Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 80

Jesu Zẹ Ukọ Iweva

Jesu Zẹ Ukọ Iweva

Vbe ọ ghi rre ukpo ọkpa vbe ukhiọnmwẹ ne Jesu ke kporhu, ọ na gha mwẹ atamuolọyan ne kpataki nọ khẹke ne ọ ru. De emwa ne irẹn khian zẹ nọ khian deba re winna? De emwa ne irẹn gha maa re emwi, ne iran gha su vbuwe iko ọghe Ivbiotu e Kristi? Jesu keghi gualọ adia ọghe Jehova ọ ke sẹtin ru atamuolọyan na. Rhunmwuda ọni, irẹn ọkpa na gha rrie uhunmwu oke, ọ na ya na erhunmwu ne ẹdẹ gbe. Vbe ẹdẹ ghi gbe, Jesu keghi si erhuanegbe ẹre hia koko, ẹre ọ na ghi zẹ ukọ 12 vbọ. Uwẹ rẹn eni avbe ukọ na ra? Eni iran ọre Pita, Andru, e Jems, e Jọn, e Filip, e Batolomiu, e Tọmọs, e Matiu, e Jems ne ovbi Alfiọs, e Tadiọs, e Saimọn, kevbe Judas Iskariọt.

Andru, Pita, Filip, Jems

Te iran Iweva na, ghaa mu okhian lelẹe yo ehe ne ọ rhirhi yo. Vbe ọ ghi maa iran emwi nẹ, ọ na gie iran ne iran ya kporhu. E Jehova keghi rhie ẹtin ne iran, ne iran ya gha khulo orhiọn dan kevbe ne iran ya gha mu emwa egbe rran.

Jọn, Matiu, Batolomiu, Tọmọs

Te Jesu ghaa ghee iran Iweva na, zẹvbe ọse ne irẹn gba ẹko ẹre. Ivbi e Farisi na gha ghee avbe ukọ na zẹvbe emwa kẹkan ni ma yo  owebe. Sokpan Jesu ma ya aro vberriọ ghee iran. Ọ keghi maa iran re vbene iran khian ya ru iwinna nọ mu ne iran. Te avbe ukọ na khian wa rhikhan mu e Jesu, ya sẹ ẹdẹ uwu. Ọ gha vbe rhiọkpaegbe, te iran khian ye gha lelẹe khian. Ẹvbo na tiẹre Galili ẹre irẹn vbe ni bun sẹ vbe ukọ re ke rre. Eso vbọ vbe ru orọnmwẹ.

Jems ne ovbi Alfiọs, Judas Iskariọt, Tadiọs, Saimon

Emwa ni ma gba, ni vbe ru abakuru ẹre avbe ukọ na ghaa khin. Ọ ghaa mwẹ ẹghẹ eso ne iran ma ya gha roro ẹmwẹ iran ke tae, iran vbe gha ru atamuolọyan nẹi maan. Ọ wa vbe mwẹ ẹghẹ eso ne iran ma ya gha mwẹ izinegbe. Iran vbe gha muan ẹmwẹ vbekpa ọmwa nọ kpọlọ sẹ vbuwe ẹbu iran. Sokpan emwa esi, ni hoẹmwẹ e Jehova ẹre iran ghaa khin. Iran ẹre ọ khian gha re ẹyotọ ọghe iko ọghe Ivbiotu e Kristi vbe Jesu gha kpa nẹ.

“Ọse mwẹ ọre I ghi tie uwa ẹre rhunmwuda emwi hia ne I họẹn vbe unu Erha mwẹ, I vbe talọ ehia ma uwa.”—Jọn 15:15