Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 101

Iran Mu E Pọl Gha Rrie Rom

Iran Mu E Pọl Gha Rrie Rom

E Jerusalẹm ẹre Pọl ghi mu okhian gha rrie kiekie. Evba ẹre iran na muẹn ye eghan. Vbe ọ ghi rre asọn ọkpa, Jesu keghi tama e Pọl vbe umian wẹẹ: ‘U gha yo e Rom ya kporhu.’ Iran keghi mu e Pọl vbe Jerusalẹm gha rrie Sisaria; evba ẹre ọ na gbe ukpo eva vbe eghan. Vbe ẹghẹ ne Fẹstọs ne ọka arriọba ghi ya guan ye ẹmwẹ e Pọl, e Pọl keghi tama rẹn wẹẹ: ‘Wa mu mwẹ gha rrie Rom ne Ọgbaisi (Ceaser) bu ohiẹn mwẹ.’ Ẹre Fẹstọs na ghi tama rẹn wẹẹ: ‘Ugbẹnvbe a miẹn wẹẹ u tọn ẹzọ ruẹ mu gha rrie ọghe Ọgbaisi (Ceaser), I gha gu ruẹ gha khian.’ Iran na ghi mu e Pọl ye uwu okọ nọ rrie Rom, vbene iran na ya ọgiọrọ gbalọ ọre obọ; etẹn eva nọ re Luk kevbe Aristakọs keghi lelẹe.

Vbe iran ghi gua okọ khian, okpẹhoho na suẹn gha la; ọwara ikpẹdẹ nibun ẹre ọ ya gha la vbene ọ ma na fo, ọ ma vbiẹ. Iran hia na gha roro wẹẹ ọghe iran wa fo nẹ. Sokpan e Pọl keghi tama iran wẹẹ: ‘Ma i khian wu, ne uwa ghẹ mu ohan. Odibosa ọkpa tama mwẹ vbe imina wẹẹ: “Ghẹ gi ohan muẹn, Pọl. Ke uwẹ ke emwa hia ni rre uwu okọ na gha sẹ e Rom vbe egbe hẹnẹdẹn.”’

Ọwara ikpẹdẹ 14 ẹre okpẹhoho na wa ya la. Vbe ọ ghi zẹ kpẹẹ, iran na do gha bẹghe otọ ne amẹ gbodin lẹga ọghe Malta. Vbene ẹhoho ya bi okọ nii dee, ọ na dekun uzekhae, ẹre ọ na ghi ni, sokpan emwi rhọkpa ma ru orhunmwu 276 ni ghaa rre uwu okọ nii. Eso vbuwe iran keghi khuẹ ladian, vbene eso na mudia yan oyọnmwẹ ra abọ nọ yan fua vbe okọ nii, nọ mieke na lẹẹ iran gha die otọ kẹkan. Ivbi e Malta keghi ya obọ esi mu iran; iran na vbe koko erhẹn ne iran, ne iran mieke na yegbe ghaa ẹre rhunmwuda oni nọ ghaa fi.

Vbe uki eha ghi gberra nẹ, ivbiyokuo keghi ya okọ ọvbehe mu e Pọl gha rrie Rom. Vbe ọ ghi sẹ e Rom, etẹn ni rre evba keghi do gbọbokhian nẹ. Orhiọn keghi la e Pọl iwu vbe ọ bẹghe iran, ọ na rhie ekpọnmwẹ ne Jehova. Agharhemiẹn wẹẹ oleghan ẹre Pọl ghaa khin, iran keghi kue ne Pọl mu owa, vbene ivbiyokuo na gha gbogba ga re, nẹ ghẹ lẹẹ fua. Ukpo eva ẹre ọ gbe vbe evba. Emwa gha rre do miẹn ọnrẹn, ọ ghi loo ẹkpotọ nii ya kporhu iyẹn nọ maan ọghe Arriọba Osanobua ma iran, ọ ghi vbe tama iran vbekpae Jesu. E Pọl vbe gha gbẹnnẹ elẹta gie etẹn ni rre iko vbe Asia  Minor kevbe Judia. Vbene ẹmwata, e Jehova wa loo e Pọl ya kporhu iyẹn nọ maan ma agbẹnvbo nibun.

“Sokpan vbe uwu emwi ne ima ru hia, ma ghi gha hia ne ima gha rhie maan wẹẹ, eguọmwadia Osanobua ma khin, vbe ekpa ne a na ye ẹgbodin zinegbe vbe uwu ọlọghọmwa, ukpokpo, kevbe orueghe.”—2 Kọrinti 6:4