Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 92

Jesu Rhie Egbe Ma Avbe Ọgbehẹn

Jesu Rhie Egbe Ma Avbe Ọgbehẹn

Jesu ghi rhie egbe ma avbe ukọ ọghẹe nẹ, e Pita keghi kha wẹẹ, irẹn khian ya gbe ehẹn vbe Okun e Galili. E Tọmọs, e Jems, e Jọn kevbe erhuanegbe ọvbehe keghi lelẹe. Ẹdẹ te do gbe, iran ma gbe ehẹn rhọkpa.

Vbe ọ ghi rre owiẹ fioro, iran keghi miẹn okpia ọkpa nọ mudia vbe ọkpẹn ẹzẹ. Nene okpia na nọ iran wẹẹ: ‘Wa gbe ehẹn rhọkpa ra?’ Iran keghi wanniẹn ọnrẹn wẹẹ: “Hiehie!” Ẹre nene okpia na tama iran wẹẹ: “Wa fi ọga fi obọ erha ọmwa okọ.” Iran ghi ru vberriọ, ehẹn ne ọga ọghe iran mu, bun sẹrriọ wẹẹ, iran ma ghi sẹtin si ẹre ladian vbe uwu amẹ. Vbe Jọn ghi miẹn emwi ọyunnuan na, ọ na ghi rẹn wẹẹ, Jesu ẹre ọ gu iran rre evba sin. E Jọn na ghi tama iran nikẹre wẹẹ: “Enọyaẹnmwa nọ!” Ugbẹnvbe e Pita ghi wa họn ẹmwẹ na, ọ keghi san fi uwu amẹ, ọ na khuẹ ladian bu Jesu. Sokpan iran nikẹre keghi gua okọ gha dee.

Vbe iran ghi ladian vbuwe amẹ, iran na do vba ebrẹdi kevbe ehẹn vbe erhẹn. Jesu keghi tama iran wẹẹ: ‘Wa viọ rre vbe ehẹn ne uwa da gbe, na  viọ bae nọ rre erhẹn.’ Vbe ọ ghi ga nẹ, Jesu keghi tie iran, ne iran do rri evbare.

Vbe iran ghi rri evbare fo nẹ, Jesu keghi nọ e Pita wẹẹ: ‘Uwẹ hoẹmwẹ mwẹ sẹ ehẹn ne a gbe ra?’ E Pita keghi wanniẹn wẹẹ: “Ẹsẹse, Nọyaẹnmwa. U rẹnrẹn ighẹ I hoẹmwẹ ruẹ.” E Jesu na tama rẹn wẹẹ: ‘Koko avbe ohuan mwẹ.’ Jesu keghi werriegbe nọ e Pita wẹẹ: ‘E Pita, uwẹ hoẹmwẹ mwẹ ra?’ Ẹre Pita na kha wẹẹ: “Enọyaẹnmwa, wẹ rẹnrẹn ighẹ I hoẹmwẹ ruẹ.” Jesu keghi tama rẹn wẹẹ: “Gha gbe aro ghe avbe ohuan mwẹ.” Jesu ghi werriegbe nọ rẹn ukpogieha, ẹko ma ghi rhiẹnrhiẹn e Pita. Ẹre ọ na ghi tama Jesu wẹẹ: “Enọyaẹnmwa, wẹ rẹn emwi hia, wẹ rẹnrẹn ighẹ I hoẹmwẹ ruẹ.” Jesu na ghi tama rẹn wẹẹ: “Gha gbe aro ghe avbe ohuan mwẹ.” Ọ na vbe tama rẹn wẹẹ: ‘Ye gha lele mwẹ khian.’

“Jesu tama iran wẹẹ, ‘Wa lele mwẹ, I gha ma uwa vbene a ya munọ emwa nagbọn hẹ.’ Iran keghi sẹ ọga iran rae vbe ọwarọkpa, iran keghi lelẹe.”—Matiu 4:19, 20