. Vbe okiekie, okọ nii na do mudia ye uhunmwu oke. Ne amẹ na ye ro vuọn ehe hia, e Noa vbe ẹgbẹe ọre ma sẹtin ladian.

Kherhe kherhe ẹre amẹ ya ka vbe otọ. Ọ gberra ukpo ọkpa ne Noa vbe ẹgbẹe ọre ya gha rre uwu okọ nii. E Jehova keghi tama iran ne iran ladian vbuwe nene okọ, ne iran mieke na la agbọn ọgbọn. Iran keghi ru izọese gie Jehova, ne iran yae kpọnmwẹ ọnrẹn ye odẹ ne ọ ya miẹn iran fan.

E Jehova keghi miẹn izọese nii yi. E Jehova keghi yan rẹn wẹẹ, irẹn i khian ghi werriegbe ya amẹ guọghọ uhunmwu otagbọn na. Ne Jehova ya suigiẹ ye eyan ne irẹn ru na, ọ keghi ruẹ ne ikpin ladian vbe orere iso. Uwẹ he bẹghe ikpin ẹdẹ ra?

Vbe iyeke ọni, e Jehova keghi tama e Noa vbe ẹgbẹe ọre ne iran biẹlẹ vuọn uhunmwu otagbọn hia.

“Noa [keghi] la okọ zẹẹ. [Emwa] ma rẹn enaye uromwẹ amẹ te do kpolo ehia gha rrie.”—Matiu 24:38, 39