Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 102

Umian Ne Jọn Miẹn

Umian Ne Jọn Miẹn

Vbe Jọn ghi rre eghan vbe otọ ne amẹ gbodin lẹga ọghe Patmọs, Jesu keghi mu umian 16 ọghe emwi nọ khian sunu vbe odaro ma rẹn. Avbe umian na, ya ima rẹn vbene a khian ya ye eni e Jehova khian nọhuanrẹn hẹ, vbene Arriọba Osanobua khian ya rre hẹ kevbe vbene a khian ya gha ru ahoo ọghẹe hẹ vbe agbọn na zẹvbe ne a ru ẹre vbe ẹrinmwi.

Vbe umian ọkpa ne Jọn miẹn, ọ keghi bẹghe ẹkete ọghe Jehova vbe ẹrinmwi. Ọ na vbe bẹghe ediọn 24 ni yọ ẹwu nọfua kevbe ni mu ẹrhu ẹde igoru rhuẹ. Ediọn 24 nii keghi tota lẹga ẹkete ọghe Jehova. Awanwan kevbe owogho avannukhunmwu kegha ke ẹkete nii rre. Ẹre ediọn 24 nii, na ghi ya uhunmwu rhanmwẹ otọ ne Jehova, iran na gha rhie urhomwẹ nẹ. Vbe umian ọvbehe, e Jọn keghi bẹghe oghẹn ne gbii ni ga e Jehova ni ke agbẹnvbo ughughan rre. Jesu nọ re Oteghe Ohuan keghi su iran gha rrie eke ne amẹ ọghe arrọọ ye. Vbe umian ọvbehe ne Jọn vbe miẹn, ọ keghi bẹghe vbene Jesu kevbe ediọn 24 ya suẹn gha kha hẹ zẹvbe Ọba vbe ẹrinmwi. Vbe umian nọ ghi lelẹe, e Jọn keghi bẹghe vbene Jesu ya gu e Setan vbe ikpayẹ ọre khọn hẹ. Jesu keghi khu iran hin ẹrinmwi rre gha die uhunmwu otagbọn.

 Vbe iyeke ọni, e Jọn keghi bẹghe Oteghe Ohuan kevbe orhunmwu 144,000 mudia ye uhunmwu Oke Zaiọn. Ọ na vbe bẹghe odibosa ọkpa, ne ọ tin khian vbe orere iso. Nene odibosa kegha tama emwa nagbọn, ne iran gha mu ohan Osanobua kevbe ne iran gha rhie uyi gie ẹre.

Vbe umian nọ ghi lelẹe, e Jọn keghi bẹghe vbene okuo Amagẹdọn khian gha ye hẹ. Jesu kevbe ivbiyokuo ọghẹe keghi khọnmiotọ yan agbọn ọghe Setan vbe okuo Amagẹdọn. Vbe umian nokiekie ne Jọn miẹn, e Jọn keghi bẹghe vbene akugbe ya rre ẹrinmwi kevbe uhunmwu otagbọn hẹ. Ọ na vbe bẹghe vbene Setan kevbe ikpayẹ ọre ya khian na wabọre rua vbe etẹbitẹ. E Jọn keghi bẹghe vbene emwa hia vbe ẹrinmwi kevbe uhunmwu otagbọn ya kpe eni e Jehova huan hẹ kevbe vbene iran hia ya ga e Jehova hẹ.

“I gha ruẹẹ ne uwẹ kevbe okhuo nii gha ya eghian so egbe, eghian egbe ẹdẹdẹmwẹdẹ ọre ivbi ẹre ke ivbi uwẹ ra gba gha khin; ivbi ẹre gha lọkọ uhunmwu uwẹ, wẹ ghi vbe gha sa iran ighinghianwẹ.”—Gẹnẹsis 3:15