Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 91

Jesu Rhiọkpaegbe

Jesu Rhiọkpaegbe

Vbe Jesu ghi wu nẹ, okpia ọkpa nọ fe na tie ẹre Josẹf, keghi ya rinmwian e Pailet, ne ọ gi irẹn mu ikun Jesu tuorre vbe uhunmwu erhan. E Josẹf keghi ya ukpọn vbuọ ikun Jesu, ọ na vbe ya ori nọ winhin wuo ẹre egbe. Vbe iyeke ọni, ọ na ree Jesu ye idin ne a da fian ye uwu okuta. Ọ na vbe werriẹ okuta nọkhua gue unu idin nii. Avbe ogie ohẹn keghi tama e Pailet wẹẹ: ‘Erhuanegbe Jesu sẹtin ya do ikun ẹnrẹn mu, iran ghi do gha tama emwa wẹẹ Jesu rhiọkpaegbe nẹ.’ E Pailet na ghi tama iran wẹẹ: ‘Wa gie emwa eso ne iran ya gbogba ga idin nii.’

Vbe ọ ghi rre ikpẹdẹ eha, ikhuo eso kegha rrie eke na ree Jesu yi. Owiẹwiẹ ọkpa ẹre iran ya sẹ evba. Iran keghi bẹghe ẹre wẹẹ, a werriẹ okuta na ya gue unu idin nii hin odẹ rre. Iran na vbe miẹn odibosa ọkpa vbuwe ẹre. Nene odibosa keghi tama iran wẹẹ: ‘Wa ghẹ gi ohan mu uwa. Jesu rhiọkpaegbe nẹ. Wa ya tama erhuanegbe ẹre ne iran ya vba Jesu vbe Galili.’

Vbe ẹghẹ na kha na, e Meri Magdalen keghi rhulẹ ya gualọ e Pita vbe Jọn. Ọ ghi miẹn iran, ọ na tama iran wẹẹ: ‘Iran mu ikun Jesu kpa!’ Ẹre Pita vbe Jọn na ya ulẹ vbe okhian gha rrie eke na ree Jesu yi. Iran ghi sẹ evba, iran ma miẹn ikun Jesu. Ẹre iran na werriegbe gha rrie owa.

E Meri ghi werriegbe sẹ eke na ree Jesu yi, ọ na miẹn odibosa eva vbuwe uvun okuta nii. E Meri keghi tama iran wẹẹ: ‘I ma rẹn eke ne iran mu ikun Jesu yi.’ Vbe iyeke ọni, e Meri keghi bẹghe okpia ọkpa, ọ na gha roro ẹre wẹẹ ọmwa ne ọ gbaroghe evba ẹre nọ. E Meri keghi tama nene okpia wẹẹ: ‘Enọwanrẹn, lahọ de eke ne u mu ikun ẹnrẹn yi?’ Vbe nene okpia ghi sunu ye eni ẹnrẹn wẹẹ, “E Meri!” e Meri na wa rẹn wẹẹ Jesu ẹre ọ gu iran guan. Ẹre Meri na ghi tie ẹre: “Ọmamwaemwi!” Vbe iyeke ọni, ọ keghi mu Jesu dede. Jesu na ghi tama rẹn wẹẹ: ‘Gha khian, ne u ya tama etẹn mwẹ wẹẹ, u miẹn mwẹ.’ Vbobọvbobọ, e Meri keghi rhulẹ bu erhuanegbe Jesu, ya tama iran wẹẹ irẹn miẹn Jesu.

Vbe ọ ghi zẹ kpẹẹ, erhuanegbe Jesu eva keghi mu okhian ke Jerusalẹm gha rrie Emaọs. Okpia ọkpa keghi vba iran vbe odẹ. Nene okpia keghi nọ iran emwi ne iran guan kaan. Iran keghi wanniẹn ọnrẹn wẹẹ: ‘Uwẹ ma he  họn emwi nọ sunu ra? Nẹghẹdia ẹre avbe ogie ohẹn gbe Jesu rua. Nia, ikhuo eso tae khian wẹẹ Jesu rhiọkpaegbe nẹ!’ Ẹre ọ na ghi nọ iran wẹẹ: ‘Wa ma ya ẹmwẹ ne avbe akhasẹ ta yi ra? Avbe akhasẹ tae yotọ wẹẹ Kristi gha wu, ọ gha vbe rhiọkpaegbe.’ Nene okpia keghi rhan otọ Evbagbẹn Nọhuanrẹn ma iran sayọ. Vbe iran ghi sẹ Emaọs, erhuanegbe eva nii, keghi tama nene okpia nọ lele iran. Vbe iran khian ghi rri evbare, nene okpia keghi na erhunmwu. Ẹghẹ nii, ẹre ọ ghi ya vẹ ne iran rẹn wẹẹ Jesu ẹre ọ gu iran guan sin. Vbe iyeke ọni, Jesu keghi ru gbẹnnẹ.

Iran eva keghi werriegbe gha rrie Jerusalẹm ya na iyẹn emwi nọ sunu ma avbe ukọ, vbe owa ne iran na si egbe koko. Vbene iran na ye guan, Jesu na wa rhiegbe ma iran hia. Vbe okaro, avbe ukọ ma te yayi wẹẹ Jesu nọ. Jesu na ghi tama iran wẹẹ: ‘Wa ghee obọ mwẹ; wa vbe ya obọ kaan mwẹ. A tae yotọ wẹẹ Kristi gha wu, ọ gha vbe rhiọkpaegbe.’

“Mẹ ọre odẹ, mẹ ọre ẹmwata, mẹ ọre arrọọ. Ọmwa nọ gha sẹtin sẹ ehe ne Evbavba ye, ẹi rrọọ vbe ẹi re wẹ, te ọ la obọ mwẹ.”—Jọn 14:6