Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 79

Jesu Ru Emwi Ọyunnuan Nibun

Jesu Ru Emwi Ọyunnuan Nibun

Te Jesu rrie agbọn na, ne ọ do kporhu iyẹn nọ maan ọghe Arriọba Osanobua. E Jehova keghi rhie orhiọn nọhuanrẹn ne Jesu, ne ọ ya winna iwinna ọyunnuan, ne ọ mieke na rhiẹre ma emwi ne irẹn khian ru vbe ọ gha re Ọba. Jesu ghaa mwẹ ẹtin na ya mu emwa egbe rran. Emwa ni khuọnmwi gha bu e Jesu rre vbe ehe ne ọ rhirhi gha ye, ọ ghi mu iran egbe rran. Avbe arhuaro na gha bẹghe, avbe ayenhọ na gha họn ẹmwẹ, avbe uke na gha khian kevbe emwa ne orhiọn dan te loo na do miẹn afanvbimu. A gha wẹẹ ehọ ukpọn Jesu ẹre iran wa ya obọ kaan, egbe ghi rran iran. Emwa na gha bi lele Jesu vbe ehe ne ọ rhirhi la. Uhiẹn vbe emwa gha bu Jesu rre vbe ẹghẹ ne ọ hoo ne ọ ya hẹwẹ, ẹi khulo iran hin egbe rre.

Ọ ghaa mwẹ ẹghẹ ọkpa ne emwa ya mu okpia ọkpa nọ re uke, bu e Jesu rre. Sokpan iran ma miẹn eke la sẹ ehe ne Jesu ye rhunmwuda emwa ni vuọn evba. Ẹre iran na ghi gbe uvun ye uhunmwu owa nii, iran na ghi mu okpia nii tuorre. Jesu na ghi tama okpia nii wẹẹ: ‘Kpaegbe, ne u suẹn gha khian.’ Vbe okpia nii ghi gele suẹn gha khian, emwa hia na yan unu ruan.

Ọ vbe gha mwẹ ẹghẹ ọvbehe ne Jesu ya la igue ọkpa, ọ na bẹghe ọkhọnmwọ oti igbe, iran na ke urria datie ẹre wẹẹ: ‘Jesu, ru iyobọ ne ima!’ Vbe ẹghẹ nii, ai kue ne ọkhọnmwọ oti sikẹ emwa ọvbehe. Jesu keghi tama iran, ne iran gha rrie ọgua Osa; Uhi ọghe Jehova vbe ẹghẹ nii ọre wẹẹ, egbe gha rran ọkhọnmwọ oti nẹ, ọ gha rrie ọgua Osa. Vbe iran ghi khian vbe odẹ, egbe na rran iran. Ọkpa vbọ ghi ghee ighẹ egbe rran irẹn, ọ na  werriegbe bu e Jesu gha khian, ọ na ya rhie ekpọnmwẹ nẹ, ọ na vbe rhie urhomwẹ gie Osanobua. Vbuwe iran igbe nii, irẹn ọkpa kẹkan ẹre ọ do kpọnmwẹ Jesu.

Ọ vbe gha mwẹ okhuo ọkpa nọ wa ya ukpo 12 khuọnmwi emianmwẹ nọ ma fo vbe otọ. Okhuo na, keghi la iyeke Jesu rre do ya obọ kaan ehọ ukpọn rẹn. Ọwarọkpa nii, egbe na rran rẹn. Ẹre Jesu na ghi nọ wẹẹ: “Gha ọ ya obọ kan mwẹ?” Ohan na gha mu okhuo na, ọ na ghi ladian do tama e Jesu wẹẹ irẹn nọ. Jesu keghi mu orhiọn okhuo na sẹ otọ, ọ na tama rẹn wẹẹ: ‘Gha khian ovbimwẹ, ọfunmwegbe gu ruẹ rrọọ.’

Okpia ọkpa na ghaa tie ẹre Jairọs keghi rinmwian e Jesu wẹẹ: ‘Lahọ gha die owa mwẹ! Ukpọmọkpa ne I mwẹ wa khuọnmwi.’ Sokpan vbene Jesu ke sẹ evba, ovbi e Jairọs wu nẹ. Jesu ghi sẹ evba, ọ na do vba emwa nibun ni khiẹ vbe owa e Jairọs. Jesu keghi tama iran wẹẹ: ‘Uwa ghẹ ghi viẹ; te ọ vbiẹ.’ Ẹre ọ na ghi rhie ọvbokhan nii obọ, ọ na tama rẹn wẹẹ: “Ọmọ okhuo, I tama ruẹ, kpaegbe!” Ọmọ okhuo nii keghi kpaegbe vbe ọwarọkpa nii, ẹre Jesu na ghi rhiẹre ne evbibiẹ ọre ne iran rhie evbare nẹ. Vbe uwẹ a yayi wẹẹ ekhọe evbibiẹ ọmọ na, khian gha ye hẹ?

“Osanobua hihiẹ orhiọn ne ọ huanrẹn kevbe ẹtin yan rẹn . . . Ọ kegha lele ehe hia khian, ọ na winna iwinna esi, ọ na gha sinmwi emwa hia ne Esu mu gba, rhunmwuda Osanobua yaba ẹre.”—Iwinna 10:38