Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 77

Okhuo Nọ Do Sa Amẹ Vbe Uhae

Okhuo Nọ Do Sa Amẹ Vbe Uhae

Vbe iran ghi do Ugie Alagberra fo nẹ, Jesu vbe erhuanegbe ẹre keghi mu okhian la e Sameria vbe iran werriegbe rrie Galili. Jesu na gha hẹwẹ vbe ọkpẹn uhae ọghe Jekọb nọ rre ọkpẹn ẹvbo na tie ẹre Sika, vbene erhuanegbe ẹre na gha rrie orere ẹvbo ya dẹ evbare.

Vbe okhuo ọkpa ghi rre do sa amẹ vbe uhae nii, Jesu na tama rẹn wẹẹ: “Sa amẹ mẹ wọn.” Okhuo nii keghi kha wẹẹ: ‘Vbọzẹe ne u na wẹẹ ne imẹ ne Ovbi e Sameria sa amẹ nuẹ wọn? Uwẹ ma rẹn wẹẹ Ivbi e Ju kevbe Ivbi e Sameria i lẹro egbe?’ Jesu keghi tama rẹn wẹẹ: ‘Akpawẹ te u rẹn aro ọmwa ne I khin, te u gha te nọ mwẹ ne I sa amẹ nuẹ wọn kevbe wẹẹ, I gha te sa amẹ arrọọ nuẹ.’ Okhuo nii keghi nọ rẹn wẹẹ: ‘Vbua khian ya sa amẹ mẹ hẹ, vbene u i na mwẹ ikoroba?’ Jesu keghi tama rẹn wẹẹ: ‘Ọmwa nọ rhirhi wọn vbe amẹ ne I gha sa nẹẹn, ovbamẹ i ghi dọlegbe gbe ẹre ẹdẹ.’ Okhuo nii na ghi tama rẹn wẹẹ: “Enọwanrẹn, sa mẹ vbe nene amẹ.”

E Jesu na tama rẹn wẹẹ: ‘Ya tie ọdafẹn ruẹ rre.’ Ọ na tama e Jesu wẹẹ irẹn i mwẹ ọdọ. Jesu na ghi tama rẹn wẹẹ: ‘Ẹmwata ẹre u wa ta. Ọdọ isẹn ẹre u he rọnmwẹ, ne u gue na i re ọdafẹn ruẹ.’ Okhuo nii keghi kha wẹẹ: ‘I bẹghe ẹre nẹ wẹẹ akhasẹ ẹre u khin. Ma ne Ivbi e Sameria yayi wẹẹ, ma gha sẹtin ga Osanobua vbe uhunmwu oke na, sokpan Ivbi e Ju khare wẹẹ, e Jerusalẹm ọkpa ẹre a khian na sẹtin ga Osanobua. I rẹnrẹn wẹẹ e Mezaia gha rre, ọ gha tama ima odẹ nọ khẹke na gha ya ga Osanobua.’ Jesu keghi tama rẹn wẹẹ: ‘Mẹ, ọre ne Mezaia.’ Okhuo na, ọre ọmwa okaro ne Jesu he ta ẹmwẹ na ma.

 Okhuo na keghi rhulẹ ya tama Ivbi e Sameria wẹẹ: ‘I miẹn okpia ọkpa nọ ta emwi hia ne I he ru ma mwẹ. I yayi wẹẹ irẹn ẹre ọ wa re Mezaia. Wa do ghee ẹre!’ Iran keghi lelẹe gha rrie nene uhae, ne iran do danmwehọ Jesu.

Ivbi e Sameria na wẹẹ ne Jesu dia ẹvbo iran ya. Jesu keghi maa iran emwi vbe ọwara ikpẹdẹ eva, emwa nibun na mu ẹtin yan rẹn. Iran na ghi tama okhuo nii, nọ do tie iran wẹẹ: ‘Rhunmwuda vbene okpia na ya guan, ma bẹghe ẹre nẹ wẹẹ, irẹn ọre ọmiọmwafan ọghe agbọn na.’

“‘Gha dee!’ ọmwaikọmwa ne ovbamẹ gbe gha dee; wẹẹ ne ọmwa ne ọ hoo ne ọ wọn amẹ ọghe arrọọ gha dee do wọn ọghọhẹ.”—Arhie Maan 22:17NW