Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 85

Jesu Mu Ọmwa Egbe Rran Vbe Ẹdẹ Ikẹtin

Jesu Mu Ọmwa Egbe Rran Vbe Ẹdẹ Ikẹtin

Rhunmwuda ne Ivbi e Farisi na gha khẹko Jesu, iran kegha gualọ vbene iran khian ya muẹn khui hẹ. Iran keghi tama rẹn, nẹ ghẹ ghi mu emwa egbe rran vbe Ẹdẹ Ikẹtin. Vbe ọ ghi sẹ Ẹdẹ Ikẹtin ọkpa, Jesu keghi miẹn arhuaro ọkpa nọ dabọ khian vbe abọ idunmwu. Jesu na tama erhuanegbe ẹre wẹẹ: ‘Wa ghee vbene Osanobua khian ya ru iyobọ ne okpia na hẹ.’ Vbe iyeke ọni, Jesu keghi tu asẹn yotọ ya fuẹn ekẹn kugbe, ọ na yae wuo okpia nii aro. Jesu na tama rẹn wẹẹ: ‘Ya kpe aro ruẹ vbe ọghọdọ ọghe Siloam.’ Vbe nene okpia ghi kpe aro nẹ, aro ọre nọ te rhu ke ẹko rre keghi rran.

Emwi nọ sunu na, keghi yan emwa unu ruan. Iran na gha kha wẹẹ: ‘Ẹi re ọna ọre okpia nii, ne ọ tota lele ada dabọ khian? Ra ọmwa nọ khọ ọre nọ?’ Nene okpia keghi wanniẹn iran wẹẹ: ‘Mẹ wa nọ. Ẹi re ọmwa ọvbehe!’ Ẹre iran na ghi nọ rẹn wẹẹ: ‘De vbene aro ruẹ ghi ya rran hẹ?’ Vbe ọ ghi tama iran emwi nọ sunu, iran keghi rhie ẹre bu Ivbi e Farisi.

Nene okpia keghi tama Ivbi e Farisi wẹẹ: ‘Jesu ghi ya asẹn fuẹn ekẹn nẹ, ọ na yae wuo mwẹ aro. Ọ na wẹẹ ne I ya kpe aro vbe Siloam. I ghi ruẹ nẹ, I na suẹn gha bẹghe.’ Ivbi e Farisi keghi kha wẹẹ: ‘Ne Jesu na mu ọmwa egbe rran vbe Ẹdẹ Ikẹtin rhiema wẹẹ ẹi re ẹtin Osanobua ẹre ọ loo.’ Ẹre emwa eso na wẹẹ: ‘Akpawẹ ẹi re ẹtin Osanobua, ẹi ghẹ te sẹtin gha mu emwa egbe rran.’

 Ivbi e Farisi keghi nọ evbibiẹ nene okpia wẹẹ: ‘De vbene aro ovbi uwa ya rran hẹ?’ Ohan na gha mu evbibiẹ ọre rhunmwuda, te Ivbi e Farisi khu emwa ni mu ẹtin yan Jesu hin e sinagọg rre. Ẹre iran na ghi wanniẹn Ivbi e Farisi wẹẹ: ‘Ima ma rẹn. Wa tobọ uwa nọ rẹn.’ Ivbi e Farisi keghi dọlegbe suẹn gha zọlọ okpia nii ọta. Iran ghi zẹ nọ rẹn ọta, nene okpia keghi wanniẹn iran wẹẹ: ‘I ka tama uwa nẹ. Vbọsiẹ ne uwa na ye nọ mwẹ yi?’ Ohu na suẹn gha mu Ivbi e Farisi, iran keghi sua nene okpia fua.

Jesu ghi miẹn okpia na, ọ na nọ rẹn wẹẹ: ‘Uwẹ mu ẹtin yan e Mezaia ra?’ Ọ na wanniẹn Jesu wẹẹ: ‘I kpa rẹn ọmwa nọ khin, I gha te mu ẹtin yan rẹn.’ Jesu keghi tama rẹn wẹẹ: ‘Mẹ ọre Mezaia.’ Uwẹ ma bẹghe ẹre wẹẹ, ọmwa nọ mwẹ ekhọe esi ẹre Jesu khin ra? Ọ ghi rran okpia nii aro nẹ, ọ na vbe ru iyobọ nẹ ya gha mwẹ amuẹtinyan.

“Wa wa bae ku rhunmwuda ighẹ wa ma ren otọe Ebe nii, ra ẹtin Osanobua.”—Matiu 22:29