Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 93

Jesu Kpa Gha Rrie Ẹrinmwi

Jesu Kpa Gha Rrie Ẹrinmwi

Jesu keghi si avbe erhuanegbe ẹre koko vbe Galili. Ọ na yi iyi ne kpataki ne iran. Ọ tama iran wẹẹ: ‘Wa gha khian, ne uwa ya emwa khian erhuanegbe mwẹ. Wa maa iran re, emwi hia ne I vbe maa uwa re, wa ghi vbe dinmwi iran ye amẹ.’ Jesu na vbe yan ma iran wẹẹ: ‘Wa yerre wẹẹ, I gu uwa rrọọ vbe ẹghẹ hia.’

Vbe Jesu ghi rhiọkpaegbe, ikpẹdẹ 40 ẹre ọ gbe vbe agbọn na, ọ ke gha rrie ẹrinmwi. Vbuwe ẹghẹ na, Jesu keghi rhie egbe ma erhuanegbe ẹre nibun vbe Galili kevbe Jerusalẹm. Ọ na maa iran emwi nibun ni ru ekpataki. Ọ vbe winna iwinna ọyunnuan nibun. Vbe ne Jesu ke kpa gha rrie ẹrinmwi, ọ na si avbe ukọ ọghẹe koko vbe uhunmwu Oke Oliv. Ọ na tama iran wẹẹ: ‘Wa ghẹ kpa hin e Jerusalẹm rre. Wa zin egbe khẹ emwi ne Erha mwa yan rẹn.’

Avbe ukọ ọghẹe ma rẹn emwi ne Jesu ya ẹmwẹ na kha. Iran na nọ rẹn wẹẹ: ‘Te uwẹ khian ghi wa suẹn gha kha yan otọ Izrẹl ra?’ Jesu keghi wanniẹn iran wẹẹ: ‘Ọ ma he sẹ ẹghẹ ne Jehova wẹẹ ne I ya gha re Ọba. Vbe ne ẹi khian ghi kpẹẹ gbe, orhiọn nọhuanrẹn gha rhie ẹtin ne uwa. Ẹghẹ nii, wa ghi do gha re osẹ mwẹ. Wa kporhu vbe Jerusalẹm, e Judia, e Sameria, uhiẹn ya sẹ eke nọ ghi rree sẹ vbe agbọn na.’

Vbe iyeke ọni, Jesu keghi kpa gha rrie ẹrinmwi. Vbe ọ ghi khian, okuku keghi degue ẹre, erhuanegbe ẹre ma ghi sẹtin dẹghe ẹre.

Erhuanegbe Jesu keghi tuorre vbe uhunmwu Oke Oliv gha rrie Jerusalẹm. Ọ mwẹ ughugha nọ rre egedege ọkpa vbe Jerusalẹm, ne iran na gha si egbe koko na erhunmwu vbe ẹghẹ hia. Iran kegha diakhẹ adia ne Jesu khian rhie ne iran, ne iran mieke na rẹn emwi ne iran gha ru.

“A gha kporhu iyen ne ọ maan ọghe Arriọba na la otọ agbọn hia nẹ zẹ vbe osẹe ghe emwa hia, iyeke ọnii, ufomwẹ ghi do rre.”—Matiu 24:14